都係一樣，文字有價，鍾意就入 Medium 睇。唔鍾意嘅，自己碌落下睇晒成篇，都得。
- - -
上日篇《要爭口氣，你不要死》出咗之後，幾位相熟嘅文友與讀者都有反響，主要都係話，大家鼓其 103 萬人遊行嘅餘勇，知其不可為而為之，賴叔你呢隻塘邊鶴就咪鬼喺度潑冷水啦。
為此，我係有少少唔開心，咗一陣，或者半晚嘅。
今日我再收到另一個讀者嘅回應，意思係，我嘅睇法適用於嗰啲事業上咗軌道，或者直接啲講，係 have something to lose 嘅朋友。輸唔起，當然就要珍惜羽毛啦。
咁我諗諗下，都係。一方面，賴叔年紀都唔細，本身都有家累，學 Latrell Sprewell 話齋 “I need to feed my family.” 我好難話冒住畀慈母拘捕嘅風險而走得太前。而當我自己做唔出嘅時候，我都唔係叫其他人咁做，因為咁樣太偽善，太不負責任。
另一方面， which is 更加深層次嘅，係我真心地覺得，心理上輸唔起，就唔該控制好注碼。 2014 同 2016 嘅經歷，已經令賴叔戒咗評論時政，分拆置地記者呢個牌頭上市。專心講返工同財金嘢，如此很好。咁。就好似賴叔平時入戲院睇戲，都係坐最尾嗰排嘅角落頭咁，遠離人群，冷眼旁觀，然後毫不客氣咁一語道破，即使唔啱聽都好。
但係，曾經滄海難為水，識得 “Apolitical” 呢個字嘅人，九成係關心政治嘅人，真係唔識或討厭政治嘅，鬼會話自己 Apolitical 。而當五年前，我只曾路過佔領區而冇留下紮營或者睇書嘅時候；五年後，當辦公室同佔領區近在咫尺嘅時候，我終於腳踏實地，親歷其境。算係出一分力，亦都希望係自我救贖。
六月十二日嘅日與夜，我都先後走入人群。香港嘅夏天好仆街，仆街在間中有驟雨，然後出太陽，蒸返熱晒啲水氣，喺路面嘅大家就好似條石斑咁被清蒸，出晒汗，差條蔥 (衝？) 同一嚿薑 (唔夠薑？) 就可以上碟淋鼓油 (臨自由？)
雖則話冇圖冇真相，但係大家原諒我唔貼相啦。無謂累咗當日任何一位在場參與或者咁啱路過嘅朋友。但係喺夏慤道天橋上下，當大家啱啱佔領街頭，要開始 set 路障、物資區同分發資源嘅時候，嗰種主動、自發，係令人打從心底裡感動嘅。亦剛好大巴大巴煎落去茶餐廳阿伯嗰啲咩「後生仔受指使同控操，一車一車咁去佔領」嘅謬論。
我食完晏喺海富中心外面企咗陣，幾年前嘅畫面盡入眼底，而今次並冇邊個民主派明星或者佔中三子去牽頭、策劃、指揮。你可以話大家有五年前嘅經驗，好多嘢可以自動波，亦可以話，當動機純正嘅時候，行事、組織自然有條有理。佔領區不時傳出歡呼或拍掌聲，可能係畀幫手堵路嘅司機大佬，可能係慶祝整好另一個鐵馬路障，咩都好，都令人感動。唔係話「畀啲掌聲自己」可以媲美。
晏晝返到公司，新聞話警方採取誘敵之計，先退後進，然後用催淚彈、散彈同橡彈子彈去驅散示威者，仲殺得性起去追到去商場門口。你要明白，呢個下晝我嘅工作效率係零。諗到嗰班學生，手無寸鐵 (okay 你話拎住把遮有遮骨係金屬就冇得好講) ，賴叔嘅心情越嚟越沉重。
但殘酷嘅係，敝機構內過半員工都係大陸人，佢哋唔知，亦唔明發生緊咩事，淨係話有人用車輛阻塞交通，示威者衝咗出馬路，警察施放催淚彈平亂咁。聽到佢哋仲喺度嘻嘻哈哈，我只可以望住幾個冇射波嘅本地同事，一同苦笑。
夜幕低垂，賴叔又一次行去佔領區聲援。經過某銀行門外，示威者嘅物資小隊似乎準備撤退，安排緊物資嘅去向同儲存。聽得出佢哋嘅焦慮，或者因為警方進入專上學院搜查卦？我心諗，我有車呀，可以幫你哋呀。但係我冇出聲。
喺畢打街同德輔道中嘅交界，一架雙層巴士逆線泊咗喺路中心。再前少少，有架貨車同私家車泊咗喺燈位，大家都係為撤走物資而努力。當時仲未傳出警察幾點清場，但係大家 somehow 都已經事前做好準備，不致於大軍壓境就被殺個措手不及。
黑夜之中嘅干諾道中，非常熱鬧。唔需要大台大合唱「今天我」去暖場，亦毋須糾察隊維持秩序，大家都自動分工，自動入戲。戴頭盔 full gear 嘅自己企去最前線，放工嚟聲援嘅白領一族自己上停車場或者路邊佇候。有兩個老外坐喺天台，睇住自己釘裝嘅 A4 size 書，學廣東話。
夏慤道天橋頂泊咗幾架警車喺樹，前面就有廿零卅個警察站崗，等夠鐘就出手清場。我始終冇留到最後，亦冇去到漫天烽火嘅金鐘道 (發夢都冇諗過可以咁寫) 。
望住每一位落手落腳搬運、身水身汗仍然企喺前哨、倦極喺路邊小睡頃刻嘅示威者，我係覺得抱歉嘅。
七百幾萬人嘅共業，由幾萬甚至幾千人去支撐，成功或失敗，大家都係 free-ride 咗佢哋嘅辛勞、血汗。我聽到公司有年輕同事一樣走得好前，日間甚至要冒住催淚彈撤退到商場入面，落荒而逃。喺香港呢個國際金融中心，和平示威都要遭受鐵腕打壓，我覺得唔合理。
我哋值得有更好嘅政府，真誠為市民服務嘅官員，真正除暴安良嘅警隊。奈何而家，我哋乜都冇。有能力嘅，選擇移民、嫁去外地、海外升學，總之走得就走。但係而家先至讀大學，或者出身冇耐嘅年輕人，其實冇咁多選項。
因為年輕人機會成本低，所以旨意佢哋衝嘅心態，或者並唔係大家嘅初衷。但係當大家以「我仔細老婆嫩」、「我老喇跑唔郁」、「我唔可以冇咗份工」等理由作為唔衝嘅藉口，然後旨望相反嘅族群，即係未有妻兒、年輕、工資微薄甚至只係在學嘅一群去飾演衝鋒敢死隊，大家咪就係間接地消費緊年青人對呢個城市嘅愛同熱誠囉。
如沒說，一生都虧欠。執筆之時，警方已經拘捕十幾人，包括最少四名港大學生，並且搜查港大宿舍。往後仍能上走街頭，能衝鋒嘅朋友，我不厭其煩再講，唔好死，要全身而退，要留有有用之軀。因為你永遠唔知道，前面有啲乜嘢機會、轉機等緊你。而呢個城市同埋城內嘅人，已經虧欠大家太多。
#賴叔睇育
