畢業典禮，根本就係考驗男朋友能力嘅日子，你同意嗎？
//作為男朋友，幫手拎野就不在話下啦，畢業典禮當日完全就會化身成為
流動衣架，左手掛幾袋，右手又掛幾袋，前後就各揹一個袋，分分鐘女朋友要整頭果陣，你個頭都要借比佢放畢業帽。但呢啲只係基本中嘅基本....//
＜畢業典禮根本就係考驗男朋友能力嘅日子＞
大學畢業行畢業典禮，最基本都會著袍、拎公仔同拎花，
你問咁進階少少嘅會係點呀？個情況就同有咩慘過食屎嘅道理一樣，
就係會拎兩紮花，兩個公仔，不過又唔會著兩件袍戴兩頂帽嘅。
咁作為男朋友，幫手拎野就不在話下啦，畢業典禮當日完全就會化身成為
流動衣架，左手掛幾袋，右手又掛幾袋，前後就各揹一個袋，分分鐘女朋友要整頭果陣，你個頭都要借比佢放畢業帽。
咁好啦，以上情況已經考驗左男朋友幾件事，
第一！你有無為左出席女朋友嘅畢業典禮而請假呀？
第二！你有無主動買花同買公仔比女朋友呀？
第三！咁多野拎，你唔會指望世伯伯母要幫手呀？
第四！拎咁多野，你無車都唔會唔坐的士麻？
第五！拎住咁多野行來行去，你無咁上下體力都唔得掂啦，幾個鐘就叫累？
你唔係咁虧呀？
或者你會問呀，仲會有咩試到男朋友呀？都一齊幾年啦，要試一早咩都試哂啦，
你錯啦！因為畢業典禮當日根本就同獵人考試無分別！因為同場都會有好多「考官」同時都考驗緊其他「獵人」，而且人數極多，距離極近，一個唔小心就會睇到對方個「考生」質素，有比較之下，你女朋友就會意識到你有幾無用，
你試想想，單係第一項，如果人地同男朋友好幸福咁合照嘅時候，你女朋友仲只可以Whatsapp send 相比你睇，然後打句「如果你請到假嚟就好啦」，你話幾咁形單隻影呢？係唔係完全有比較？加上三姑六婆嘅你一言我一語大法，「你男朋友做咩唔嚟呀？」，「我男朋友本來都請唔到假架，佢為左我同老闆嘈呀，佢幾好呀。」，哇，唔好話係現場，我依家隔住個ｍｏｎ都感受到言語嘅威力有幾大。
好，如果以上五件事，你都做足，ｓｏｒｒｙ，真係只係基本中嘅基本，
因為接落黎仲有好多項試煉等緊你，古時咩琴棋書畫都係得四樣，你話做現代人幾難？
畢業典禮喎，最緊要咩呀？化個靚妝，ｓｅｔ個靚頭？錯錯錯，你化妝整頭係為咩呀？緊係影相啦！
作為一個稱職嘅男朋友，當然會兼職埋攝影師啦係咪？
試煉就正正係發生係影大合照嘅時候！
第一！一拎單反，即刻就有種傻仔都變天才嘅錯覺，所以你唔會得部傻瓜機掛？如果唔係三姑六婆又發功架啦。
第二！要拎單反首先要買單反，仲唔係財力嘅表現？
第三！一堆男朋友務求影女朋友最好嘅一面，一定會死迫難迫，搵個最佳位置，如果你成隻排骨精咁，試問又點食位？
第四！如果影相無返咁上下技術，斬頭斬腳，手震又失焦，女朋友又張張都閉埋眼，女朋友唔怪你怪邊個？
所以話，做人男友甚艱難，影張合照都咁多野要考慮，你話你話，仲要未完喎，因為準備要食晏啦。
食晏又有咩野要試煉！？哈哈，你唔係唔記得左佢屋企人都喺到掛？
成家人係到，你唔係想佢父母陪你食ｈａｌｌ ｃａｎ呀麻？
粗粗地都飲餐茶啦ｒｉｇｈｔ？唔係話為左你女朋友呀，係為你自己呀，因為要加分，表現到你係個好女婿，不過你話無諗住同女朋友結婚嘅話，其實根本唔需要嚟，係咪？
好啦喎，食完晏，繼續下場。
女朋友就建議返返去繼續影，同行仲有佢其他同學同埋佢地嘅男朋友，
見到面，打完招呼，眾人嘅男朋友都只可以苦笑以對，真係I know that feel bro.
去同一個地方影相，眾人男朋友要使出混身解數，目的係令女朋友可以係ｆａｃｅｂｏｏｋ貼一張靚靚既畢業相。
不過你知，有ｄ人為左影張相，可能半隻腳踏空都會做，
呢個時候就考驗你，你為左幫女朋友影張靚相，可以去到幾盡！
彎身，坐低影？太簡單了，瞓地影已經係入門級動作，進階嘅有長距離衛星攝影技巧，同埋零距離近爆攝影術。
好啦喎，又比拼完一個回合啦，女朋友十分滿意你今日嘅表現，可以返屋企啦喎！
你以為完啦？ｎｏｎｏｎｏ！由你送完佢返屋企，到你自己返屋企果刻，已經係同時間競賽嘅項目。
因為你要最快入好相，執好相，然後比女朋友放埋上ｆａｃｅｂｏｏｋ先叫完成畢典典禮任務！
你拖住疲憊嘅身體，都要急步行返屋企，一邊換衫一邊開電腦，開Photoshop 仲要鬼死咁慢，最後你終於開到，今日影嘅相又已經入好哂，之後就係考驗你用Photoshop嘅時候啦。
肥面、雙下巴、劉海穿洞、油面、頭髮亂咗、路人攝鏡通通唔要！
左揀右揀要，揀無可揀，只可以靠ｐｓ去解救，免得你女朋友問你影咗成日得幾張相咋？
同時你又要ｋｅｅｐ住睇ｆａｃｅｂｏｏｋ，恐防有其他人嘅男朋友快過你，每一刻你都感覺到自己心跳，就好似有個炸彈隨時會爆一樣，分秒必爭咁按實滑鼠，眼球高速咁來回每張相，希望可以令女朋友有張完美嘅畢業相放上網。
最後，你成功了，你女朋友亦都成功張貼一張堪稱完美嘅畢業相上ｆａｃｅｂｏｏｋ，雖然比起荒木經惟影嘅相係差好多班，但應該可以同柏豪大師齊名。
畢業典禮根本就係考驗男朋友財力，體力，技能嘅日子，當中所包含嘅細心，體貼，愛，考量，係遠遠超越平日拍拖嘅時候。
如果Mathilda都作為人地男朋友而經歷過畢業典禮，可能佢唔會再講得出
「I want love or death.」，因為我肯定佢會揀death。
Facebook: www.facebook.com/iam800yearpromise
Tumblr : promiseof8.tumblr.com
Instagram : promiseof8
圖源：＜這個殺手不太冷＞劇照
#八輩子的約定 #八輩子 #成長 #香港 #愛情 #人生 #畢業 #這個殺手不太冷 #男人唔可以死
