好多人為《蘋果日報》執笠而悲哀，但其實而家《蘋果日報》嘅商值卻係去到史無前例咁高，因為香港人無嘢多，最撚多就係錢，只要有任何掛住「蘋果日報」牌頭嘅Project出現，都幾乎肯定等同於搖錢樹，收錢收到手都軟──所以之前我點解話相比起落街急急腳買《蘋果》，你儲定錢都得，因為大撚把機會比你課金
以我個人猜想，「蘋果」往後借屍還魂嘅方式有以下幾個：
1. 眾新聞、立場之類嘅網媒，響有線《中國組》事件後食過番尋味，如無意外將會複製成功方程式，高調招請數名前蘋果記者組成新採訪組，然後就叫大家磅水繼續延續「蘋果精神」；
2. 蘋果記者、編輯甚至可能自行組成新網媒，畢竟網媒平時抄開嘅就係佢地報嘅新聞，點解唔直接棟支旗出黎？甚至乎我諗已有部份金主蠢蠢欲動，等緊蘋果風波塵埃落定就會開始招兵買馬
尤其部份非爭議性嘅動新聞，例如財經、飲食男女、體育、旅遊，甚至已經好少人睇嘅娛樂，班人根本已做慣做熟，有錢有地方響好短時間經已可以Clone番出黎，而呢兩樣根本完全唔係問題
3. 當然蘋果入面比較出名嘅專欄作者／記者，部份可能亦會考慮以自由新聞工作者／KOL身份繼續工作，甚至可能而家經已係用緊呢種方式維生，響今日KOL已成為黃色經濟圈其中一個消費量最大嘅範疇，我諗大家都唔難想像倒個情況係點
4. 最後就係好似一般媒體所報導，響台灣蘋果框架下繼續以網媒形式運作，不過可能成個製作團隊都要搬至台灣，而再以外判方式購買採訪新聞
其實響港蘋執笠嘅同時，台蘋仍然運作如常，不過要額外追加一個「香港部」響行政上需要相當資源同時間，而當然更要考慮嘅卻係會唔會因此令已被捕嘅壹傳媒高層陷入更惡劣嘅境地，依個係需要考慮嘅問題
ANYWAY，復活嘅選擇就擺哂響度，而無論係從使命感定係商業可行性，我覺得蘋果日報以另外一種方式延續落去都係事在必行，唯二有兩點就係：
蘋果始終係一個數以百人計嘅大集團，能夠參與呢個「復活計劃」嘅始終只係少數；同埋好多黃標KOL見倒當中商機，必然磨拳擦掌打算分一杯羹，黃絲不知就裡，結果真正蘋果中人就幫唔倒，反而又變成呢班欺世盜名騙徒搵笨七嘅羊牯──就好似明明最需要錢嘅前線勇武窮到燶，連前線都無落過果班黃標KOL卻賺到肚滿腸肥經已有先例可尋
最後當然係，無論蘋果以咩形式「復活」，佢都唔會再係原本嘅蘋果日報
