賴： WSJ 有篇專題報道，講返大陸債券上月出現恐慌性拋售，反映「代持」呢個常見做法所帶來嘅潛在問題。
代持，外人眼中係「回購協議」， repurchase agreement 。即係例如我揸住一舊貨 (股票又好，債券又好) ，想用呢舊貨做抵押品去換一舊錢返嚟，就可以同其他人 (例如銀行/經紀行) 訂立一個協議，話對方今日會畀 X 咁多錢我，隔 N 日之後我就會用 X+Y 咁多錢買返舊貨。
好明顯， Y 呢個銀碼係我為咗借錢而付出嘅成本，對家賺 Y 咁多錢，就承擔咗我走數同埋到時舊貨眨值嘅風險。
大陸之前出現嘅債市泡沫，令手持債券嘅人可以 keep 住玩「代持」，將債券抵押換現金，再用現金買債，再抵押換現金 x 2046 。債市一路升，就足以冚返借錢嘅成本，銀行同經紀行又有錢賺， win-win 雙贏。 (有啲情況係為咗迴避 audit 而將可能有問題嘅資產交畀第三者代持，不日回購)
問題係，債市一旦逆轉，「代持」呢個鬆散而冇乜白紙黑字法律效力嘅協議 (有啲 deals 只係喺通訊軟件如 QQ 度達成，口講口賠) 就會出現走數嘅風險：上月國海證券有員工「涉嫌偽冒公司圖章，進行虛假交易」就係好例子。 (究竟真係有員工造假，抑或只係替死鬼就唔清楚)
雖然事件喺監管機構介入後平息，國海願意賠返六至七成金額畀對家，但亦已動搖大家對債市嘅信心，火燒連環船過後， de-leverage 成為市場趨勢。
#我都知repo呢啲concept唔易明
#嘗試寫出嚟等自己記熟啲
#有咩錯漏麻煩大家講聲
