關於 萬寧星期三氹氹你 ，我們在網路上蒐集到這些相關的討論、資訊與評價

［多謝連登先］恒指計埋98,03,08 又如何？

最好睇 medium，多圖

1. 上次篇文 (http://bit.ly/36QWXkj) ，結果推咗上連登(http://bit.ly/39aa4OV) 。實則我就好怕的。公海嘅嘢，以前01出公海都多數畀人狂插。唔知邊個幫我貼上去，但應該係睇我Facebook Page，因為佢貼咗個簡潔版，唔係medium 嘅呢個全版。雖然簡潔版都有貼全版嘅link，但相信冇人會睇．拿，今次想些牙就些medium呢篇啦，有圖．

2. 咁當然我是怕的，實情我連自己出咗嘅文都唔會睇返，亦唔會睇自己上電視嘅片段（聽講好多演員都唔睇自己嘅戲），諻論人地嘅評語。「但可能有人讚嘛」，況且，批評先令你學到嘢嘛。所以我都係好似布斯基斯咁忍唔住睇下

3. 咁一如所料，有啲批評我個人嘅就算啦，啱與錯都不重要，亦唔使辯駁。有啲比較有建設性但簡單嘅，可以好快回下：

4. 到時趺到2萬我仲成手cash — 真係會跌到2萬？況且，跌到2萬叫你買時你又可以話到時趺到1萬我仲成手cash。咁梗係有再跌嘅風險啦，幾時都有，但永冇可能捉到最底咯。我夠知2萬仲抵買，1萬仲抵— 但萬一唔會去到呢？

5. 有錢買美股唔好？—呢個我都冇反對。但我係討論港股嘛。唔通我叫你買美股時你又話有錢我買option唔好？我寫KFC，咁你話要買麥當勞，咪買咯。但唔係我嘅錯，唔好鬧

6. 至於話我氹人落搭嘅，又係come on，太睇得起我又太得起自己。我又唔係渣住幾百個單位，又唔係幾十億貨，要散貨使唔使唱好？唔好乜都陰謀論啦。我氹人落搭，我有乜好處？睇我咁多年我都係唱好多，要氹你，我都係唱股災氹人沽貨等我有得平執啦下話

7.話「睇歷史就預測到未來 個個歷史學家都係股神啦」嘅，絶對同意呀。咪話羅素雞咯。寫到明話一樣有輸錢嘅機會架，包生仔架？冇話預測到未來，但至少歷史係咁，當然下一次你可以唔同。咁你覺得下次一定唔同嘅，咪算咯。但你又點解覺得下一次一定唔同？
________________________________________
8.但我覺得，最有建設性嘅意見，係 「最重要d年份唔包,98,03,08,咁你預測d乜春」．真欽敬，非拗頸，係值得寫下

9.係喎，雖然我唔認為係預測，但呢個質疑係合理的。雖然我在原文有講過，其實最初係話睇「風平浪靜」嘅日子，冇大上大落，一樣成日會無啦啦一個月跌6.6%。所以由2010睇起。況且亦因為趕時間，同埋冇咁多位貼圖，同埋在屋企整，就揀10年算。medium篇文其實都有加埋08-09的。

10.咁但，真係的，呢個「最重要d年份唔包,98,03,08,咁你預測d乜春」，係合理而且高質嘅質疑。亦唔止連登仔講，朋友都有問。咁就要再實驗下啦。雖然未做前我都係有啲懷疑，爭幾年，真係爭咁遠？

11.咁好簡單，咪計次畀你睇咯。絶對唔係因為計埋條數唔得所以特登唔計唔貼出嚟。而係冇做過。
________________________________________
12.拿，盤古初開，1964年計起。全部每個月。電腦盲唔識cap晒圖，但就係全餐，有恒指以嚟，每個月，全部睇晒。邊個月跌得多過6.6%嘅，揀出嚟。然後睇下打後1個月，3個月，6個月，1年平均回報會點。幾多次升，幾多次跌。仲有升嗰幾多次平均升幾多，跌嘅幾多次平均跌幾多。其實就係上次做嘅嘢（冇聽書嘅，點解6.6%？，因為今年1月恒指正係跌6.6%）

13.另外都講下，恒指一個月跌6.6%，歷嚟都試過86次。咁即係，平均一年會有一兩次左右，其實比你想像中常見。亦即係買入嘅機會畀你想像中多（當然如果你信呢篇文先係）。

14.咁睇返，由盤古初開以嚟，用同一個方法，結論都係差不多（不過1個月係輕微負數），3個月，6個月，1年平均回報都係正數。而且越長越好。計次數，亦係贏多輸少，而且渣得越長贏／輸次數比例更明顯。已經計咗98,03,08。但可能會有人話遠古年代又唔計，話我拎啲以前好數去沖淡。咁就不如只計1998同以後啦？

15.好啦，戲肉，「最重要d年份唔包,98,03,08,咁你預測d乜春」，咁就包埋佢。睇睇會變成點。就1998年計起，之前啲黃金時代全部唔要。結果如下：

16.同2010年以嚟嘅，兩個圖一拍，見到啦，的確會拖低咗啲回報。但大結論係不變，恒指大跌6.6%後，1個月，3個月，6個月，1年平均回報都係正數。而且越長越好。計次數，亦係贏多輸少，而且渣得越長贏／輸次數比例更明顯。

17.所以，計埋，都唔會影響大結論。頂多贏少啲。下面話你知，計埋98仲勁呀！不過計埋08就唔掂。03？賣個關子，畀你估下。
________________________________________
18.另計，不妨睇埋98，03，08，呢三年本身。

19.先講1998，的確見到大檸樂，12個月有5個月係跌超過6.6%嘅。但見到，真係有危先有機，嗰年嗰5次之後去買，平均回報都全部係正數，而如果3個月或以上嘅，仲係比其他年份更好！而且，當然仲有例牌嘅一句：1個月，3個月，6個月，1年平均回報都係正數。而且越長越好。計次數，亦係贏多輸少，而且渣得越長贏／輸次數比例更明顯。特別留意，渣得一年嘅，全部贏錢。

20.咁再講埋，真正嘅世紀大股災，2008。慘無人道。其實都只係4個月有超過6.6%跌幅，但跌得好甘。所以你估到，真係唔work啦。你見呢4次後，你買入去，1個月，3個月，6個月都仲要輸錢，冇計。但，百年一遇嘛大佬。咁你堅持話要重演嘅，冇計。—不過留意1年後都仲有得升。「丁屎咁多」，喂，金融海嘯喎。而都講過，你由08到而家睇返，平均都仲係幾靚仔嘅。

________________________________________
21.咁最後，你話，喂，做乜跳咗2003，沙士？

22.答案：根本冇數可計！因為沙士嗰年根本冇一個月跌過6.6%。舊文都寫過，沙士由頂至底都大約係6.5% ，全年更加係大升(http://bit.ly/2Uc1hrJ) 。唔知點解好多人印象覺得當年股市好慘—其實係之前幾年最慘。呢啲，舊文有提過。

23.最後都講下我最新諗法。今次個底捉得不錯，但反而仲係有啲驚。回顧下：

24.上星期三（1月29日）我在Facebook Page講咗《經濟學人》封面測試(http://bit.ly/2RFdtzc) 。然後星期五（1月31日）朝就真係上埋《經濟學人》封面(http://bit.ly/2tlV8Oq) ，嗰日已經有啲反彈，但收市都係跌，但已喘定。星期一朝（2月3日）就呢度medium文章（就係呢篇嘅前傳）話埋你知恒指1個月跌6.6%，之後入市贏面大(http://bit.ly/36QWXkj) 。嗰日就真反彈見底。然後星期一晚就話你知 口罩股爆煲，入得市(http://bit.ly/2UA6Nof)

25.但，得幾百點，唔好自滿，況且時刻保持警剔。其實我原本係預星期一「終極一跌」(http://bit.ly/2SmNKL1)可能插多一千點，結果冇。咁結果恒指頂位到底位（暫時的），跌3000點都未夠，其實都未夠10% — 真係好似唔算多。

26.不過無論如何，有時寧願冷血啲，信數字。就睇返，跌完6.6%，之後渣返1個月，3個月，6個月，1年 ，贏面就真係幾大的。係贏面大，但唔係贏硬嘛。要包生仔嘅就唔好買股票。我用咗咁多不同嘅time frame，包埋你提出質疑嘅，應該可信啦掛？當然back test實可以準，都要睇背後個rationale，但呢個別人恐慌時係買入機會，聽落都似樣嘛？至少點都唔係特登避開嗰幾年昆你啦。高抬貴手呀

27. 而結果，我出上篇文時，星期一未開市。我當你計收市（嗰日冇乜郁），26,357。而家我寫完篇文，星期四收市，27,493。近1100點，4.3%，唔算十分非常之差啦掛。幾日咋喎。

香港人抗爭之火不熄，都要多謝好多人用抱薪救火。

「冇人想佢完，咁就繼續啦。」
Medium Link: https://link.medium.com/BCzTFgUUP0

-\-\-

2019 年 10 月 16 日，一個尋常嘅星期三。

短短 24 小時之內，唔使多，四件事，已經足夠香港人氹氹轉。

由朝早講起，係美國眾議院一致，無錯，係一致通過《香港人權及民主法案》。議案將會交到參議院審議，日子未定。香港人持續四個月有多嘅示威，加上政界人士幾年嚟在明在暗嘅游說，終於促使美國政界作出實質回應。

另一邊廂，中共同港共政府例牌堅決反對外國勢力干預內政，其中特區政府嘅聲明表示「警方一直保持克制，嚴格根據法律執法。警方根據武力使用指引，在實際可行的情況下，在使用武力前發出警告，同時只使用適當的武力。警方執法行動的目的是為保障市民大眾的生命財產，將違法人士繩之於法，盡快令社會恢復秩序。」

聽完，人唔笑，狗都吠。警暴問題，已經成為香港水深火熱嘅源頭。而政府仲要攬呢三萬警務人員。

-\-\-

接近中午，行政長官林鄭月娥喺一片混亂之中宣讀唔到《施政報告》，破天荒要播影片去發布。成份報告乏善可陳就預計之中，畢竟收回土地、增建公營房屋呢啲長遠房屋政策，遠水點都救唔到近火。將首次置業按揭保險嘅樓價上限推高至 800 萬，就日頭已經講到口臭，唔重覆，自己睇。 (https://link.medium.com/gL8IFpNcP0)

至於林鄭讚揚警隊、譴責「暴徒」，就只係延續佢呢幾個月嚟嘅作風 - - 呢種熱愛令人諗起旅遊業同零售業如何寵愛大陸自由行旅客甚至水貨客，都係透過不可持續 (unsustainable) 嘅刺激去獲得支援同利益。

本質上，同食鴉片冇分別。

但慘得過晏晝，當林鄭出席記者會而被問及佢係咪「攬炒之母」嘅時候，林鄭仍然覺得「暴徒」先至係將香港推至水深火熱嘅源頭？當記者引述民意調查反映，大多數受訪者認同要林鄭呈辭、大規模重組警隊嘅時候，林鄭都只係重申自己已經不斷回應呢啲問題，而問題唔會因為一個民調結果而改變。

你覺得，佢真係聆聽市民嘅訴求？定係只係活喺自己嘅世界入面？

-\-\-

下晝，新聞傳來香港知專設計學院發放更多 15 歲女生陳彥霖生前喺校內出沒嘅片段。然後，好快就已經有眼利、觀察入微嘅網民指出，片段入面嗰個衣著看似同陳彥霖一樣嘅女生，其實係另一個人。從身型、面貌、神態等，都好明顯有出入。

然後《蘋果日報》亦報道，喺 9 月 27 日，即係赤裸浮屍被發現嘅六日之後，警方向校方索取片段，搜查令上列明係用作調查一樁謀殺案。但過咗幾日，警方再同校方聯絡，就改口為「屍體發現」案。

問題嚟喇：點解 9 月 27 日，即係警方仍然循謀殺案方向調查案件嘅同一日，陳媽媽收到陳彥霖嘅朋友來電時，表示自己早一日獲悉女兒死訊，未認屍亦未知死因，但已經講定「唔想搞大件事」同勸對方「千祈唔好同人講」？點解 9 月 28 日夜晚陳媽媽要喺 Facebook 出 post 話女兒嘅死「不涉政治」？

嚟到 10 月份，知專扭扭擰擰、擾擾攘攘之後，擠牙膏式播出閉路電視片段。原先以為係釋除公眾疑慮，但係影片嘅真確性同正當性都備受質疑，究竟知專同警方知道啲乜嘢不可告人嘅秘密，需要自編自導自演另一個故事去掩釋一個 15 歲女孩遇害嘅案件？

當查案、搜證嘅，同有嫌疑嘅，都係來自同一個團體，即係香港警察嘅時候，你如何說服我調查會公平、公開、公正？香港嘅行政機關權力已經龐大到不受立法及司法制度所制衡，警察嘅任何過失、濫權都可以不受懲罰同約束，反而會得到行政長官嘅讚許同認同，試問市民嘅福祉同社會嘅安寧，又由邊一個保護？我諗好多人都等緊 Batman 或者 Ironman 現身去打救大家。

-\-\-

當你以為呢一日已經發生咗夠多事嘅時候，晚上，民間人權陣線召集人岑子杰喺旺角被鐵槌扑頭受傷，頭破血流。呢一次，係佢喺幾個月以嚟，第二次被襲擊。

過去一段時間，香港人都會發現一個重複嘅現象：當政府擺出姿態去議和、用懷柔、對話嘅方式去處理反政府示威嘅時候，自自然然就有暴力事件發生。林鄭八月尾宣布舉行社區對話，然後發生 831 太子站警暴事件。林鄭九月尾真係同 150 個市民對話喇，然後 10 月 1 日警員實彈槍擊學生。今日林鄭發表《施政報告》，民怨四起而持續醞釀 10 月 20 日九龍大遊行，然後就有岑子杰遇襲。

我已經唔識區分林鄭月娥、警隊、鄉紳、黑社會、何君堯、梁振英、中聯辦以至港澳辦嘅分別。或者佢哋之間互相勾結，亦可能勾心鬥角，甚至大家圍埋一齊作反，諸候反制中央。

大家心知肚明，香港嘅金融體系同資金自由進出嘅對中國嚟講至關重要，香港唔可以滅亡，亦唔可以行「一國一制」；但中央亦唔會允許特區政府向示威者讓步，莫講話畀香港獨立或者擁有更大自治權，免得其他省份或自治區有樣學樣，最終令中華人民共和國分崩離析。

於是，呢個混沌 (limbo) 嘅狀態成為有心人發國難財嘅好機會，無論係擁兵自重，或者趁機會撈油水賺維穩費，總之，香港越亂，對於某啲人嚟講，越好。「止暴制亂」係中央嘅指示 (mandate) ，但係呢個指示同某啲人或某個陣營、派系嘅利益有衝突。佢哋嘅心態就好似開 party 咁，「唔好畀佢停」。

都好嘅，四個幾月嘅動盪，喚醒咗好多香港人沉睡嘅心靈，更
加將香港喺「一國兩制」之下，自由、自治、人權同民主逐步被扼殺嘅事實搬上國際舞台。香港已經置身於民主與專權國家兩套價值觀對抗嘅鋒面，無論輸贏，基本上都係 all or nothing 嘅結局。

香港，已經回不去了。但既然冇人想佢完，咁就繼續落去啦。