《條路自己揀，仆街唔好喊》
「連續2日罷工，收咗warning letter，嚟緊應該會收大信封。」
「我老闆話今日就算遲到都無問題，坐的士可以Clam錢，公司只要你返到去坐係辦公室就得！收工無車點走？你諗你！放工坐的士走要自費！」
「我腦細知道我住新界北，無車返工，竟然叫我行路去最近嘅分行。就算今日冇客都唔可以令到分行冇人。」
朝早出一個post，收到好多讀者嘅Inbox，大部份都係敢怒不敢言，心裏面好想同自己個老細講叫佢去食屎，但係因為好多唔同嘅因素迫於無奈都要繼續返工。
我諗翻起啱啱開自己間獵頭公司嘅初衷，我想用自己嘅故事作小小分享。
當初我每年幫唔同公司跑幾百萬，逐漸發覺自己只不過係一部大型機器入邊嘅齒輪，可以隨時可以被更換同取代。每日返工只係做返大致上相同嘅事：見Candidate、Business Development Call客攞Role做、追KPIs、入System、Send CVs......當然仲未計逢星期一三五每日朝早嘅例會、中午嘅Pep Talk同放工前嘅10分鐘例行報告。做得好攰、好冇感情，開始發覺自己慢慢喪失人性同熱血，變得好似AI一樣嘅CV Screener，淨係識搵關鍵字睇經驗、睇學歷，忽略咗求職者嘅「故事」。坊間好多獵頭公司都唔鼓勵獵頭用超過半個小時同求職者見面對話，因為時間就係金錢，你係一間房同Candidate越耐就代表你實際做嘅工作時間越少，就會hit唔夠KPI，曾經有位口賤嘅同事同我講：「我哋同雞（性工作者）冇乜分別，希望客人快快上鐘然後落鐘，冇感情㗎，Candidate係我眼中只不過係一件嫖客/貨、佢哋履歷表只不過係一堆字、同埋我今個月嘅數（$）」聽完佢講之後有少少感慨，我入行嘅初心除咗係想有自己嘅事業、搵到錢之外，最重要係想同唔同人接觸，用個心去幫唔同嘅人搵到佢哋嘅「夢」。講真，得嗰幾十分鐘我點同你交流？點樣了解你背後嘅故事？點樣幫到你？
跑數唔係一切，返工返到成部機器咁有咩意思。我心諗我一年幫你跑幾百萬，仲要日日俾你捽，見Candidate長少少時間都俾你微言，叫我唔好嘥時間係一啲唔實際嘅嘢上面，我自己出嚟做，跑¼都夠我生活啦，我唔單止做獵頭，我可以有選擇性揀客，可以有選擇性自訂返工時間，最重要嘅係，我可以抽多啲時間見Candidate，開始慢慢去做客製化的Career Coaching，應該係全香港唯一一間以人為本，除咗做Recruitment仲會做埋Candidate Career Coaching嘅人力資源公司。我自決了自己嘅命運。
今日收到好多舊同事嘅WhatsApp，唔同嘅公司嘅MD大多數都係一個態度：今日一定要返工。班MDs好刻薄㗎，以下節錄佢哋嘅對白：
「今日返工做BD一流，個客肯定聽到你電話，同埋佢哋今日心情唔係咁好，係一個好好嘅切入點。就算今日返嚟冇嘢做，都要打100個電話做Business Developmemt開客。」
「今日可以打俾啲客約Client Meeting，順便將我哋公司嘅2020月曆送俾佢哋。冇數都要夠KPI，如果唔係我好難同總部交代，Q3已經好差。」
「今日唔可以Home Office，公司成個Q3都唔夠數，嚟緊Q4會更加差，唔該你哋好好返嚟跑數。」
「冇地鐵？行去碼頭搭船啦。今日公司唔可以冇人，鎖匙喺你度。」
「可唔可以夾個Can去見工？你依家去個Candidate屋企樓下接佢，一定要佢今日見工！因為今日係Final Interview，張單成10幾萬！我哋Team今個月投靠呢張單！」
你話吖，返工返到咁有咩意思？
一路我都唔知道自己出嚟開公司係咪正確，但係聽到今日呢啲咁荒謬嘅事，令到我更加堅定。
有一位讀者同我講過幾句說話，令我印象深刻，我希望可以勉勵各位仲係十五十六唔知道點樣炒自己老闆嘅讀者。
「如果手上沒有任何籌碼，那多數時候只能任人開價，但我建議大家真的不要一直過這種生活。如果現在你的時間不值錢，一定要更堅定地把時間投入在能創造未來價值的事情上，比如學習，唯有如此，你才可能擺脫現況，愈來愈好。」
我想加多一句：我哋而家先唔好提反抗或者推翻暴政，如果連自己嘅人生都唔可以掌控，勇敢踏出自己嘅Comfort Zone，搵一個適合自己嘅工作，或者一個體諒自己嘅老闆，我哋點樣行再多一步？你一世都唔會開心。
希望你睇完呢篇文章之後可以好好反思一下，想買我本工具書睇吓點樣幫你見工同埋寫履歷表或者同我做Career Coaching，歡迎PM。
工作無咗咪搵過第二份囉，良知無咗就......
May the force be with you.
#全職獵人久保 #fulltimeheadhunter #careercoaching
