我又要嚟分享我嘅古怪成長經歷，今次輪到我老母。
頭先啱啱ig story分享咗～
一個驚為天人嘅烏冬！
收到海量嘅回覆，全世界都食過，
全世界都知响邊度買。
然而，其實我係非必要嘅話都唔會食即食嘅嘢。
我記得好細個嘅時候，一放假就會去香蜜湖旅行。由於我驚鬼，我會帶好多耶穌同聖母嘅相去酒店貼响床頭。夜晚，我唔記得邊個，會煲水整杯麵。我覺得杯麵好臭😂所以我都係去到中學先跟潮流食下。而家人大咗，尤其去露營嗰陣，任何一款杯麵都係救贖，咁但係我不嬲都冇乜興趣去試即食麵或者杯麵嘅。
講到呢啲古怪飲食習慣就不得不提我阿媽。我好細個嘅時候，佢已經同我講，麥記嘅蘋果批唔食得，因為會嘔。而我細個係一個好易會嘔嘅人，搭長途車會嘔，坐船如果要坐冷氣位我一定嘔(that’s why 我好討厭去大嶼山或者長洲，因為佢得呢啲船選擇)太早起身會嘔，所以逢星期六如果係長週要返早，我排緊隊集合嗰陣時就會嘔。
既然係咁，我阿媽話蘋果批會嘔，所以你估下我幾多歲先食第一個麥當勞蘋果批？係中六！仲要我發現係勁好食！我記得我問過阿媽，點解你話會嘔？佢好似話純粹佢唔中意食。另一樣嘢就係麥香雞包。我細個好少去麥當勞，如果佢都係食魚柳包同麥樂雞，因為我阿媽話其他包都係會嘔。但係最厲害係，到我中學，都應該係中六咁上下，受到蘋果批好好食呢個衝擊之後，我就試埋麥香雞包。頂！原來麥香雞包係好好食！就係咁樣，我先慢慢脫離呢個枷鎖。
講返杯麵碗麵以及係零食，其實我唔係一個鍾意食零食嘅人，亦都可能因為咁我根本唔會肥得去邊。每次去旅行，個個去到便利店都瘋狂買零食，返到房沖完涼又要預返個時間開零食大會，但係我對呢啲嘢又完全冇興趣，食麵唔會飲味精湯，但我強調我係好鍾意出前一丁，日本版出前一丁我真係煮得好好食。
我諗大家都知道，我搬出黎住其中一樣嘢就係唔想我阿媽再搞我啲嘢。話說前幾日，我表弟想攞個頌砵，好明顯呢樣嘢就响舊屋嗰度。我阿媽不停話佢搵唔到，淨係搵到敲砵嗰支棍，佢話我攞咗個頌砵走。首先我攞個砵但冇棍，唔通用嚟撈麵咩。咁我諗住唔理佢啦，點知5分鐘之後我阿媽出現喺我間屋。然後佢開始入我士多房摷嘢。I was like🥸難道我唔知自己間屋有乜嘢？同埋點解你落嚟我間屋度自己揾嘢🥸
結果我都係冇理到佢嘅。
到最後佢話佢返去舊屋搵另一間房。
I was like 原來你話搵嚟搵去都冇，但係有一間房你係未搵過😂咩呀😂
就係咁，如果你覺得我痴線，係我父母做成㗎。
