《無異之地》極樂謊園（七）
本來我差少少就會俾樂園嘅員工捉到。慶幸得到陳伯出手幫助，帶我去到一個秘密嘅地下室匿埋，先至暫時逃過一劫。
而同一時間，我亦從陳伯口中得悉某個「真相」──原來佢已經被困喺呢個樂園十四年。
「小妹妹，一陣仲有段路要行，妳坐低俾隻腳休息下先。」陳伯邊打開摺凳邊講：「趁仲有啲時間，我會盡量解答妳心入面嘅疑問。」
我照佢嘅說話做坐低。經歷咗咁多事，呢刻終於難得咁有種安心嘅感覺。
「唔……」陳伯思考咗一陣，「如果我冇估錯，妳應該仲未係好清楚呢個『樂園』係咩一回事？」
「嗯，」我點點頭，「只係知道少少……」
「唔奇，真係唔奇……呢度嘅員工總係鍾意故弄玄虛，想人自己去體驗。」陳伯無奈咁講：「小妹妹，『極樂園』係一個異空間，由1970年就一直存在到依家。雖然宗旨係『希望每個人都可以得到最極限嘅快樂』。但準確啲講，真實目的係滿足人類最深層嘅願望……」
「深層嘅願望？」我諗返起行鬼屋嗰陣，鏡入面「自己」所講過嘅嘢。
＝＝＝＝＝＝＝＝＝
一至六集：
https://www.facebook.com/pg/Echo.of.Heart/photos/?tab=album&album_id=1736011713197304
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
＝＝＝＝＝＝＝＝＝
「最單純嘅當然係指親情、友情同埋愛情，呢度有唔少設施可以令人重拾返幸福嘅感覺；而有一部分人，就係為咗滿足自己對於金錢、權力以及性嘅欲望而嚟──『疑幻』區域裡面有間『酒店』可以俾人體驗下做有錢人嘅生活，一直都好受遊客歡迎。當然，呢度都有好似『血慾騷』咁樣嘅表演，等觀眾可以發洩下心入面嘅怒憤……」
聞言，我又諗返起許致衡同林振堯……仲有頭先準備俾人燒死嘅女人。
「因為現實世界實在有太多惡人係逍遙法外，總有人係狠不得將佢哋碎屍萬斷。」陳伯扭開保溫壺嘅壺蓋飲咗啖水，再繼續講落去：「而有啲人，就係追求緊更加極端嘅『樂趣』……譬如話係體驗『死亡』。」
「吓？」
「唔知妳頭先有冇見到。有一座過山車上面係安裝咗好多殺人機關，就係俾乘客喺過程入面體驗各式各樣嘅死亡方法……」
照陳伯咁講，即係頭先被割頭嘅嗰班人根本就冇死到？而佢哋當初都係自願坐上嗰架過山車？諗到呢度，噁心嘅感覺又再一次湧上心頭……
「呢個世界……真係會有呢啲人？」我不禁問。
「多到妳唔敢想像。」陳伯語氣平常咁講：「有太多人，喺現實社會抑壓得太耐。難得嚟到呢個地方，當然會好似脫韁馬咁，成為自己欲望嘅奴隸。」
──哈哈哈……
講到呢度，上方正好傳嚟一班人嘅大笑聲。明明只係一牆之隔，但個氣氛就好似係兩個世界咁樣。
「我曾經都抵受唔住呢度嘅誘惑……係我個女改變咗我。」
「到底當年發生咗咩事？」見陳伯講到眼泛淚光，我忍唔住問。
「我第一次嚟『極樂園』已經係二十年前嘅事。當年我老婆因為交通意外過咗身，所以剩低我同個女兩個相依為命。嗰陣我真係過得好辛苦，每日都好似度日如年咁。唯一令我撐落去嘅，就係每日放工返屋企……見到個女用笑容迎接自己。」
陳伯舉起手用指尖輕輕撫過合照入面細路女嘅臉頰，接住講落去：
「直到有一日，我公司老闆突然揸車帶咗我嚟呢度……佢話見我一直放唔低老婆，保證呢個地方可以幫到我。嗰晚，當我再一次見到活生生嘅老婆出現喺面前，我就好似搵返生存意義咁。就係咁，我深深陷入喺樂園裡面，不能自拔。一直過咗六年……直到個女八歲。」
陳伯拎起合照旁邊一本殘舊嘅簿仔，遞畀我之後講：「當年我哋兩父女成日都會互相比試。有時係考下讀書嘅題目、有時係IQ題、有時就係一啲解謎玩具……」
接過本簿仔打開其中一頁，上面有一堆用小朋友字跡寫嘅問題：譬如「蜘蛛有多少隻腳？」、「我最喜愛的毛公仔是？」、「下雨天有什麼禁忌？」等等……而答案就係用較端正嘅字跡寫成。
「記得有次比試我輸得好徹底，所以就應承帶佢嚟海馬公園玩。本身係諗住正正經經咁玩，冇其他諗法……係直至上到摩天輪，個女講咗一句說話……佢話：『如果媽媽可以同我哋一齊玩就好。』嗰陣我聽完之後，做咗自己人生一個最錯嘅決定。」
陳伯講到呢度臉色一沉，喺微弱嘅燈光下，佢臉上面嘅皺紋瞬間加深唔少，好似一下子老咗十歲咁。
「你帶咗你個女入嚟呢度？」我問。
「冇錯，我本來諗住個女見返媽媽之後，佢一定會好似我當初咁感動……」
「但你老婆過身嗰陣佢只係得兩歲，照計佢應該未必認得先係？」
「實際情況係比妳所講更加差。當時，我個女好驚，嚇到塊臉幾乎係青晒……佢指住我老婆，話眼前嘅人根本唔係佢媽媽，而係一團……不斷蠕動緊嘅人型肉塊。」
「肉……塊？」我聽完驚訝到不禁掩嘴。
實在想像唔到八歲嘅細路女見到嗰個幕會留低幾大嘅心理陰影。
「最初我都唔係好信呢個係事實。反而仲呃自己，只係因為佢仲細，所以先接受唔到咁大嘅衝擊。記得當時我已經諗住帶佢離開『樂園』，但一行返室外，就即刻意識到唔妥……」
「班員工諗住捉你個女？」我回望返自己嘅經歷，即刻得出呢個結論。
「嗯，一出到去我哋已經俾人重重包圍，當時甚至連園長都喺度。佢話絕對唔可以俾我個女返出去。即使我跪喺地苦苦哀求，佢哋最後都冇網開一面……最後從我手上格硬帶走咗個女。」
「咁你呢？」
「可能係見我為『樂園』貢獻過唔少，所以園長畀咗次機會我──只要我肯忘記自己個女，佢哋就可以當乜事都冇發生過。」
「但你做唔到……」
「當然做唔到。我本來朋友就唔多，父母同埋老婆都先後離開，所以個女就係我嘅一切……佢係我呢個世上唯一嘅寶物。」
雖然情況係有分別，但我多少係有幾分共鳴。事實上，自從出嚟社會做嘢之後，我同以前同學亦都少咗聯絡。而本來最親近嘅Alice，亦都因為呢件事而變得好陌生。至於阿海，感覺亦都離我越嚟越遠……
「要我徹徹底底咁忘記佢，倒不如乾脆殺咗我……我嗰陣就係咁回應，佢哋當然冇順我意。結果，就係好似妳而家所見到咁。」陳伯無奈咁望向地下室角落嘅一枝掃把，「佢哋奪走咗我離開呢度嘅權利，將『樂園』變成為我嘅牢獄……」
「但十四年……咁多年以嚟你都搵唔到方法離開呢度？」我難以置信咁問。
「搵唔到……但就算有，我都唔想咁做。」陳伯重新望返去合照，「假如我當初冇帶個女喺呢度，或者所有嘢都唔會發生。呢個罪孽，我應該要用下半生嚟還。」
「唔係咁！」我搖搖頭，「錯嘅係外面嗰班人，佢哋嘅思想根本就係扭曲晒。『樂園』理應係畀到人快樂，而唔係製造痛苦，更加唔應該迫人接受！」
「小妹妹，我諗就係因為妳仲有呢份純真，所以而家先會坐喺度。」陳伯微微一笑，「但我之所以留喺度，除咗贖罪……仲因為我始終相信我個女仲喺『樂園』裡面。佢一定係喺某個地方，等緊我去救佢。」
講到呢度，陳伯佢緩緩撐起身，再接住講：「好喇，等我出去睇下外面安全未……小妹妹，妳都要做好心理準備，隨時行動㗎喇。」
「嗯。」我點頭，然後目送陳伯離開。
等待嘅期間，我一直翻睇陳伯同個女互相比試嘅簿仔。字裡行間可以睇得出陳伯真係好錫自己個女。但就因為行錯一步，結果就鑄成大錯。
睇到中途，我又不禁諗返起阿海。唔知佢離開咗摩天輪未？定仲係沉醉喺另一個空間……同緊Zoey起埋一齊？
等咗大約五分鐘後，地下室嘅鐵門再一次打開，可以聽到陳伯喺地上面講：「小妹妹，上嚟喇！快！」
聞言，我即刻放低本簿仔行動起嚟。爬上返路面後，我即刻注意到有異樣──就係天空上面多咗好多紅色嘅氣球。
「呢個係危機訊號，用嚟提醒員工要加強警覺。」陳伯邊解釋邊將垃圾桶拉返原位。
「咁我哋點解唔遲啲先走？」我問。
「因為越遲情況就會越壞，呢邊……跟我嚟。」陳伯講完即刻行動起嚟，「聽住，只有兩個出口可以離開呢度，一個就係『樂園』嘅正門。但妳知道喇，喺山嘅另一邊，冇可能順利過到去……至於第二個，就係跳樓機隔離嘅一間小屋。」
「小屋？」我記得November曾經提起過。
而事實上，我同阿海佢哋啱啱嚟到『極樂園』嘅時候，亦都曾經經過一間荒廢小屋，當時仲覺得好陰森恐怖。
「不過，既然我會諗到，班員工都一樣諗到，所以到時可能要……」
啪！啪！啪！啪──上空嘅氣球突然連環爆炸，陳伯同我都不約而同望上去。
就喺下一瞬間，氣球嘅碎片居然聚集埋一齊，最後喺天空組合成一個巨大嘅臉部輪廓……同我個樣係一模一樣。
──哈囉，各位遊客，呢個係「樂園」嘅特別活動廣播、特別活動廣播……
接著，係現場廣播響起一把男聲，我認得出就係「血欲騷」嘅主持March。
──恭喜呢位叫做Cheryl嘅少女，妳正正就係「樂園」嘅第一百萬位遊客！不過妳可能玩緊設施錯過咗呢次廣播。所以成功將Cheryl帶嚟「血欲騷」嘅朋友，將會同佢一齊成為「樂園」嘅VIP會員！
就喺March講完一瞬間，我即刻感受到途人嘅注視目光。
「係咪佢？」
「有少少似，要行近啲望清楚……」
「佢就好喇，聽講VIP可以隨意玩『蛻變』區嘅旋轉木馬。」
「喂，你去唔去？」
「唔好喇，聽講上次爭到大打出手……」
「仲企喺度，要跑喇！」陳伯激動咁講：「最後一段路！」
（待續）
下集回憶篇結束。睇完又鍾意嘅朋友，不妨分享出去同埋留句 #留言派嬲 ～我哋 100 SHARES 繼續，下篇暫定星期四。
＝＝＝＝＝＝＝＝＝＝＝＝＝＝＝＝＝＝＝
【非呃嬲植入式廣告時間】《無異之初》《時間守衡者》《絕命上映》《絕望走廊》《絕無轉機》《無限次告白》《醉後的藍》已經登錄各大書局。
IG: echoofheart
