呢排每日都忙住工作畫畫同整年宵product，回過神來2021年已經過咗一個星期，依家先嚟打2020回顧真係有心唔怕遲都唔係咁遲，2020年如果係條屍一早已經火化完再掉埋落海餵魚再痾返出來變咗海底泥。
反省上年一整年，年頭明明plan咗好多嘢，但一年過去啦好似乜都冇做過，我是一個迷信又消極的人，覺得自己今年運勢唔好，咁不如唔做唔錯，睇返自己雖然下下籤x3combos，但一路以嚟身邊都有好多朋友同貴人不斷幫我、支持我同鼓勵我重新振作，所謂嘅下下籤x3超地獄級衰運其實都真係衰唔晒，捱過咗都仲係無穿無爛，呢一年都卒之平安無事咁渡過已經係萬幸，有朋友同我講其實我已經好幸福好好彩，因為我人生追求同需要嘅嘢都好少，好容易就可以滿足到，我又唔駛拍拖結婚生仔又唔駛買樓，賺埋啲錢可以fing晒嚟整玩具出呢樣果樣自high。
同好多朋友比，我今年遇到嘅種種慘事同低潮真係唔算啲咩，原來其他人2020嘅惡運，可以係屋企人中肺炎，可以係冇啦啦生cancer，可以係買股票輸到破產，可以係失業搵唔到工前路茫茫又要搵錢交租，可以係被逼害要坐監失去自由，種種一切都令我驚覺原來自己嘅怨天尤人係幾咁恬不知恥，自己其實已經一直都係被神明眷顧、被朋友照顧嘅代表幸運嘅細路，因為平安一直在我身邊，健康都一直與我同在，我可以自由自在做想做嘅事，過自己想過嘅人生，可以每日喺屋企被群貓暖笠笠咁包圍，可以隨時隱居山林迴避一切我唔想面對嘅人同事，我比好多人已經幸福好多，好多。
思前想後，我最大嘅惡運其實係我自己嘅心態，我冇自信喺運氣唔好嘅時候可以做好之前嘅計劃，冇信心做出嚟會有好嘅結果就擱置，有朋友勸勉我，形容我的五星圖其實是擁有很多成功人士擁有的條件，有才華有創意亦有能力，但卻偏偏沒有一個成功人士應有的心態，沒有恆心和執行力是不會成功的。
今年2021我會嘗試找回丟失已久的初心和勇氣，希望能做到很多一鳴驚人的事情！解鎖很多很多的成就！每次又想放棄的時候，信心動搖的時候，請身邊的朋友繼續不厭其煩提醒一下我是被選中的細路！要用行動去回應世間的眷顧，謝謝🙏
