Search
自從一年前發現自己成為長期病患者之後，我每一日都真係好努力咁做好自己，希望自己唔好倒下。現在啱啱確診一年，而我的指數亦終於回復正常。
這一年亦令我除了經歷自己對病患的心情猶如過山車般「驚險」之外，亦看清了很多人生百態。的確唔係每個人都有責任去take care你自己的健康及心情，因為人生係自己嘅。所以亦令我開始不敢去依賴任何一個人，因為太了解人心的善變，誓言的虛假，以至於只相信這世上只有自己才是最值得被依賴的人。
所以如果有一日，我突然之間有一個好大的決定及轉變，請不要問為什麼。因為人生去到唔同的階段總會有不同的轉捩點才會成長。成日下下諗人哋，點解唔可以搵次諗自己？
做女人，有d 決定係要學會瀟灑😃
#betterme  #betterlife
#其實照顧病患者的人亦同樣也是病患者都有心理壓力
#因為這是一個雙重壓力
#上天自有安排
#每個病人都只會諗自己
#請關注照顧者的感受及心理

「啲人成日都話牙齒健康，但你無見到係話脊骨健康。」入行四十多年的脊醫吳澍仁，雖然已經退休約十年，但今天仍會在診所義診，也會到社區中心進行義務講座，宣揚脊骨健康的訊息，除了是因為對自己服務大半生的專業有所不捨外，也是感嘆香港市民多年來對脊骨健康的意識都不足。
跟生活息息相關 決心諗脊醫
回想四十多年前，年輕的吳澍仁選擇赴英讀脊醫，他坦言一開始對行業並不是十分了解，只知道脊醫是奉行不用吃藥及不用做手術的治療方法。但他覺得脊骨跟生活習慣息息相關，而且當年香港普遍的醫學水平不算高，這都驅使他決心讀脊醫：「四十幾年前大部分都係西醫嚟，西醫睇唔好就基本上唔會好。」
讀脊醫期間，在一次與同學練習中，他被誤傷頸部，頭痛得徹夜難眠，卻被老師一下手勢就治好，令他更領會到脊醫的重要性，也更體會到病人的感受。
香港脊醫第四人 至今只增至二百人
在英國畢業後，吳醫生回港執業，當時是香港第四名脊醫，但即使在今天，香港亦只有約二百名脊醫，卻要為七百五十萬港人服務，等於一位脊醫便要服務三萬七千港人，脊醫不足的嚴重程度可想而知：「以香港嘅人口規模，應該要有二千幾個脊醫先叫合適，依家係少咗十倍。」吳醫生苦口婆心地說。
港人脊骨健康意識差
吳醫生指香港人對健康意識不足，對脊骨健康意識更差，「只係擔心病，有病先睇醫生。好多人都以為睇脊醫只係睇腰骨痛，有啲膝痛、腳痛都唔知要睇，頭暈就更加唔知道(要睇醫生)。」他解釋指，因為頸部有很多神經及血管，如果有骨移位就會壓着血管，血管收窄減少血液流到腦部便會引致頭暈。
除了脊骨健康意識不足之外，吳醫生認為香港人的生活習慣，也令脊骨不健康，「大部分我哋見到嘅，我諗七、八成都係因為坐得唔好，因為對住電腦好難坐得好，同埋我又見到公共交通工具啲座位其實(設計)又唔好，坐得耐會腰骨痛。」
政府和大眾不重視 推廣有難度
有見及此，吳醫生多年來都到處去舉辦講座，希望透過教育令公眾認識脊骨健康，但他坦言是很困難：「首先要學點樣坐，但係好難，因為小朋友無症狀，叫極坐好佢都唔會聽，通常有症狀已經四、五十歲，到時先改姿勢係好難改。」
他也批評政府不重視脊醫這門專業，例如現時公立醫院一個脊醫都沒有，各間大學亦沒有跟脊醫相關的課程。吳醫生指相比起西醫，脊醫發展更被諸多限制：「雖然我哋係註冊咗，但我哋其實唔可以轉介病人去醫院，又唔可以出假紙。」
成立基金 助學生赴英讀脊醫
眼見行業不被重視、得不到發展，深感培訓本地脊醫是刻不容緩，不可以再消極等待，所以吳醫生雖然已經退休接近十年，仍努力推動業界發展。他在2012年更成立了「香港脊骨神經科醫學院基金」，長遠希望在香港設立一間脊醫學院。
此外，基金會在五年前開始，全額資助本地有潛質的學生，到英國修讀為期四至五年的脊醫課程，至今已有五人受惠：「我哋只要求佢哋畢業後返香港行醫，因為係香港人捐錢畀佢哋讀書，呢度需要佢哋。」
寄語學生：醫德高於一切
學得醫術固然重要，吳醫生更想學子有醫德，「德行就係話有同理心，係要感受到病人點樣，有啲病人是無咩錢，負擔唔起治療，但如果你可以減收或者體諒，佢哋會好欣賞。」
今集《港。故》用7分鐘，讓大家認識脊醫這個專業，以及一位護脊仁醫的行醫哲學。
-------------
《港。故》：東網每周專題習作，講故事、講香港人的故事。
Fb：http://bit.ly/oncckonggu_Fb
IG：http://bit.ly/oncckonggu_IG
Youtube：http://bit.ly/oncckonggu_Youtube
「喺一個人最需要你嘅時候，你可以伸出援手去幫佢，你唔只係幫到個病人，亦幫到佢屋企人，我覺得係好有意義。」這就是護理系學生葉嘉茵不惜半工讀來追尋護士夢的原因。她現於香港理工大學護理系就讀二年級，但原來其升學之路一點都不簡單。
前路茫茫 毅然退學
嘉茵在中五會考考獲19分，順利升讀中六，但與很多青少年一樣，她當時未有認真規劃自己的前路，亦「唔知讀咩好」。而當時兼職補習導師的她，覺得替小學生補習很有滿足感，更打算以此作為日後的職業，於是她讀了數個月中六便毅然退學。
服務長者 萌生使命感
機緣巧合下，嘉茵報讀了一個保健員文憑課程，並開始在老人院舍擔任保健員。雖然在院舍的工作不容易，亦時常會接觸到污穢物，但她在工作中卻發現自己很享受與長者溝通。
而一次生死無常的經歷，令她發現她想做的遠遠不只是替長者洗澡、餵食。「嗰次係我第一次摸人哋手腕橈動脈呢個位，佢(婆婆)係冇咗脈搏、停頓咗。」那是嘉茵在院舍工作沒多久後發生的事，她親眼目睹一位女院友被葡萄噎死。「冇諗過一個人、一個生命係咁脆弱，轉眼間就消失。」如此震撼的經歷令嘉茵明白生命的脆弱，她希望做更多事、幫更多人，於是萌生想當護士的念頭。
報讀護士學校 三度遭拒
意識到自己的護士夢後，嘉茵隨即着手報讀本地護士學校，惟所報讀的三所學校均將她拒諸門外，最後一次的面試更是歷歷在目，「唔係因為你資歷有問題，係因為我哋好少會收年紀較大嘅學生。」對嘉茵來說，面試官的這番話無疑是沉重的打擊：「好似有啲嘢係改變唔到，注定失敗，因為年齡係冇得改變。」
幸好嘉茵沒因此而否定自己，反而更積極找其他方法實現夢想。最後她選擇報讀夜校，備戰一年半後的中學文憑試(DSE)。
半工讀備戰文憑試
「好難，例如之前未讀過通識科，次次做卷都唔夠時間。」時隔多年重拾書本，嘉茵坦言初時曾感吃力。但身為半工讀生，她面對的困難又豈止如此？每天五時半起床，在院舍工作十一小時後，便要趕到夜校上三小時的課，「有時一日瞓得三、四個鐘。如果臨近考試，假期都冇得補眠，唔好諗住可以瞓七、八個鐘。」除此之外，為節省吹頭髮的時間，嘉茵甚至將一把心愛的長髮剪去。
半工讀生活充滿壓力，令嘉茵時常想放棄：「真係好攰、好辛苦，試過溫溫吓書趴喺張枱度瞓。」但她明白自己沒有更多歲月可以蹉跎，萬一這次DSE失手，就要多等一年，失去的東西可能會更多。因此她認為少少犧牲是在所難免。「如果你依家問我，我諗我都未必做到。」嘉茵笑言。
不要讓挫敗使你迷路
最後嘉茵於2017年的DSE考獲最佳五科成績24分，順利入讀心儀已久的理工大學護理系。她現在十分享受大學生活，畢業後更打算進醫管局工作。由當初的前路茫茫，到現時目標清晰，一路走來確不容易。
與大多數同系同學相比，嘉茵的升學之路迂迴得多，身為過來人的她深明追夢真諦：「追夢係一個過程，過程中你可能需要犧牲好多嘢，失敗好多次。」在成功前，追夢者往往會面對他人的打擊及自身的否定，嘉茵則鼓勵他們要勇敢，不要輕言放棄：「冇人一生出嚟就成功，我認為磨練一下，反而可能令你愈戰愈強。」
她又分享，堅持的另一關鍵是要認清目標，知道自己每天為何事而爭取，因為「意義」對於一個人來說極其重要，「要清楚自己需要啲咩，唔好畀挫敗令你蕩失路。」
今集《港。故》用7分半鐘，向大家訴說一個「高齡」護士系女生，為追夢而不惜半工讀的奮鬥故事。
-------------
《港。故》：東網每周專題習作，講故事、講香港人的故事。
Fb：http://bit.ly/oncckonggu_Fb
IG：http://bit.ly/oncckonggu_IG
Youtube：http://bit.ly/oncckonggu_Youtube
「清明時節雨紛紛，路上行人欲斷魂。借問酒家何處有？牧童遙指杏花村」，唐代詩人杜牧的《清明》一詩家傳戶曉，在剛過去的清明節，你也有親歷類似情景嗎？
「呢啲無依靠嘅人，佢哋多數都會話撒灰，因為佢哋覺得做咗墓碑，根本都唔會有人去獻花或者拜祭。」退休護士徐玉英(Joyce)，道出了香港一些孤寡老人的心結與悲哀。
關愛最有需要的老人
Joyce曾經在公立醫院服務接近三十年，接觸過無數老弱病人，深深體會他們患病後身體及心靈需要。醫療界出身的她，於是在十年前創立「關愛病患基金會」，專為那些又有病、又年老、又沒錢的一群提供服務：「我發動一啲退休護士、義工，或者係受訓嘅陪診員，上去呢啲老人家屋企，抄低佢所有覆診日期，然後搵義工打電話提佢，如果佢再有需要，我就去搵陪診員。」
陪伴孤寡老人 走人生最後一里路
除了關顧孤寡老人的日常醫療需要，Joyce亦會陪伴他們「迎接死亡」：「我一直陪住佢哋，嚟解決佢哋心靈上面嗰個枯乾、缺乏或者驚恐，咁佢唔使再擔心。無論佢信咩宗教或者民間概念，覺得有靈魂好冇靈魂都好，全部我都會幫佢哋安葬好。我會提醒佢哋『你赤身嚟到呢個世界，你就赤身走』，唔好帶住任何事情，一定要死得安樂。」
長者的心靈需要
曾參與醫院院牧工作，令Joyce更明白病人的心靈需要，服務過的對象包括至親：「我爸爸因為癌病，2009年過身，當時佢都90歲。佢係好傳統嘅中國男人，話死都唔入醫院。咁我哋開咗家庭會議後，就決定畀佢喺屋企去到最後嗰分鐘。我就每日返工前，同佢傾下偈，佢嘅心靈狀態就好舒緩，最後佢好安樂咁走咗。」
Joyce認為今日的香港社工界、醫療界都開始注重心靈關懷，但礙於沒有很清晰的運作模式，怎樣有系統地向了解獨居長者的心靈需要？問題似乎仍有待解決。
資源有限 幫得一個得一個
雖然Joyce所帶領的志願組織規模不大，能夠服務的對象亦不多，但她秉持「幫得一個得一個」信念。凡是接觸到的，又或是其他慈善機構、社工轉介給她的，她都會盡量幫：「我開咗呢個服務之後，一嚟我唔收費，二嚟我咩『奇難雜症』都接，咁社工知道之後都會搵我。」
Joyce在鏡頭前分享了其中一個「奇難雜症」：一個是差不多八成失明的婆婆，她相依為命的丈夫在醫院彌留，醫生表示伯伯只剩一、兩天時間。當時婆婆很想去看丈夫，於是醫院的社工向Joyce求助：「我話當然可以，幾艱難都做，搵唔到義工，我自己都會嚟。婆婆探完伯伯後，伯伯第二日就離世了。」
Joyce隨後亦幫婆婆處理好丈夫的殮葬，而由於婆婆視力不好，Joyce和社工更一人一日去買飯給她，又幫婆婆安排做白內障手術和入住老人院舍：「婆婆做完手術，喺院舍生活得好開心，咁我哋先完結呢個個案。」
最有價值的人生
基金會新的「身心靈護理及痛症舒緩中心」5月將會投入運作。Joyce希望可以發展更多形式的病人服務，以及找到合適的接棒人：「我係未結婚嘅，從來都冇結過婚，我嘅時間就真係好充裕。我覺得將自己嘅心力，全部放喺又有病、又年老、又冇錢嘅一群，其實已經好足夠。我覺得係我最大嘅滿足、最有價值，此生都不枉過。」Joyce滿足地笑着說。
今集《港。故》用7分鐘，向大家訴說一個花盡精力與心力，遊走於生死之間的白衣天使故事。
-------------
《港。故》：東網每周專題習作，講故事、講香港人的故事。
FB：http://bit.ly/oncckonggu_FB
IG：http://bit.ly/oncckonggu_IG
Youtube：http://bit.ly/oncckonggu_Youtube
