關於 石濤今日點擊 ，我們在網路上蒐集到這些相關的討論、資訊與評價

又有新人喇！樂壇已死，邊度死呀？睇過？今日介紹呢個有啲熟口面… 達哥嚟嘅？佢想做下個姜濤？達哥擁有一把被高速列車輾過嘅魔音，比廉航坐位更窄嘅音域，隸屬靈堂系歌手。達哥 cover 過《極速》《七里香》等，佢嘅破地獄音樂風格，為佢累積過百萬點擊，令周杰倫原地腳震。

今年，達哥竟然將呢個珍貴嘅簽約同出道機會，讓咗俾佢異父異母細佬。細佬佢好似瞳孔縮細版嘅達哥，比叮噹嘅縮細燈照過，即係「表哥version」。表哥版達哥英文名叫 Marstn，今年26歲，長長秀髮，有時會紮 man bun，紮 man bun 嘅男人我好欣賞。表哥18歲就開始作歌，同達哥一樣會擺自己嘅作品上網，佢唱歌就唔同喇，好聽過達哥（真嘅，我上網聽過），就係咁比唱片公司睇中。

佢同另一位女歌手楊彤一齊以組合形式出道。楊彤都係「有過去的女人」嚟，曾經同邵音音嘅孫女 Serrini 組成 “GTB” 組合，喺網上出過歌。表哥同楊彤呢隊組合叫「石山街」，做乜拎條街名嚟做組合名呢？原來佢地第一次邂逅就係喺石山街… 即係拍緊拖？

#石山街 #咁趣致呢個名
#真係好似達哥 #細眼版
#思達family再添一員 #冚家達
#佢地第一首歌叫暗戀家 #幾正㗎唔錯
#聽吓啦 #電音feel
#今年好熱鬧好鬼多新人

石山街 - 暗戀家 MV
https://youtu.be/gNrWkMEdm-Y

自殺拯救者（下）
　　
上集：https://bit.ly/2FQUXPd
　　
嗰一刻，我第一次懷疑，自己嘅人生目標係唔係啱。

如果我無夾硬救大叔，畀佢自殺，兩母女固然好傷心，但個細路囡......至少仲有機會長大。

又或者，我應該耐心同大叔傾計，先了解佢嘅需要，諗辦法幫佢。

但假如我了解完，佢都係想死，咁我應唔應該畀佢死？
　　

我好迷茫，我要搵人傾訴吓，我決定去搵二師弟神針。

我哋三師兄妹各學咗一門絕技，去咗唔同地方，但都以幫人為己任。

我搭車去二師弟間醫館，二師弟有一套金針絕技，只要對方仲有一口氣，無論幾重嘅傷病，佢都好大機會醫得好。

但施金針要大半日時間，所以二師弟一日只可以醫一個人。
　　

去到醫館門口，我見到一大班人圍住二師弟喺度嘈，有個大媽仲打咗二師弟一巴。

二師弟神情無奈，有嘗試辯解，但好快又被沸騰嘅人聲淹沒。

我衝入人羣，捉住二師弟衝入醫館，鎖咗門。

我望住二師弟臉上嘅巴掌印，好心痛：「做咩搞成咁啊？」
　　

「我已經做好預約，一日醫一人。但今日有人抬個擔架嚟，話佢老公遇到車禍，就嚟死，叫我醫佢老公先。」
二師弟好委屈：「預約嘅病人梗係唔制，爭持不下，我想醫邊個先，都俾對面攔住。」

唉，我都明嘅，嚟得二師弟呢個無牌醫師度睇病，個個都危在旦夕，諗住搏一搏。

平時仲可以講禮讓，但生死關頭，遲一日，摯親就可能無命。
　　

「佢哋嘈嘈吓，病人斷咗氣，啲人就開始講，話最衰都係我，擺架子一日醫一個，係咪想敲詐......」
二師弟愈講愈委屈：「我點解釋佢哋都唔信。」

我怒從心起，拉住二師弟向後門走：「啲人不識好歹，唔好理佢哋，我哋走！」

二師弟好猶豫：「但之後日日都有人預約......」

出面嘅人聲愈發沸騰，我嘆氣：「唔好話醫病，佢哋就快衝入嚟打死你啦，避吓風頭先啦。」
　　

我哋決定，搵埋小師妹，一齊商量吓我哋嘅未來。

小師妹點金，有點石成金術，呢個法術有個限制，點出嚟嘅金，都唔可以畀自己或親近嘅人用。

不過，有點石成金術，可以默默留金畀有需要嘅人，甚至唔見面都可以幫人，唔會好似我同二師弟咁，幫人幫到一身蟻。
　　

我以為，小師妹嘅生活會過得最好，點知去到小師妹所住嘅城市，搵極都搵唔到佢。

最後，我只可以用師父留低畀我哋嘅「緊急定位符」，先搵到小師妹。

小師妹身處一個偏僻嘅廢棄倉庫，但周圍居然有幾個凶神惡煞嘅保安。

靠住二師弟配置嘅迷魂煙，我哋先入到去。
　　

只見小師妹雙腳戴住脚鐐，神色灰敗，面前擺住一大堆石頭同金。

佢一望到我哋就流晒眼淚：「師兄！唔好行埋嚟，呢度有炸彈。」

原來，小師妹用金救濟窮人，引起咗黑社會嘅注意，就捉佢百般虐待，逼佢成為「黃金製造機」。

我又嬲又心痛：「我哋一定會救你出去！」
　　

小師妹嘆氣：「無辦法㗎，我身下連接咗炸彈，我一走開，呢間屋就會爆炸，將我炸成肉碎。」

二師弟咬牙切齒：「炸彈啫，我哋總會搵到專家解決。」

小師妹搖頭：「邊搵得切？佢哋日日都會派人嚟收金，唔夠數就打我。仲有一個鐘咋，一陣佢哋嚟到，見到保安暈咗，就知有人想救我啦。」

講講吓，小師妹露出一抹苦笑：「我係咪好無用？我實在怕死，成為咗壞人嘅奴隸......」
　　

明明我哋都想幫人，唔通我哋唔可以好好活下去？

轉瞬間，我唯一諗到嘅辦法係：「小師妹，你自殺啦。」

只要佢自殺，靈魂飄向遠方，我嘅追魂鈴會馬上響起，帶我靈魂出竅，去搵小師妹嘅靈魂，然後我再復活佢。

小師妹問：「但係我嘅肉體仲喺度喎。」
　　

「用追魂鈴復活，通常係將靈魂塞入肉身。但比如有人燒炭自殺，佢肉身喺危險地方，將靈魂塞入肉身，佢咪會死多次？」
我解釋：「所以，仲有一種方法，係將肉身召喚到靈魂所在嘅地方，你嘅肉身就可以瞬間移動。」

唉，我從來都無試過叫人自殺，但係時間無多，我都只諗到呢個辦法。
　　

我搵咗把刀畀小師妹，好彩班黑社會要利用佢點石成金，佢雙手仲有自由。

小師妹將刀移向自己條頸，隻手係咁震：「會唔會好痛㗎？」

佢割咗幾下都唔夠力，只留低淺淺嘅血痕。

我同二師弟都好心急，但追魂鈴只可以救自殺者，我哋又唔可以出手幫佢。
　　

小師妹割咗好多下，終於斷咗氣。

二師弟即刻問：「小師妹嘅靈魂呢？」

出乎意料哋，無論我哋拎住追魂鈴行去邊，追魂鈴都無響到。

明明只要我所在嘅城市，有人自殺，追魂鈴就會響㗎！
　　

行咗好耐，二師弟好驚咁問：「會唔會，追魂鈴只係追蹤到『真心自殺』嘅靈魂，小師妹行為上雖然係自殺，但佢一心求生。」

我哋面面相覷，呢個講法......好有可能係真相。

只係我以前從來都無遇過，有人為咗求生而自殺。

即係話，小師妹真真正正咁死咗，係我害死佢。
　　

我哋頹廢咗好耐先振作，繼續幫人，希望幫小師妹積福。

不過，今次我哋兩師兄弟合作，我去搵自殺者，如果佢哋肯復活，當然係好。

而二師弟就做Back-up，自殺者如果因為傷病而自殺，復活後，二師弟就可以去幫佢哋醫病。

如果自殺者堅持要死，我會......放手。

坦白講，到依加我都唔知，呢種做法係啱定錯。
　　

不過我意識到，無論一個人有幾勁，都無辦法幫晒所有人。

更重要嘅係，唔係所有人都願意被你幫助。

「幫助」，唔係我覺得「我係為你好」，就可以幫你做決定。

最可怕嘅「好人」，係你要蘋果，佢偏偏畀個橙你，仲覺得你唔食就係不識好人心。
　　
－完－
　　

將專頁設定為「搶先看」/ "See first"，最新故仔馬上睇！
　　
新書《買樓結婚超能力》現正有售，
係Facebook故仔嘅精選紀念裝，亦有從未面世嘅彩蛋故仔。
詳情可點擊這裡：https://goo.gl/rGbwhi
你的支持是我最大的動力！
　　
#短故 #短篇 #小說 #陳美濤 #廣東話 #粵語 #tomatochan #自殺拯救者