【航拍有罪？】
今日收到網友提問，指有攝影師尋日上載一張航拍夜景照片，攝影位置係信德直昇機場附近，會否導致航空安全問題。目前香港雖然仲未有專為航拍機制定嘅法例，不過一樣受到管制。好似之前中環搞Formula E，有人用航拍機拍攝就因嚴重危害公共安全而俾警方拘捕。
而民航處係有就無人機作出安全操作規範，例如：
操作範圍：不得在機場交通區域或任何機場5公里範圍內操作。
操作時間：只限白晝。
操作地點：無人機不得在以下地方操作，其中包括：維多利亞港的沿岸地區
唔同國家法例就對航拍都有好大分歧，例如：日本市區幾乎全面禁飛；美國航拍機機主登記，有限重限高；中國15 公斤以上航拍機要開Geofence（地理圍欄），而且建議緊加裝 SIM 卡，方便當局追蹤。
事實上今屆立法會剛開始時，我已經係經濟發展事務委員會，提出要就航拍作出規管。最好訂明邊度、幾時可以飛，點拍先安全，咁就玩得開心又安心。
【補充一點】確實，大部份玩航拍嘅朋友都好自律，甚至好多航拍玩家都指責攝影師做錯。但當航拍機價錢越平，越普及，同樣係1%害群之馬，人數只會越來越多。
作為真心鍾意嘅航拍玩家，係應該盡快加入討論航拍規管。點樣減少航拍危險發生，同時又有空間令你地影到好相好片。否則等到有意外出現先立法，一定會嚴到迫死成個航拍界。我好需要大家意見，觀迎大家一齊傾。
