在日落前交換日記
星期一至五 5-6 叱咤903
阿檸 - 毒檸王國
---
7月12日
今日嘅日記係關於八字腳嘅煩惱。
（見圖係由細到大都八字腳嘅太一）
復康中嘅病檸：
自從早果排有同事係辦公室大大聲話我行路八字腳之後，有好多同事經過都特登望一望我隻腳，或者比個眼色我，提示我隻腳正在向外八。比大家咁樣不停提醒，令到我自己都開始擔心，會唔會第時我隻腳會承受唔到我嘅重量導致啲骨吖筋吖開始斷裂呢？每一日我都俾呢個問題纏繞，有意識嘅時候我會不停提醒自己將隻腳向內屈曲，點知另外嘅同事又話比我知，我向內屈曲對腳令腳掌望落去好似向返前嘅動作其實係更加奇怪，好似企鵝，又好似某啲古怪嘅舞步。所以，我打算去睇下骨醫，安撫下自己脆弱嘅心靈。
身體喺每個階段都總係會出一啲狀況令人異常擔心同埋惹起周圍嘅人關注，中二病嘅階段我塊面一夜之間生咗好多暗瘡，感覺只係敏感，但係都敏感咗成年先慢慢好，而家仲有少少戰績。嗰陣口沒遮攔嘅老師同同學會話過我塊面好似南瓜咁紅，我耿耿於懷，大佬，南瓜橙色架！又有一排，食完蝦蟹個身會敏感，成身一撻撻，要用溝咗鹽嘅茶抹身先會好似好啲咁，但係點得喎，我點可以放棄海鮮喎！我要戰勝自己嘅身體，所以之後我照食海鮮，心理學嚟講我估呢個方法叫flooding，不停咁令自己克服身體某啲狀況～ 最後真係俾我克服咗！
舊年，最擾亂我嘅人生嘅事就係患上咗類似肺癆或者百日咳嘅病，瘋狂咁咳，之後醫生就話呢個病係氣管敏感，瘋狂咁咳同窒息咁滯，試過唔同人胡亂介紹嘅坊間秘術，有人叫我試下煲橙食，有人叫我煲洋蔥水，全部都無用架！睇咗幾千蚊醫生，中醫西醫都試過，無任何作用，最後當我放棄所有嘅治療，我就無再咳啦！
所以話，呢個世界，命運真係好古怪，有時候你好努力刻意強求一啲嘢係唔會得到～當你放鬆落嚟，被擾亂嘅命運就會自自然然就番上軌道... ...所有嘢都係咁，或者，除咗八字腳。
文弱書生 Oscar
煲洋蔥水 在 【廚房妙方】神奇洋蔥水，一個小秘訣讓份量更加倍！ - 媽媽經 的推薦與評價
... <看更多>