《梳化床》
我想買梳化床，要墨綠色襯返個牆，要假皮或真皮防貓抓，最重要係可以瞓到米八嘅我。
於是我上網加睇門市，睇咗兩個禮拜：
原來九成香港網店賣緊兩年前嘅淘寶款，非常過時。
茲曼尼已經冇做梳化床，佢哋張張梳化都做電動較位，再加個手機充電位，每次轉過塊皮就可以當係新款，實際選擇唔多。
實惠有梳化床，但冇墨綠色皮，佢哋產品比較大路，又有變形傢俬，即係一個牆櫃拉出嚟變床咁樣，係幾適合香港人，但係唔啱我。
宜家家俬依然係最多選擇嘅舖頭，搵到有張啱尺寸，但係冇墨綠色皮。
如果我喺宜家家俬買完，再自己走去配皮，成件事差唔多要洗成皮野。
然後我上淘寶，搜尋墨綠色梳化床。
完全符合我要求，都只不過二千蚊。
但係中國疫情嚴重，政局不穩，工廠停工，物流收皮。
如果省城割據，淘寶唔知會唔會分南北，遲啲會有淘寶三哥同淘寶。
總而言之，我未買到梳化床。
