《14日隔離病房》
多謝大家嘅祝福，我同意佬終於安頓好，乖乖喺度渡過人生第二次隔離（第一次就是3月在意大利隔離）。
屋企人和好友都怕我哋與世隔絕冇啖好食，都窩心的送來好多好東西。我們倆現在好好的，因為令我最徬徨無助的日子總算已經過去……
按照計劃，我哋理應早在一星期前已到埗。
屋企客廳已滿佈開到一隻隻肉蜆咁嘅行李箱，已進入最後階段將啲牙膏牙刷放埋入喼就打包準備走人之際，那個晚上……
凌晨2點，我埋頭搓埋最後一批牛角包，打算分啲俾奶奶同放啲入雪櫃以防返到嚟又封城冇早餐食。突然，聽到意佬喺睡房傳來"而銀銀"咁嘅聲。心諗「唔係化，搓個包啫，咁都嘈醒佢？」成手麵粉，兩手舉起，好似醫生準備開刀咁衝入房，諗住問吓大人飲唔飲杯水啦。一開門……
從來未見過呢個模樣，渾身抖震，背脊痛得像被十萬伏特雷電劈般撕裂。這就是古人該稱之為「俾鬼砸」？劇痛的呼叫聲令我無所措手，聽著「把我反過來！」，我兩手從腰與大腿後側有如起重機的叉咁，將佢剷起來，然後好似蛋卷咁將佢捲到反轉面。望著動彈不得嘅佢，知道今時今日call白車而唔係因為肺炎，意大利醫院根本唔會收症，我已無助到一個點。
熱敷，穴位按，鬆弛神經，我懂的都已經做盡。餘下的，迷失的我只有眼光光看守著他到天光……
呆到早上8點，醫生開門了，用了半句鐘將佢抬上車帶佢去見醫生，醫生趕上為佢打支救命針。解決了嗎？未吧。支針只係救命，亦未真正根治問題。後來睇過兩三位大夫，都只係開消炎止痛藥俾佢。喺意大利我始終係門外客，到底尋到哪方先有人幫到佢？
航班要延期，往機場車程要取消，再看看一星期食過醫生開嘅消炎藥有冇進展。
家裡的所有大小事務我都唔允許佢掂，揸車更加唔洗講佢只可以乖乖做乘客。每一分每一秒，住佢有任何舉動，都唔敢怠慢直仆過去睇吓佢需要啲咩，為求唔好令佢郁親邊條筋骨又會再出現癱瘓狀態。
一星期後，到咗起飛前嗰晚，背痛好似幽靈般纏繞著佢唔放，雙腳無力，連企都支撐不到。佢話：「聽日上機啲行李好重，又要轉機，睇嚟我都係唔得，但我唔想再拖累你去見你最親嘅人，不如你自己走先。」
「難道你唔係我最親嘅人？只要你挨過呢程機，到埗後你有14日好好休養。行李我可以攞，所有嘢我可以拎，只要你安好舒舒服服的走到閘口前登機就可以了，餘下嘅一切，就包喺我身上吧。」
「但我連可否由機場入口行到閘口都成問題，你要全程湊住我，你會好辛苦……」
「難道喺你最需要人照顧嘅時候，我就咁掉低你一個，我唔痛苦咩？」「瞓吧，等我再幫你按同熱敷，明天的就聽天由命罷了。」
我嘅努力總算冇白費，第二朝起身算係行得到但仍唔可以彎腰。感恩有意佬姐夫特意安排車我哋去機場，然後入到去機場逢有櫈就叫佢坐，有就一定搭。兩程機都要行客梯車登機，不知道哪裡練來的手瓜乾，左右手各稱起一個8公斤嘅手提行李就狗衝上機。
「好尷尬喔，周圍啲男人都望住我覺得我洗女人擔擔抬抬。」
「別管人家怎看你，只管你扶好自己走下去。」就這樣，戰戰兢兢的過了一關又一關……
驚心動魄嘅旅程終於都告一段落，嚟緊就利用呢14日，好好喺「隔離病房」休養。多謝身邊幾位親友一直為我倆集氣。雖然進程蟻躝咁慢但意佬已慢慢好起來，我終於可以坐定定lun吓當日落機藕臭8個鐘等檢測結果都冇心情睇嘅隔離須知。
Instagram @misi_gipsy_italy
#嫁到意大利
#終於飛返嚟
#為母則強 #為妻則剛
#你完好的把我娶過去意大利
#我就要完好的把你帶回來
#強制病毒檢測 #8小時 #三思而後行
#水 #三文治 #餅乾 #免費添飲添食
#但我始終如一
#等我最愛的 #米線2小辣
#隔離病房 #你要好過來
終於飛返嚟 在 終於飛返嚟- Explore 的推薦與評價
explore #終於飛返嚟at Facebook. ... 多謝大家嘅祝福，我同意佬終於安頓好，乖乖喺度渡過人生第二次隔離（第一次就是3月在意大利隔離）。 ... <看更多>