如果另一半考車牌，真係要好好支持佢，因為心理壓力好大。
好想有一日可以車女朋友周圍去，旅行又可以自駕遊，但一直對學車都冇咩動力。大約半年前，終於扚起心肝學車，經朋友介紹下，搵咗個師傅。
筆試當然輕鬆過關，都係做咗幾日模擬考試，應該就冇咩人會肥佬。然後再過多半年，路試前幾個月，正式開始學渣車。
雖然話真男人要學棍波，但我只係求輕鬆過關，渣下車代步，所以報「自動波」私家車，個個朋友都話唔一Take Pass都唔係男人，但我有啲不詳預感⋯⋯
渣車學車嘅過程，技術上來來去去都係咁教，我嘅師傅都正正常常唔會大鬧、有講有笑，我對我手車都有信心，但唔知點解，一直壓力好大，因為好怕會Fail，一Fail又要時間同錢，而最重要係會「心掛掛」，每日都好唔安樂，有嘢未搞掂咁，好想快啲完成考試，專心其他事情上。
一定有人覺得「唓！使唔使咁驚呀，考車好易啫！」但情緒呢家嘢，真係好個人，大壓力就係大壓力，你叻你事⋯⋯
記得考車當日，係世界盃大戰期間，我同女朋友講：｢如果Pass咗，今晚盡情睇波慶功！」
我考嘅係「石蔭」線，渣到熟晒，可惜事與願違，我竟然犯下一個冇人估到嘅大錯，未出試場就肥咗佬⋯⋯就算我之後出去路試渣得幾好，最後都係Fail⋯⋯
一Take Pass唔到，嗰日情緒超低落，波都冇睇，女朋友安慰我：｢當再學多陣，之後渣穩陣啲！」
回復心情後，要報重考，我好想快啲搞掂，唔想再被考車一事影響心情，阻礙工作。不過重考嘅路線要抽，如果抽中第二條路線，又要重新再學過，又係時間同錢⋯⋯唉⋯⋯
原本個師傅，因為冇時間上堂，幫唔到我排「快期」。經另一位都係寫嘢嘅朋友孔明介紹，搵咗另一位鄧師傅。但鄧師傅WhatsApp同我講：「年輕人，快期嘅話，可能上兩、三堂就考架喇喎，我幫你唔係問題，但你對自己有冇信心先？」
我答師傅：「當挑戰下極限囉，我只係想快啲Pass到。」
好運永遠唔會降臨我身上，結果我真係中咗另一條路線【培正道】，而我只係得兩堂時間，要學識一條新路線，壓力又大咗⋯⋯
唯有頂硬上啦，更黑仔嘅係，兩堂都落超大雨，路都唔係太睇到。
師傅好畀心機教，我返到去都狂煲Youtube認路，仲諗過真人去行熟佢，但太花時間都係不了。
第二次考車當日，我同自己講一定要Pass，雖然唔Pass咪再嚟過，最多學晒三條路線LOL。
雖然路試嘅時候有個位差啲肥，去到個讓路口成5分鐘都有車，一直出唔到，後面狂呠，考官都開口叫我快啲，已經錯過兩次出車機會。
接到成績單前，我都未知生死，到真正見到「合格」兩隻字，我真係放下心頭大石咁笑出嚟，多謝師傅同埋同女友、朋友報喜。
從此，馬路上，又多一個P牌仔喇！
呢排都一直上網睇下有冇咩心水車，期待渣車嘅日子。
搵一個好嘅學車師傅好重要，我冇收廣告錢，真心介紹，如果你都想學車，可以WhatsApp搵 鄧師傅（53663206），一個好Nice、風趣又有實力嘅師傅，話莎比亞介紹，冇折不過照講～
好耐冇打過咁長嘅文，Pass咗真係好開心，鬆一口氣～
