臨急臨忙的飯局。
早上十一點多，Gphone 黃之鋒 Joshua Wong send message比我，問今晚得唔得閒食飯。
而家其實大家都得閒，只不過未必敢出嚟。
我提議去逸東軒啦，反正之前都同佢提過下呢間。
即日仍然訂到即晚的枱，雖然晚市有七折，但與中午＄38點心的推廣相比，反應始終無咁熱烈；既然有枱，就拿拿臨徵召大家都識的朋友，只限四位，多一個都無，順得哥情失嫂意，唔好話我做乜唔叫，我只能叫你去問問林奠，唉。
一行四人，我、Gphone、最近好紅的辣椒、還有W，四個都好準時，酒店中菜廳當然做到足，入門口要探熱，每張枱保證有一米半距離，六人枱坐四個人，感覺闊落。
有朋友在上星期來過，說菜式水準好，服務就一般；都市傳說，Gphone一坐低就可以測試到餐廳係黃定藍，果然是一個重要指標。
（諗諗下，我應該帶佢去上兩年我經常去，但立場不明的中菜館。）
這裡無話自己係黃，但外界覺得這裡是黃，見到飯店侍應，經理，對我們招呼好好，有講有笑，辣椒的一句：（玻璃蝦球無玻璃。）侍應笑騎騎回應：（等我扑爛塊玻璃加上去。）
服務好而不嚴肅，啱我。
說回當晚吃過的菜，叉燒的質素是不用懷疑，本地豬的食味不遜西班牙黑毛豬與匈牙利綿羊豬，與這班人一起食飯，面前的黃金鮮魷，名符其實的黃到金。
是日例湯、大蝦二弄、啫啫蝦醬生菜煲、脆皮雞、鮑汁荷葉飯，與及甜品，全部都做得很好，七折價每位＄450，米芝蓮一星級中菜，物有所值啦。
PS：當晚真係遇上食環署突擊檢查，酒店嚴守規矩，梗係無事啦，但這段限制令，真的只限這兩個星期？
Eaton HK
