芊嶠31個月之戒日片成功
芊嶠今日31個月大喇，時間過得真係好快，唔經唔覺又好快3歲，芊嶠戒到日片，嶠媽就真係最開心，因為而家出面天氣熱成咁，仲要著片up住就真係辛苦，不過戒片大前提係小朋友要識講和肯講。
早係個幾月前，有日芊嶠突然話想柯poo poo，媽媽就抱住佢講笑既心態帶佢去，點知佢又真係去到，之後就得到好多讚賞，話佢叻，又有糖食，個時其實已經有叫佢想vv都可以講，但就真係得個講，一個月以來都只係去poo poo就講，vv就柯係片片。嶠媽就諗咁戒左poo poo先都係好事黎既，迫唔到，而且聽人講戒左poo poo唔柯係片，就係為戒片作準備。
直到兩星期前，有一日芊嶠係嫲嫲屋企，同嫲嫲講想vv，嫲嫲就帶佢去，佢又vv到，嫲嫲就話咁唔著片好冇？佢又話ok，但嫲嫲話想vv要講，果然佢大半日都係冇著片，都冇賴濕，而且每次講想vv都去到。我返到黎聽到嫲嫲咁講，就決定第二日都唔幫佢著片，但就著個d戒片學習底褲仔，姐係就算佢柯左少少，都唔會漏出黎個d，哩d底褲仔係哩個階段真係好重要！
通常d媽媽講就話最好戒片頭一段時間就唔好出咁耐街，同埋係屋企附近就算，可以趕返屋企。但嶠媽就好大膽，都照帶芊嶠出去，最記得係去九龍灣，出門口前同佢去左廁所，去到商場又再去，去完已經即刻食野，諗住9個字姐，就行去另一商場先同佢去廁所，點知我話去廁所，佢就跑去，唔知係咪激動得濟，入到去已經賴濕左，不過唔緊要，都比佢上廁所坐，都仲有得去，可想而知佢有幾急，之後換左條乾淨既底褲仔就搭地鐵返屋企，第一日完。
之後第二日戒片又出街，日頭都冇事發生，到夜晚，去左黃大仙食晚飯，又係唔知係咪飲得多水，嶠媽食完飯都即刻帶芊嶠去廁所，我記得係咁，就係去到廁所，嶠媽用AQ噴緊廁所板，叫芊嶠除左底褲仔先，到嶠媽想抱佢上廁所，佢已經賴濕左，唉！都怪我，可能佢下意識以為除左就柯得，最後都係換左條乾淨既底褲仔，繼續行街。今次芊嶠好緊張，一去到另一商場就話要vv，v完15分鐘唔夠又話要v，但又真係v到。
嶠媽覺得戒片最緊要係小朋友識講，之後仲要肯講，咁先可以，因為如果佢地唔肯講，咁就要採取老一輩用既方法，一個鐘帶佢坐一次廁所，嶠媽都試過，但芊嶠就覺得反感，所以唔迫佢，再等機會，終於嶠媽都等到喇！當然都要多謝 Ludus Club 既老師和姐姐們，芊嶠就算著住片，都會帶佢去廁所，等佢有要去廁所柯v既觀念，見到其他哥哥姐姐去又會想去。
嶠媽既戒片心得係小朋友唔迫得，佢地始終都會去到覺得唔舒服，會想講既階段，比d時間佢地，當然唔係齋等，都要同佢講下，比佢知道，又或者比佢見多d，例如有朋友個女戒左，就可以比佢睇下小朋友去廁所喎，你要去都可以同媽媽講之類。希望大家繼續努力，小朋友戒左日片，又完成左一個任務，嶠媽要向戒夜片進發！
#芊嶠成長日記 #31個月 #戒日片成功 #而家既小朋友唔迫得
