#切爾諾武漢
#沙士算好彩
1. 《Spillover》一書專講過去幾十年間嘅重大瘟疫。當然其中一章，係關於03年SARS。
2. 作者問，經過SARS一役，專家得出啲咩總結？
3. 勢估唔到，其中一個結論，係”humankind had a lucky escape.” 經歷過沙士嘅香港人，正常反應係：吓？
4. 有咁嘅結論，係因為以SARS咁惡嘅病毒嚟講，埋單8000人感染，774人死亡，而唔係7,000,000，喺傳染病學角度，其實執返身彩。
5. 結果「只」係outbreak，而冇變 global pandemic，有兩大原因。
6. 第一，頭幾個中招城市，包括香港、新加坡、河內、多倫多，都係一級醫療設備嘅城市，政府反應算係迅速。
7. 第二，更重要嘅係，係 #徵狀同散播嘅先後次序。
8. 一般流感，係患者首先變得高傳染性，然後先至會有病徵。
9. 但咁啱，SARS係倒返轉。病人先係有明顯徵狀，然後至會傳播。所以容易及早發現同送去醫院，亦都解釋到，點解通常醫護人員係第一波被傳染嘅對象。
10. 咁即係，專家最擔心嘅 #NextBigOne，特性好可能係：
11. 第一，先喺啲疫情管控差嘅地方爆發，例如當地政府慣性隱瞞、死拖、或者 #為咗奶共不惜與民為敵，抗疫下下特登慢半拍嘅城市。
12. 第二，隻病毒令患者先傳播後病徵，或者病徵唔係好明顯，發現時早已經散播開去。有報道指，武漢肺炎，傳播比病徵早，可以早出兩星期。
13. 如果兩樣加埋，就冇SARS嗰次咁「好彩」。
《Spillover: Animal Infections and the Next Human Pandemic》by David Quammen
