[1230隔夜超短劇評][無綫][不懂撒嬌的女人 第27集 大結局]
終於嚟到結局喇，兩集一口氣咁播，大家討論得好熱烈。我本身由第二季第15集開始，對套劇嘅期待期望已經漸漸降低，所以冇大家反應咁激動。你又覺得個結局如何呢？去呢度投票，我之後會整理返>>>
https://www.facebook.com/…/a.10913097475…/1477626275634746/…
[讚]
劇情上查實係冇乜嘅好讚……不過演員係正。高Ling做田蜜都真係可以話係佢嘅代表作，一直喺度玩Gordon，原來佢都係受傷害之後先至變成咁。佢同Gordon講郭力結婚之後唔理佢淨係掛住工作嗰段戲非常好，好到我原諒咗佢搞風搞雨。亦都解釋咗點解佢咁鍾意Gordon啦，因為似佢最愛嘅人郭力之餘，佢仲冇埋佢嘅大嘅缺點：只愛江山不愛美人。Gordon又有事業，又愛Mall姐，佢先係十級筍盤。郭力同高Ling嘅關係喺上一集先揭曉就冇辦法啦，冇得鋪排，畀觀眾估到就唔好睇。
但另一邊廂又唔同講法，田蜜同埋任太Grace條線可以鋪得出啲，可以誤導觀眾focus喺田蜜想借Grace過橋畀游生知道佢同任哥冇嘢，博佢信任畀上海project佢搞。到最後先話Grace同游生係有嘢嘅，好過依家咁突然啦，橫掂都一早講過田蜜接近咗任太。依家連埋郭力，兩吓一齊爆，又唔配合啲情節推高佢，就有啲散亂。
Roller前，Saving喺街嗰度再見到Cherry，見到佢畀返十蚊銀，我已經嚟料，因為Cherry明明講過話當佢欠Saving一世，依家還返畀佢係斷絕情感。Saving見到Cherry戴住戒指嗰吓，嗰種唔想Cherry睇出又忍唔住嘅悲傷，王浩信做得好好呀，直頭係呢兩集最好戲位。
[彈]
以為Oscar同Annie搞掂可以集中返啲，點知純純成日喺香港唔知搞乜，可以話係阻住晒，如果純粹係為咗令觀眾誤會純純同Saving結咗婚，我覺得又唔係好夠力喎，Saving要有嗰種感動先得呀…只係透過純純幫佢開咗間舖，靠賤Han口講話佢同屋企反晒面，唔夠勁。
Mall姐中段用文太嘅身分返去做CEO Assistant根本係笑片嚟，本身可以處理得好啲呀，因為Mall姐咁要面子，但係返傲星做助理喎，係因為Gordon而屈膝。點解唔寫佢返到去畀其他同事背後笑，佢又真係覺得自己好肉酸而受委屈好慘唔敢發嬲。到最後，田蜜迫Gordon跟佢去上海而Gordon唔肯，返返去Mall姐身邊，先有劇力嘛。之後再加上依家嘅Mall姐唔敢扔戒指、Gordon抱住佢橋段，夠晒數﹗
Saving同埋Cherry本身係還咗個十蚊銀畀佢嗰吓完咪幾好，我都怕Cherry知道咗Saving個Bobby Band（定手機）號碼係「全為你分秒亦停留」時，會返返去搵Saving咁娘，好在冇咋﹗點知居然Roller後搞啲咁嘅嘢，多咗囉吓嘛？立即娘晒。
Mall姐同Gordon嗰個結局直情係唔合格啦，cut咗佢好過。「生好多小朋友」同埋佢最後「唔撒嬌都可以同Gordon一齊」根本冇關係…何況Gordon一直都冇講話佢介意Mall姐冇得生。大佬呀，依家搞到好似周星馳《審死官》個結局咁，兒孫滿堂做乜嘢？跟住Mall姐終於都覺得撒嬌都正，因為係佢個囡撒佢嬌………我只可以講句：多謝晒……小朋友撒嬌同埋大人撒嬌喎，兩個世界吓嘛？
[有問題]
全世界只係得Gordon可以愛情事業兼得，點解有愛情就唔可以有事業？又點解兩個人明明相愛，一定要結婚？呢套劇啲思想根本係古老石山，我想寫篇長文去講吓。
[演員表]
宣萱 飾 Mall姐 / 林文龍 飾 Gordon / 王浩信 飾 Saving / 唐詩詠 飾 Cherry / 高海寧 飾 田蜜 / 崔笛 飾 郭力 / 張瑋純 飾 純純 / 黎諾懿 飾 賤Han / 袁文傑 飾 游生 / 袁潔儀 飾 Grace / 張達倫 飾 Oscar / 譚凱琪 飾 Annie
#1230隔夜超短劇評 #無綫 #TVB #不懂撒嬌的女人 #宣萱 #林文龍 #王浩信 #唐詩詠 唐詩詠 Natalie tong #高海寧 #崔笛 #張瑋純 張瑋純Mico #黎諾懿 #袁文傑 #袁潔儀 #張達倫 #譚凱琪
**********鳴謝**********
多謝大家睇咗我廢噏27次。有觀眾問我做乜之前唔寫「業餘觀眾睇後感」（唔係劇評，用劇評做名只係吸引啲，又易理解啲）。其實係係第一套劇寫啦，之前都有寫《全職沒女》、《心理追兇》同《午夜伴廊》，不過係業餘關係，睇到中半冇追就冇寫落去。《不懂撒嬌的女人》係我第一次由頭寫到尾嘅觀後感，希望唔好悶親大家。如果有好嘢，我一定再寫。
喺度好多謝大家嘅留言討論，亦都好多謝《撒嬌》劇組都有留意，有咩講得唔好嘅多多包涵。最後，非常多謝 DicksonWong ( 黃得生 ) 林秀怡 Kirby Lam 袁文傑 Andrew Yuen 張達倫 高海寧 Ko Ling 魏焌皓 Nathan Ngai 抽時間接受我呢個二打六嘅訪問，感激流涕。希望好快又可以見到你哋出色嘅作品﹗
**************************
林文龍ceo 在 【01娛樂】亞視CEO林文龍為TVB《那些我愛過的人》造勢 ... 的推薦與評價
【01娛樂】亞視CEO林文龍為TVB《那些我愛過的人》造勢黃翠如冀友台播預告身為男主角兼亞視副總裁的林文龍未理身份尷尬為TVB宣傳。（陳順禎攝）... ... <看更多>