《西謊極落》影評
「符號嘅價值在於開創」
（含劇透，關心香港電影人士必入）
－
「好睇嘅戲會有共鳴，
有共鳴嘅戲唔一定好睇。」
－
喺呢度，我唔係要話西謊極落有幾唔好睇，要開始喺黑色幽默嘅作品面前無啦啦玩認真，評呢套戲之前，講少少往事。
－
前年睇完《哪一天我們會飛》之後，我曾經喺一個公開場合問過黃修平導演一個問題：「套戲係咪消費緊香港嘅符號？今次就話趕返屋企睇《大時代》，下次會唔會係《網中人》？會唔會有江郎才盡嘅一日？」黃導嘅答案係佢話唔覺得自己係消費緊任何價值，自己係香港人，拍到香港嘅嘢係自然而然。而今日睇完《西》之後，我再一次喺腦海入面浮現咗呢個問題。
－
講好笑，林生好鬼好笑，甚至連呀BOB都勁有喜感；講共鳴，作為香港人處處都見到共鳴，甚至我覺得自己幾似周柏豪個角色，好同情佢嘅遭遇，自己選擇死慳死抵，原來係瞞住女朋友儲錢上車，點知連詩雅一個唔該跟佬走人，你做乜人哋都唔會欣賞，仲喊住呃話唔捨得你，而我自己可能都係一個保證唔到將來連拖都唔敢拍嘅人。
－
但《西》爭嘅係啲咩？仲欠嘅就係為舊嘅符號開創新嘅價值。你未睇套戲之前，聽到戲名叫「太空艙」，咁你大概都知道係關於「土地問題」掛？而你睇完套戲之後，對套戲嘅認識仍然係止於「土地問題」而無寸進，簡單嚟講，就係缺乏「啟發」，睇戲前同睇戲後，你呀媽都仲係女人。
－
而係符號嘅問題上，《西》係對香港社會符號嘅一場操弄，得香港人先會睇得明，外國人可能會一頭霧水。而個問題係，某啲符號比我大有「為加而加」嘅感覺，例如電影嘅最後，莊思敏原來係影射緊齊昕，一句「You are not my biological mother」如雷貫耳，可惜真係同套電影無太大關係，而個呀太叫賈寶玉係咪又會好笑啲？
－
而比較嚴重嘅問題係，可能電影情節喺嚟自多個獨立嘅短篇故仔或社會時事嘅關係，成套電影嘅感覺散收收唔太連貫，雖然每場戲都有自己嘅靈魂，例如盧宛茵果場戲，仲唔係公屋潮文嘅演化？hashtag、facebook嘅設定都抓緊到年輕一代嘅習性。
－
但觀眾就硬係難以掌握成個故事嘅脈絡，唔係出奇不意果隻，而係真係唔知下步會點嘅情形，甚或林生開空氣槍嚇走旗兵果幕，做緊咩。
－
而運用過多符號亦會有其隱憂，到底香港觀眾會唔會有日掉轉厭倦咗香港文化嘅符號呢？而運用一堆符號係咪就可以寫成一個故仔呢？香港社會嘅荒謬事其實日日都上映緊，張繼聰欣宜嘅「無地方扑嘢」，豈又唔係出自游議員口中，咁係咪每過一兩年就可以用堆新嘅素材砌個新嘅故事出嚟？六百九今次可以係叫雞價，下次其實可以係隻狗嘅名，作為對前特首嘅恥笑，但個意義又係咪真係咁大呢？
－
於此再重申一句，符號自有符號嘅價值，無香港符號，就唔係香港電影。《西謊》今次為香港電影造咗一次好好但可一不可再嘅嘗試，我亦希望電影能夠大收，一眾演員交出好貨，尤其係幾個劏房客嘅化學作用，好多時見到佢哋堅係笑咗。
－
但我亦想強調，符號嘅意義在於開創，可唔可以比到人新嘅「啟發」，香港除咗過去之外，仲有無現在同未來呢？食老本乃係世界大勢，夢工場荷里活係表表者，將無數舊系列翻拍reboot或者續到2046，乜《變型噹噹》、《盜墓迷城》比比皆是。
－
香港亦唔例外，葉問唔係唔好睇，但可唔可以除咗葉問之外拍下其他人呢？四大探長亦好有型，但我深信，香港嘅好嘢同創意並唔止咁少，應境嘅係，香港電影人應該放棄過往古惑仔陳浩南型棍嘅歲月，放棄四個麻甩佬喺天台FF而放眼世界，做個加勒比海盜都好吖。果句「加油啊」嘅自言自語，係講比香港電影人聽嘅！
－
P.S.朝河蘭堅正，導演識嘢！
—
（一篇影評其實要寫嘅時間真係頗長同相當費心力的，正如呢篇野都過左千五字了。如果你覺得文章係寫得好嘅，我一個人嘅力量真係非常有限的，唔好吝嗇你嘅like同share吖，甚至幫手推薦比朋友知道原來睇戲之後係可以有反思的，一齊傾，一齊分享同感受。網絡的力量可以很少，一篇千文字可以只像一粒沙，但同時亦可以很鉅大的，依靠的就是你，你，和你，感激不盡！）
—
周柏豪 Pakho Chau
Bob Lam 林盛斌
張繼聰 Louis Cheung
杜小喬
Shiga Lin 連詩雅
鄭欣宜 Joyce Cheng
BabyJohn蔡瀚億
雨僑 YuKiu Ava
陳詩慧 Eva Chan
莊思敏jacquelin
林敏驄 アンドリュー・ラム 春核大聯盟
A.Chow 周祉君
hmv Digital China Group
向西村上春樹
Nero Ng
