【其實，我哋都係等緊一個，吸引自己回頭嘅人。】
作為一個繁忙嘅都市人，我哋好似已經忘記咗緣份係乜嘢一回事。每日每夜奔波勞碌，面對嘅唔係虛假臉孔，就係冷冰冰嘅螢幕。每次當我夾喺人群中間無意義咁向前走嘅時候，我都會忍唔住問自己：「究竟生活喺呢個地方，係唔係冇嘢再值得我哋去回頭欣賞，用心去感受清楚？」
一直問、一直問……直到有一日，俾我遇上佢。
嗰日我如常係金鐘站轉車，行行下聽到有把聲音喺後面叫我。
「先生，你係咪跌咗隻錶呀……先生？」
我擰轉頭，第一眼就俾眼前呢位長髮，帶住眼鏡感覺非常斯文嘅少女深深吸引住。
「我冇跌到……」我隻錶仲安然無恙咁戴喺手上面，「況且款式都唔同，妳手上面呢隻明顯貴得多喇。」
「咁奇怪嘞，」少女皺起眉，「我明明見係喺你附近跌出嚟。」
「呢度金鐘站，咁多人行嚟行去，睇錯都唔出奇嘅。」
「咁好喇，我過去交俾客務中心。」
睇嚟佢都好趕時間，一講完就匆匆忙忙咁轉身走咗去。原先我係有衝動想叫停佢，但佢比我快一步回頭，對住我微笑道：
「對唔住呀，累你走咗班車。」
「啊……」
事實就正如佢所講。錯過咗呢班車，加上嚟到金鐘站準備轉車嘅人越嚟越多，睇嚟今日又逃唔過遲到嘅命運……雖然係咁，但我一啲都唔介意。
以上，就係我同A小姐（金鐘英文為Admiralty）相遇嘅經過，簡單但深刻。
其實最初，我都冇諗過會可以再遇返佢。估唔到三日後嘅星期一，當我喺金鐘站迫落車嘅時候，居然俾月台上面嘅一張面孔吸引到。我冇跟隨其他人嘅步伐走去對面月台，而係回頭望返入車廂……
呢刻，A小姐就企咗喺車廂裡面。佢好快就注意到我望緊佢，最初都顯得有少少驚訝，但好快就換成為微笑。一個簡單嘅點頭後，車門就關上咗。
一次再會、一個微笑，成為咗支撐我一整日嘅原動力。彷彿係灰茫茫嘅世界裡面發掘到一點彩色一樣，第二日，我刻意揀返差唔多時間，挑選同一卡車廂，到金鐘站落車嘅轉身望返入去……
果然，又再一次俾我見到A小姐。當刻我終於明白到，呢個並唔係巧合，而係我哋之間彷彿心有靈犀──我哋都係等緊呢一刻。
雖然只限於閒日，每次得幾秒，過程又冇任何對話，但已經足夠等我去了解A小姐。例如，從衣著同手環我知道佢鍾意嘅顏色係桃紅色、尤其鍾愛嗰一條桃紅色嘅長裙、逢星期三佢嘅妝扮都會相對樸素（可能係前日工作太夜唔夠瞓）、一個月後佢開始轉戴隱形眼鏡、仲有……我知道佢係做護士，因為有次星期三我見佢著錯咗對白色護士鞋。
呢段「關係」足足維持咗兩個月。可能你哋會覺得我同A小姐都係傻嘅，點可能兩個月都唔講半句說話。或者，我哋兩個都係被動而又寂寞嘅都市人，無可救藥地追求緊一段奇妙嘅時光。
不知不覺，終於嚟到呢一日。行出車廂，我慣常咁轉身回頭，但等待我嘅並唔係熟悉嘅笑容，而係係眼泛淚光嘅A小姐。
──請勿靠近車門，請不要靠近車門，Please Stand Back From the Doors──
回過神嚟，我已經轉身跑返入車廂裡面，企咗喺A小姐隔離。
「妳……」原先我仲想講『妳好』，但最後都係放棄呢個愚蠢嘅開場白，「妳做咩喊？」
短暫嘅沉默後，A小姐先抹一抹眼淚再回答：「其實隻錶……係屬於我前度男友。」
「吓？」我好意外，「咁點解嗰日妳……」
「其實我同你第一次見嗰陣，我同佢已經分咗手一個月……嗰日，我決定好要將所有同佢有關嘅嘢都處理好，包括呢隻錶……」
「我明喇，妳想交俾其中一個路人……」我恍然大悟，「呢隻錶睇落咁貴，相信好多人都會扮係自己最後拎走……」
「但你最後並冇拎到……」A小姐微微一笑。「我嗰陣都好意外。」
「但妳點解要選擇我？」
「可能，我感覺到你同我一樣都係咁寂寞、又可能，因為你係現場唯一一個冇拎起手機嘅人、又或者講到尾所有嘢都係巧合……但事實係點重要咩？重要嘅係……」
「重要嘅係，我而家喺呢度。」我接住講，「A小姐……」
「Natalie……我叫做Natalie。」
「Natalie，妳都係未答我，點解妳會喊。」
「點解？」呢刻， Natalie 已經再忍唔住淚水，「因為……我突然間好感觸，就好似……早就預見到呢個結果咁。」
預見到，我會第一時間追上去──
──最後以一吻，表達我對佢嘅感覺。
緣份，有時就只係等緊你一個回頭。
*
距離嗰一日，轉眼間又過咗三年。
「你出去喇？」見我換好衫準備出門，躺喺床上面嘅 Natalie 問。
「嗯。記住今晚戲院門口等喇。」
Natalie 點點頭，再撐起身跟住我行出房。打開廳門臨走之際，我又忍唔住擰轉身回頭望。
「Matt，今日一定要加油呀。」
曾經，我都有認真諗過，到底吸引我回頭嘅係乜嘢，Natalie 嘅美貌？衣著？性格？抑或係一種永遠冇辦法理解嘅不可抗力？但原來答案好簡單……
「我一定會。」
……就係一個簡單嘅微笑，永遠都吸引到我去回頭欣賞。
（完）
各位，鍾意呢個故事就 Like 同 Share 出去喇，睇埋下面有嘢益大家！
想知道自己吸唔吸引到人回頭？
Click 入呢條 Link 試下喇：http://bit.ly/RSRKO09
玩完仲有免費 reenex 膠原自生 Treatment 同 BIODERMA 深層卸妝潔膚水送㗎！
reenex膠原自生 C孔 l Carol Hung #男生秒回指數大測試
