#在日落前交換日記
1213《龍操者》
消息流出，日本東映公司2019年會製作超級戰隊系列，第43部特攝作品，全名《騎士龍戰隊龍操者》，即係佢哋會喺劇中操條龍，又或者得到一條龍服務，佢哋會得到一條龍，為佢哋服務。冇get錯就係咁啦。繼恐龍戰隊、爆龍戰隊、獸電戰隊之後，已經係第四轉用恐龍來做主題嘅戰隊啦。
仲有啲咩可以用呢？行玩具店時就聽到班叔叔有咁嘅表示：「其實冇貨都好明顯㗎啦⋯⋯」，的確，主題嚟講，忍者啦、魔法呀、地球、太空、宇宙都有啦，剩係講以汽車為主題嘅系列，賽車、功能車、火車都用過啦，巴士的士就仲未，hold起佢先，唔排除下年就係；動物方面呢？百獸、超獸、如果計埋重甲戰隊，連昆蟲都用過啦，而昆蟲係唔屬於動物科嘅，用到踩過界啦，之前可能唔夠貨直頭將車同動物合埋一齊，有動物車戰隊⋯⋯到底係咩嚟㗎⋯⋯但sorry，炎神戰隊開播之後，玩具一樣好好賣。
雖然我都覺得啲主題好耐之前已經好悶，但係諗諗吓，係我哋自己唔啱，自己睇過嘅嘢就唔想再睇，但係明明呢一啲係俾小朋友睇嘅嘢，都冇理由我哋細個就恐龍戰隊，忍者戰隊，而家啲小朋友就要睇家電戰隊、微波戰隊、煮婦戰隊啩，主題其實係好有限，一味話啲小朋友唔知咩係經典，不如索性製作新嘅經典，自己都update下好過啦⋯⋯btw，微波戰隊同主婦戰隊好似有拍過，唔知係邊度睇過啲poster⋯⋯
講到尾，題目根本唔重要，內容係點先？如果睇完題目就藐，我地就只係一個玩具標題黨，仲係唔長進嗰種。
三角龍戰士 檸
