【綠色年宵後感】
我仍然覺得，環保人士於年三十晚及年初一朝早，係應該放假及陪家人。
基本上，支持環保的人，或在環保機構任職的人，每一天也要在生活上、在朋友間、對住政府商界，要為到過渡的消費主義，去「執手尾」，去回收，去分類。新年俾我地休息下，都得掛...
但剛巧一年一度製造最多垃圾的大型活動，數十個大大小小的年宵，就在這時進行。
上年有班環保素人睇唔過眼，開左個頭，震一震社會及政府個腦，揭露了(雖然大家都知)年宵的超恐怖丟棄垃圾及商舖棄貨的情況。
而於是政府的環境運動委員會，就招標四個綠色年宵試點計劃，環保觸覺有幸中左荃灣的綠色年宵計劃，叫做有D資源。除左荃灣、觀塘、元朗及長沙灣外，其他場就要義工「食自己」了。
每一位昨晚通頂去年宵分類的，絕對是可敬的傻瓜。除了上述4個場可能有些少車馬費，其他場都應該是義工了，但面對是源源不絕的棄貨，包括年花、分盆、公仔、食品，包羅萬有。大家要在最短的時間分好類，然後給市民取，或配對給己答允的機構。大家亦不介意污穢，在垃圾桶挾番有用的物資上來。大家今年好醒目，帶晒手套及買定鐵夾。
而政府(場主為食環)有一樣真係要批評，就係開始清場及清潔的時間。聽到各區義工的意見，食環於8點鐘就開始清場洗地，酌情俾多半個鐘去搞，眼白白見到好多有機會回收及分享的物資俾食環外判商拎去垃圾桶。今朝7點前後，各個義工都爭分奪秒最後衝刺，救得幾多得幾多。
誠然，荃灣的檔主都算幾好，因為俾環保大使們日日提醒，要盡量拎走D野，就算要俾我地都要自己推過去共享區。但相信仍然有相當多的檔主，分佈各年宵，都係拍拍「蘿友」就走。其實，環保的責任絕對係於檔主身上，不能外判至環保義工身上﹗
我認為下年每一個檔主應先交一個金額的按金，最後離場時要清理好晒，先可以取回，否則應沒收按金。只有這樣，檔主才會真正意識到，清理現場，是檔主自己的責任﹗
另外，年宵通頂的巨大工作量，體力消耗及失去與家人新年相聚之時間，對於以義務工作形式進行，我實在極大的保留。環保人士實在成日被「佔便宜了」，但因為我們有一份環保的心，所以昨晚被「佔便宜」也是做得好開心。但下年又係咁？唔好啦掛......
最後，再次感謝昨晚在荃灣年宵並肩作戰的兄弟姊妹及義工。大家都係可敬的傻瓜。
