《回應部分網友意見：點解芬尼成日咁負面？ 點解唔可以好好地教英文，好似成日出posts投訴/抱怨？》
1）我有檢視自己嘅posts嘅比例，我自問教學posts和個人posts和講負面嘢posts嘅比例算係好健康。我自問冇過度放負，其實要數，放負嘅posts應該連1/10個都冇，就算係講負面嘢，都會拉番去溝通/英文度。如果有人覺得「次次開fb都覺得我地投訴/抱怨」，我覺得應該係FB推post機制會導致你睇到好多負面posts，咁我冇辦法，但我唔希望將來因為咁而唔講負面嘢，因為以下原因：
2）喜形於色/願意分享不等於暴躁/成日嬲爆爆，我會分享正面嘢亦會分享負面嘢，其實痛苦同快樂都會幫我們學到嘢，有快樂有痛苦嘅分享先真實，痛苦嘢更加會幫好多人得到共鳴同埋啟發，發現佢地並唔孤獨。我唔希望網上形象同真實嘅我差距越黎越遠，咁樣唔健康，唔sustainable，會令我做嘢做得唔舒服。營運專頁同Youtube channel，照顧自己精神健康超重要，見過有好多case因為照顧唔好自己精神健康而最後要永久停產。
3）我地蚊型團隊唔希望服務唔體諒我們嘅客人，亦服務唔黎，所以數西客嘅不是，其實唔係淨係發洩咁簡單，都係希望啲唔體諒/唔識做嘅客人見到「我地其實唔會默默忍受」而自動退散，如果唔係我地會做得好辛苦。好多客人都好乖，呢個我地感恩。我地以前完全唔會講「西客」呢個話題，跟住西客真係越來越多，客服會頂唔順。
4）批評者總會被面對「點解你咁都要批評」嘅指責，喺呢個推崇正能量嘅社會，呢個喺必然。但我認為批評係醜人嘅工作，吃力而不討好，但必須，好多人，就算喺你身邊喺現實見到你做得唔好，都唔會bother去批評你，因為冇必要，我地批評咗，有人話我地「次次都抱怨」，我地覺得無悔，我地承受。
5）我想講，如果你想人地唔好唔開心，唔係叫人地「唔好唔開心」（好容易會有反效果），「以前好鐘意你，因為你教英文，但點解你你依家次次放負」，而係嘗試理解、同理，如果理解到，同理到，先畀實際嘅建議方案點樣可以開心啲（其實真實情況好難理解，生意背後運作點會一一向別人披露）
6）如果你鍾意我地正面嘅分享，多於負面嘅分享，多謝你，希望你可以給予我們比較實質嘅支持（例如like正面的posts和課金），而不是當我們有負面的posts就突然出黎comment話「次次都咁負面」。。。
7）我地都希望做多啲個人化嘅分享，希望大家鍾意睇我地，唔係淨係因為我地「會教英文」，唔係因為我係一部「教英文機器」，而係因為我都係一個人，我都有我嘅個性（我都希望慢慢展現，但有時覺得好煩，唔知到時會唔會有人話：點解你明明教英文，但你竟然有性格嘅？）
我唔會隨便歸類「講出意見嘅人」為hater，我只可以講，希望佢地只係唔理解我地專頁方針。講完喇，我相信大部分同學都明白、理解，如果唔明白、唔理解，我都已經努力講咗了。。。
如果你睇完以上，仍然覺得我太負面，我接受的，尊重你的，任何comment，只要非惡意謾罵，也不對其他人造成騷擾，我地都唔會delete，你可以轉台。
知道今日好多人都唔開心，希望大家可以好好照顧自己，有咩負面嘢唔使怕講出黎，屈住屈住對身體好唔好，我地同大家一齊努力。其實我睇頗多self-help同positivity有關嘅video同書，大家有興趣稍後可以同大家分享多啲。
