//亂世紛擾，錦上添花易，雪中送炭難。在工友及遺屬最徬徨無助時扶一把、為工人權益拼搏半生的陳錦康，今年5月離世，他領導的工業傷亡權益會一眾戰友，傷痛過後將思念化為動力，繼承這位鬥士未竟之志。越難的工作越有意義，越值得堅持，繼承者們接力行陳錦康未完的路，推動全民監察職安健，預防悲劇再現，並爭取加強遺屬創傷後長期情緒支援，撫平稚子心靈。「媽媽組」最資深的姑娘說：「守夜嗰時，30幾年前幫過嘅工傷家屬都嚟悼念；當年3歲遺孤大學畢業後做社工幫返有需要嘅人，仲上嚟辦事處話想做月捐，真係好感動！」這是陳錦康堅持不懈的力量來源，將工人福祉放首位，撒下種子，信念不忘，必有迴響。
記者 張文傑
陳錦康帶領工權會為工友奔波36年，名留香港工運權益發展史，今年5月初因病與世長辭，享年60歲。喪禮過後，工權會戰友在這位總幹事的工作房間枱上，放上一個象徵愛及長久保護的大松果，一張笑容親切的相，在旁擺有精緻小花瓶及他最愛的飲品。「其實唔使行入間房，工權會每個角落都會見到佢以前留低落嚟嘅蹤影，睇見接待處嘅牆紙，諗起上年年尾佢同個仔一齊整嘅。」「媽媽組」梁金愛說起往事，眼眶有淚，「掛住佢，現時盡量想鼓勵返自己……都要學習去適應」。
工權會1981年成立，陳錦康1984年成為工權會總幹事，梁姑娘在1995年2月加入「媽媽組」，2人並肩作戰20多年。「媽媽組」的服務對象為職業意外死者遺屬，組員主要以過來人身份助遺屬盡快走出陰影，重過新生。她記得，陳經常強調「單case未做完唔好去食飯住，家屬都未食」，陳又認為即使社會及傳媒不太注視的個案，一樣要用心跟進，「（陳錦康）一有case跟就好似唔記得咗肚餓，我真係俾佢薰陶咗，單case未（搞）掂呢，真係冇胃口，做完單case先至想食嘢。」
梁姑娘不斷提醒自己，工傷家屬權益一定要放首位，這是工權會及陳錦康一直以來的堅持，「有時都會奇怪，呢個人（陳錦康）嘅魄力喺邊度嚟嘅呢？啲人話做得耐就會滑牙，但佢個衝勁冇話淡咗落嚟」。10年、20年前的工傷工友不時回來工權會探訪，陳的喪禮上，30多年前的工傷家屬都前來致祭，梁姑娘明白到這些就是陳一直堅持的力量來源，「點解佢信念可以咁堅持，我覺得就係呢班工友畀佢，佢係凝聚咗一班工友」。
工權會每年跟進約60宗死亡個案，梁姑娘照顧過很多遺屬，她記得一位20出頭的女社工早前上來藍田會址，稱想每月捐款予工權會，後來知道該社工是工傷家屬，「大約20年前，個女仔得3歲，開頭嗰幾年我哋一直跟進佢個case，當時有個叫阿松嘅同事拖住佢，記得佢話『松哥哥，我大個都要做社工』」。當年那個小女孩，去年已大學畢業，如願以償，未有忘記幫過她的人，「冇諗過佢會咁掛住我哋，好感動！」梁姑娘指不少遺屬的子女，長大後都用自己方式貢獻社會，「好多都做社工，幫返人，或者做放射治療員，因為細個家人受過工傷」。
陳錦康事事親力親為，他曾當印刷工，機械、裝修無一不曉，被親友稱為「萬能人」，其妻透露他一向愛聽勵志歌如《愛拼才會贏》，永不言倦。他的俠義心腸、坐言起行作風，多年來成為眾人的「人生導師」，如教師般春風化雨，所撒下的種子，在與他相處過的人心中，不知不覺間生根，再茁壯成長，變成另一棵樂於助人的大樹。
梁姑娘坦言，見到工友受傷後復工、重新站起來，再回來探「媽媽組」等人，不斷多謝工權會在艱難時陪伴及幫助他們，就覺得工作再辛苦也值得。她今年已59歲，也希望將自己的經驗、陳錦康的理念，傳授予年輕人，「以前跟完case會返嚟向陳生匯報，依家同阿Fay同埋其他人一齊傾」。阿Fay就是工權會現時的署理總幹事蕭倩文，可算是陳的「接班人」。她會否正式成為總幹事，仍要視乎執行委員會及同事的支持。
80後的阿Fay畢業後第二份工作便是工權會幹事，她仍清楚記得9年前面試時的情景，陳猶如朋友傾偈一樣，講家庭、嗜好，再詳談六四。她最欣賞陳30多年來都行到最前，「一有意外發生佢就要去現場、去醫院，睇吓發生咩事，安慰家屬」。
陳錦康的工作房間現時有一些雜物，阿Fay稱會盡快與陳太商量如何整理，「我哋對佢嘅思念係無處不在，就算無擺相出來，我哋都會覺（得）佢仲喺呢度嘅」。主修社會政策及行政的她說：「現時自己做嘢會諗，如果係陳生嘅話，佢會點樣做呢？自己做得夠唔夠呢？佢係一個指標，會有啲比較，尤其我依家都做一啲佢以前做緊嘅嘢。」
「諗到就做」是陳錦康的口頭禪，同時他又十分重視專業正面的形象，幹事見工友、家屬時不可着拖鞋短褲，辦展覽時各樣物品亦要「見得人」。阿Fay說：「陳生話出得街嘅嘢唔可以求其，同家屬建立最開頭嘅關係時，如果俾人覺得唔專業嘅話，人哋唔會放心去同你講嘢，尤其我哋去做死亡個案，第一下接觸嘅時候，佢哋唔識我哋係邊個，究竟你哋呢間機構係咩人呢？會唔會係想喺中間去攞我哋啲錢定係咩呢，如果我衣着都唔端莊，人哋對我哋信心可能減一截。」
懷念過後，就要向前看。阿Fay指，工權會未來有多個目標，首要加強長期情緒支援工作，一些遺孤會因喪親後發奮自強，但部份小朋友會有嚴重心理影響，「家庭支柱突然間過身或者受傷，可能令到整個家庭結構都改變咗，每個人都有情緒問題，小朋友更嚴重，係唔識紓發出嚟，或者演變成一啲行為問題，可能喺學校打人、無心向學，影響佢人生成條路，如果我哋有長期情緒支援，1、2年咁，幫佢哋慢慢走出喪親情緒，對佢哋好大幫助」。她認為需要增加2名幹事，才可以提供有關服務。
工權會現時有15名職員，要增加人手，就需要爭取更多資助。阿Fay指，一向申請的資助計劃，例如公益金，相信可以繼續申請，但如申請其他新計劃，多數只批1、2年，之後要重新申請，「萬一第三年唔批，個同事點呢？要走定係留呢？如果留的話，需要搵更多錢去維持個同事（薪酬）㗎，如果搵唔到錢（資助）可能迫於無奈，同事都要離開，相信呢個（係）好多NGO問題，（經費）不穩定情況」。
全港賣旗日是不少NGO的收入來源，社署是以抽籤形式決定哪個機構可以進行賣旗活動，阿Fay指工權會試過數年抽不到，「影響很大，上年有，今年我哋又冇；如果有賣旗，連同大額捐款，可以有90萬或更多收入」。沒有賣旗收入，只能靠步行籌款，效果差很遠，故阿Fay正籌備月捐計劃，但由於與銀行溝通、行政程序繁複，暫未知何時推出。
工權會近年開設官方facebook專頁，積極發帖，將市民報料的違反職安健情況，例如危險搭棚相片公開，再向勞工處舉報，令處方勒令違規單位停工，「呢個係我哋想做到嘅方向，希望全民一齊監察，令到職安意識文化提升」。阿Fay明言，預防一定重要過事後補救，而預防需要從小做起，並非只講工作安全，「陳生亦有提過，係講緊成個社會嘅安全意識，現時安全教育太唔足夠，令到咁多意外發生」。勞工處資料顯示，本港每年有約有3.5萬至4萬多宗工傷，未計沒有申報的，阿Fay希望再次提出在教科書內加入更多全方位安全教育內容。
阿Fay亦會繼續爭取成立工殤紀念日、在鬧市豎立工殤紀念碑，敦促政府將「過勞死」納入僱員補償範圍之內，並參考肺塵埃沉着病補償基金委員會機制，設立有工傷糾紛裁決權的中央僱員補償基金。
繼承陳錦康遺志的不只有梁姑娘、阿Fay，工權會每一個人、受過會方幫助的工友及家屬，正以不同方式，將陳的理念一直承傳下去，花已滿地開遍。//
