今日純粹分享圖書 ……
呢本圖書歷史悠久，我印像中，自我出世以來，佢就喺我生命中存在，而每一次搬屋執嘢，我都唔捨得掉咗呢本書。我頭先翻箱摷籠，再次拎返呢本書嚟睇。後來我諗，其實呢個故事我已經深刻咁記得，即使我搵唔返，我呢世都唔會忘記。呢個深刻嘅故事，令我明白到，教育真係好重要，正確嘅教育係可以影響一個人一生嘅價值觀。
言歸正傳，講返呢本圖書，呢本書係1987年由市政局公共圖書館出版，當年市政局 每年都有舉辦兒童讀物創作獎，會將所有故事集結成書。今日分享嘅呢個故事，作者係何寶雯，作者畢業於中文大學藝術系。過左幾十年，我唔係好清楚作者而家有咩立場同取向，但字裏行間我睇得出當年佢係一個崇尚 世界上所有人都可以擁有個人意識嘅一個作者。
呢個故事叫<<不准笑>> …..
好耐好耐之前，有一個國家定咗一條禁令，所有人都唔準笑，邊個笑親就要坐監，所以由出世起，所有人都要接受訓練，解除笑呢個惡習。無論返學做嘢都唔準笑，甚至星期日，所有嘅國民都唔會出去玩，因為一玩就會笑，所有人都相信國家要強大，就要嚴守戒律，唔可以笑，要不停咁工作。至於點解有一條咁樣嘅法例，源於一次國王嘅仔(王子) 掹佢啲鬍鬚，國王大發雷霆，自此之後全國嘅人都唔可以笑。
國王係有一個理念：人笑即係唔會驚，唔會驚就唔會聽話，唔會聽話就會造反。所以笑真係罪大惡極。
有一日，國王去廁所嘅時候，唔小心跌咗落個屎坑度，由於太肥起唔到身，於是就大叫救命。但所有嘅工人都唔敢去救國王，因為場面實在太好笑，佢哋都驚拯救國王嘅時候 會唔小心笑，然後畀人拉。最後只有王子笑笑口咁，救返自己嘅老豆出嚟。
死過翻生之後，國王又忽發奇想，覺得個仔 嘅笑聲同愛可以趕走恐懼，於是第二日又頒發咗一條新嘅命令，規定人人都要笑，時時都要笑。但由於呢個國家嘅國民經過長期嘅訓練，好多人都唔識笑，於是唔識笑嘅人又再次畀人拉咗入監獄。國王思前想後，最終諗返起當日因為偷笑畀人拉入監獄嘅犯人， 於是釋放咗佢哋，命令呢一班識得笑嘅釋囚製作笑片，推行笑嘅教育。好多國民睇完笑片都唔識笑，國王當刻終於都明白到，原來恐懼同規則係唔會令人笑，自此之後，國王容許百姓自由咁笑，自由咁喊，自由咁休息，自由咁工作，自由咁玩樂。國王明白到只有真正愛護百姓，可以畀佢哋有自由，國民先至識得真正咁笑。
故事講到呢度，當我好細個睇嘅時候，我覺得畫風精美，而且好 surreal , 當笑話咁睇。呢個故事，係令細細個嘅我明白到，其實所有嘅法則門檻都不能夠太低，例如，只要你呼吸太大啖，可能會影嚮到其他人呼吸嘅機會，於是拉你。又例如，只要你放響屁如果都臭，於是拉你。又再例如，只要你朝早搭𨋢, 個街坊叫你等埋，你即刻撳閂門，冇同情心於是拉你。以上種種就係門檻太低，人人都中招嘅法則。
如果一條法則，門檻低到人人都中招， 監獄就形同虛設，因為我哋就生活喺一個大型嘅監獄入面。
#純粹分享兒童文學
#而家嘅社會氣氛同壓力
#令到你每做一件事都好似要啟動原子彈粒掣一樣
真係罪大惡極 在 有食唔食，罪大惡極 - Facebook 的推薦與評價
16 tis. views, 145 likes, 4 loves, 18 comments, 45 shares, Facebook Watch Videos from DisChannel: 有食唔食，罪大惡極到真係有得食嗰時，你又敢唔敢食？ ... <看更多>