深夜無人睇，靜靜雞講個故仔…
《忘 / 記》
前日出書，好多讀者都透過Payme方式向我付款，大部份都要我whatsapp確認付款，喺我確認時侯，我都會順便同讀者傾幾句，互相交流同答謝佢地。
直到有一位熟悉嘅名字出現喺我whatsapp list，佢叫阿靜，估唔到十幾年無見，如今佢竟然同我買書。阿靜佢都感到驚訝，同時表現得好興奮。
「嘩，原來你就係孔明呀？嘩嘩，好開心呀！」雖然阿靜用文字表達，但我深深感受到佢係真心興奮，我亦都沾沾自喜，內心暗爽。
我記得當年中學讀緊中五時侯，一直同佢曖味，雖然我為佢付出咗好多，但最後佢無接受到我，而會考完後，大家各自升上唔同嘅中學，自此就無再聯絡。
同佢對話之間，我地決定咗唔洗寄書了，直接約出嚟交收，順便當聚下舊。於是交收當日，我執到自己型型仔仔，腦海充滿期待，因為中學時期嘅阿靜係非常吸引，頭髮長長，皮膚雪白，條裙唔短又唔長，當年好多同學仔都追佢，但佢都無咩興趣，反而佢選擇咗同我曖味，雖然最後無一齊到，但大過咗諗起返呢啲往事，又覺得幾值得回味。
我地相約咗一間cafe見面，我點咗杯咖啡嘆下，然後一臉期待。
「Hello，係咪孔明呀？」突然一把陌生但又熟悉嘅聲音出現。
我抬頭一望，只見到一個頭髮有點散亂，而且髮質非常乾，身型肥胖嘅肥師奶。佢見到我後除低口罩，更加見到佢臉上充滿面油，一副素顏嘅樣就咁活現喺我面前。
「你係……？」我驚訝地問。
「我呀，阿靜呀！哈哈，咁多年無見，係咪唔記得咗我呀？」阿靜興奮地坐低。
唔係麻，阿靜？我同你都係三十歲出頭，攪咩變成一個肥師奶咁，我仲見到佢拎住一條廁紙同幾袋餸。
阿靜見到我咁，於是笑說：「我見疫情愈嚟愈勁，咪買多啲補給一下，你都要買呀！」
我苦笑地回應：「係……」我顯然有啲失望。
阿靜亦主動打開話題，興奮地說：「係呢，我真係好鐘意你寫嘅故仔，特別係失蹤呀！入結界真係好恐怖！估唔到我鐘意嘅作者係你！知唔知我琴晚開心到大叫！」
「多謝……我都估唔到我地咁多年都無轉電話號碼。」
阿靜續說：「喂喂，其實有樣嘢一直都好想問你，其實你信唔信有鬼？」
「信呀，如果唔信嘅話，我點會寫到咁多鬼故。」
阿靜聽完後，面露歡顏地說：「咁就好喇，我同好多人講，好多人都唔信。」
「你見過鬼咩？」
阿靜搖搖頭，然後說：「無，但我感覺得到。」
「感覺到？」
「其實我以前唔睇鬼故，直到我老公死咗，我覺得我老公仍然喺我身邊，所以我先迷上咗鬼故，特別係你嘅故仔。」原來阿靜結咗婚，但可惜嘅係老公唔喺到。
「你點解覺得你老公仲喺你身邊？」我好奇地問。
「兩年前我老公因為急病而死，留低咗我同個仔，雖然好多人話我年紀仲細，可以再婚，但我實在做唔到，我仍然好愛我老公，我亦都感覺到佢一直存在喺我生活入面。」
「例如？」
「例如……有次我放工太累，一直都無咩精神，點知過馬路時，有架的士迎面撞埋嚟，突然間有人捉住我隻手將我拉返後避開架的士。亦都有一次……個仔喊得好勁，𠴱一晚我完全崩潰失控，我實在頂唔順壓力，於是我抱住個仔打開窗，好想同個仔攬住一齊跳樓去死咗佢，但突然間，個仔無再喊，對住空氣笑，手仔郁郁咁。我見到咁，我就知道老公喺到，佢唔想我地走，我𠴱刻崩潰咁喊住大叫：『我好掛住你呀……』。」
我一路聽，腦海一路都有畫面，覺得阿靜承受太多生活上壓力，細細粒嘅佢一直堅持到呢刻，我真心感到佩服。
阿靜講到眼濕濕，然後拎包紙巾整理下，然後深深吸一口氣冷靜一下。
望住佢呢種舉動，我就知道，阿靜應該好耐無同人訴過苦，或許獨自湊住個仔又要返工，一定無時間見返朋友，亦都無空間同對象去表達自己內心感受，又難怪佢見到我咁興奮，或多或少都想有個人聽佢嘅故事。
「當年我結婚時侯，好多人都反對我地，因為老公身體不嬲都唔好，我地好辛苦先排除萬難結到婚，但估唔到個天要玩我地，兩年後佢就急病死咗。佢嘅家人一直都覺得我係剋死咗佢個仔，好憎見到我，連個孫都唔理，由我自生自滅。而我屋企人亦覺得我今時今日攪到咁係抵死，明知老公身體咁差都要結婚……亦唔再認我係佢地個女，所以我已經一直都係自己一個撐住。」阿靜一路講一路喊，令到我感到心酸。
阿靜之後含著淚笑著說：「好再我老公一直都喺我身邊默默支持我，我每晚都感覺到佢坐我床邊一直陪住我，如果唔係，我一早就同個仔自殺。」
我聽後不禁嘆了一口氣，我自問當年追佢嘅時侯應該比唔到呢種「愛」佢，佢唔選擇我，應該係正確。
阿靜見到我個樣有點沉重，然後說：「sorry！咁耐無見就同你講呢啲嘢……本身我仲期待你可以見到鬼嘅話，可以幫我睇下我老公喺唔喺到……因為……因為我真係好掛住佢。」
我吞一吞口水，然後搖搖頭說：「對唔住，我……真係睇唔到。」我一下子將個殘酷現實講佢知。
佢呆呆望住我，沉默數秒後，再苦笑地回應：「唔緊要，哈……係喇，寫故姐，又點會見到鬼。我真係傻，好喇，我都唔阻你咁耐，你岩岩出書一定好多嘢處理，我都要返去接返個仔，呢家都係斴居幫手湊住先。」
我將本簽名新書比佢，然後佢一臉珍重咁望住本書，摸咗幾下笑說：「多謝你。」
「我多謝你支持就真。」我真心地說。
「你要加油寫多啲故仔比我地睇呀。」說罷，阿靜就準備動身離開。
我望住佢慢慢戴返口罩，雖然可以遮掩佢嘅憂鬱臉容，但都遮掩唔到佢雙眼喊得紅腫。佢拎起幾袋餸同一條廁紙，然後帶住失落嘅身驅離去，我望住佢背影，更覺猶憐。
返屋企期間，我腦海一直諗起呢件事，我喺到諗究竟佢老公係咪真係喺到，定係佢太掛住佢老公，所以幻想佢老公仍然存在？
為咗唔想阿靜獨力一人面對生活困難，所以我即興攪咗個中學聚會，希望聚返大家比多啲鼓勵同支持比阿靜，所以一齊去佢屋企玩。
但好多人對於阿靜無咩興趣，始終大家太耐無聯絡，肯去嘅人都係得少數。為咗唔想比阿靜知道，我就借啲意話疫情下，好多人都唔想出嚟。
我地一路食飯時，阿言偷偷地同我講：「嘩，十幾年無見佢，肥到咁撚樣，你有冇後悔追過佢？」
我嬲嬲地回應：「你咪撚笑人喇，人地好撚慘呀！」
可能太耐無聯絡，大家食飯傾計都尷尷尬尬，特別係阿靜分享佢嘅經歷時侯，大家聽完不但無為佢嘅經歷感到同情，反而覺得成件事好恐怖，紛紛借啲意想走，仲暗地覆whatsapp同我講，話間屋好唔舒服，又話阿靜係咪痴咗線，仲話好恐怖……
我好嬲，但又感到無奈。本身阿靜準備咗水果比我地食，但如今只剩返我同佢。
「今晚多謝你，雖然大家好似唔太熟，但至少今晚我好開心，起碼間屋未試過咁多人。」阿靜說。
我苦笑地望住佢，實在唔知點回應。
「當年雖然我地無一齊到，但我一直都對你好大好感，曾經我有好多次想搵你，但又覺得你又無必要理我，更何況……我呢家變成一個肥師奶，毫無吸引力，你仲點會理我，所以一直都無搵你。」阿靜邊切水果邊說。
我沉默著，當年阿靜除咗樣貌吸引到我之外，其實佢心地同性格都好好，估唔到一個咁好嘅女仔遭遇到呢啲不幸經歷。
突然，我背後一陣寒意，我即刻轉身一望，發覺咩都無，做咩突然咁寒？
「做咩事？」阿靜問。
「無嘢，係喇，我都夠鐘返工，下次再嚟探你。」說罷，我就執嘢離開。
因為我返夜班關係，所以食完飯我就去咗返工。我喺屯門醫院到做it，呢一晚上司叫我同班同事去某層病房整一整網絡，本身都無咩特別，但一踏入呢層病房，就覺得有啲渾身唔自在。
呢層病房一直無咩人用，無任何病人，亦無任何護士醫生喺到。
「阿明你去Room B、kevin就去Room A、軒就去Room C、其他就去大房等。」上司阿傑喺走廊前分配工作。
而佢就負責喺走廊做嘢，我同其他同事之後就分別入唔同嘅病房到做嘢。
我一入到病房門口，望望門牌，寫住Room B，之後就入去做嘢。我發現入面燈係開唔著，冷氣又無，十幾張吉床擺哂喺到無人瞓都幾恐怖。我做做下嘢發覺雖然無冷氣，但我完全唔覺得熱，仲有啲寒，我仲好奇周圍望下吹風位喺邊到出。
做咗一陣，我拎住walkie問下阿傑收唔收到我個網絡，但點知walkie一直沙沙聲，仲有啲金屬刺耳巳嘅聲音。
於是我就對住走廊方向大叫：「喂！阿傑！睇下網絡得唔得！」
「……」但無任何回應。
我就動身走出病房，望一望走廊，發現唔見咗阿傑，心諗佢去咗邊？
於是我就行去另外一間病房Room A 搵下同事借walkie問，當我走入漆黑一片嘅病房時，冷風突然迎臉吹來，令我個人凍到震咗震，我企喺門邊大叫：「喂，見唔見到阿傑呀？」
「……」照舊無任何回應。
但我見到病房最深處嘅廁所著咗燈，仲聽到水聲。我就鬆一口氣，原來條友去咗廁所，於是我就去廁所門前敲一敲地問：「喂，睇下阿傑去咗邊，我要佢check check個network呀。」
當我問完，水聲突然停止。但門內完全無任何動靜。
我再敲：「快撚啲喇！屙完未呀？」
「……」照舊無任何回應。
我燥燥地就打開道門，一開之下即刻嚇到呆咗，門後根本無人，咁邊個頭先開水喉？仲有成班同事去咗邊？
我心知不妙，嚇到腳都軟埋，成身震哂，即刻轉身急步走返出去走廊，一直向住升降機方向行，沿路間我有望其他病房，一個同事都見唔到。我走到升降機位置時，發覺按極都無任何反應，心諗大撚獲，唔係真係撞邪呀？
突然，走廊遠處傳來幾把令人深寒嘅笑聲，係一班小朋友嘅笑聲，好似作弄完我而感到滿足嘅笑聲。我呆呆望住聲音來源嘅方向時侯，我見到某間病房突然碌咗個足球出嚟，心諗做咩有個足球喺到？
我呆呆望住個足球，然後驚見病房門邊伸出一隻手出嚟想拎個波。
我嚇到即刻向另一個方向走，亦感覺到後面有班細路笑住咁跑出嚟追我，正當我感到無助之際，有個男人唔知由邊度走出嚟，佢講咗一句：「跟我行！」
我諗都無諗就跟住佢，望住佢背後，我覺得有啲熟口熟面。
後來佢將我帶到一間病房，然後同我講：「多謝你一直幫我老婆，我其實一定要走，但……我實在唔放心佢地兩母子，所以一直走唔到。呢家你出現，我好希望你可以好好照顧佢地。」
我諗咗一陣，先意識到佢就係阿靜死咗嘅老公。
最後，佢比咗一封信我，我接過後，再望一望佢，發現佢已經唔喺到。
突然走廊外阿傑大叫：「攪掂未呀？」
我轉身探頭一望，原來阿傑同成班同事喺到等緊我，我望一望病房門牌，寫住Room B，我一直都喺房入面無走到出去？
我問返佢地岩岩發生咩事，佢地話無事發生，仲問我做咩出哂冷汗咁。
我將成件事講比佢地聽，佢地都聽到心寒，於是急急腳一齊走。
事後我搵返阿靜，將呢封信比佢，佢接過封信後，眼淚即刻忍唔住湧出嚟，原來封信係佢老公當年追佢時侯寫嘅，後來阿靜都燒哂佢嘅遺物比佢，包括封信。所以我一拎出嚟，阿靜就知件事係真。
我安慰地說：「你唔洗再咁掛住佢，因為你嘅掛住，令到佢走唔到，所以你要好好放低佢，等佢可以安心咁離開。」
阿靜搖搖頭喊著說：「做唔到……真係做唔到……我好掛住佢……好掛住……你知唔知我真係好鐘意佢，每次我朝早瞓醒，我都好想我係發緊夢，好想瞓喺我隔離係我老公……你知唔知我好孤獨，我做唔到……」
我見到佢咁，都忍唔住眼濕濕，雖然我未感受過親人離逝，但我想像得到如果至親嘅人離開我，我會有幾傷心……
事隔一晚後，阿靜send左個whatsapp比我
“睇完封信，我諗咗成晚，我會好好放低佢，重新過返我嘅生活 “
雖然我唔知封信寫咗咩，但我聽到阿靜咁講，我都感到安慰。
同時間，我喺到諗，人死咗之後，究竟係想我地掛住佢，定係忘記佢呢？
《完》
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
已經一年無寫過故仔比大家睇
呢幾日得到好多讀者買書同鼓勵說話，叫我快啲復出寫返故仔先吸引到多啲人買書
所以今日就用咗三個鐘寫咗呢個故事
雖然一年無寫故，手感同狀態仍然回復當中，希望大家唔好介意，比啲時間我回復水平。
記得比個Like留個言支持下我！比啲信心我…
另外，新書《迷蹤》有得買，請大家多多支持我呀 ＝[
購買網店：https://homingming.boutir.com/
入去慢慢揀 （其實得兩本） 自己收藏又好，送禮又好，記得多多支持我孔明 ＝」
《失蹤》、《跟蹤》、《迷蹤》，等你集齊同我一齊進入結界。
（所有野都係我一手一腳去攪，所以處理訂單時會比較耐，請大家體諒！o！“）
仲有大家記得ig follow返我 ＝[ 得好少人follow
https://www.instagram.com/homing0624/
