致事業心強的女生 不要成為自己口中那個難頂「阿姐」- Fumie
香港地女多男少，職場上女生上位機會愈來愈多。加上女人當自強的觀念，不少事業心強的女人都希望晉升到經理、上司職級。不過根據非正式統計，打工仔不論男女，都怕跟住一個女上司，原因可能你都曾經經歷過！
無論你的身份已是上司，或即在不久的將來會上位，都要看清以下幾點，避免成為被下屬討厭的「阿姐」。仲有，以下內容集合多個真實案例，如有雷同，歡迎對號入座！
1. 忌以猶豫不決方式處事
「今日的我打倒昨天的我」已經是過去式，最新發現是女上司竟然係「四點的我打倒兩點的我」！「無路捉」實在是當上司的大忌，下屬根本無辦法跟住一個方向推進工作。Version 1 的proposal 被改到Version 26 (仲要內容其實差別無幾)，折騰完一大輪又回到最初的起點，幾有心的同事都會做到burnout。對住一個三心兩意的「阿姐」，下屬好可能只會拖慢工作，「反正都比阿姐改嚟改去，求其交咗先」。
2. 忌成為工作狂
一個女人要升到管理層，管治一大班下屬，除了好努力工作，性格也要夠硬朗。不過緊記，你要做女強人，唔代表你的下屬全部都要陪你朝八晚十二。有些女強人甚至抱有「女人要靠自己」的心態，強硬訓練女下屬成為明日的自己。可能你需要全情投入工作，你下屬未必可以，亦都未必想。人生除了工作，其實還有家庭同生活。
3. 收工後忌開媽咪Mode
工作狂的另一個極端，係過度關顧下屬。明明已經放工，阿姐還打電話過來噓寒問暖，「份工做成點啊？攰唔攰啊？今晚早啲休息啦…..」其實這一種所謂「慰問」，對下屬來說是另類OT。況且，如何同下屬保持適當距離，都是一種管理藝術。
4. 忌重男輕女
不錯，異性相吸、女人有母性嘛。阿姐通常都會對男下屬態度比較好，相反有時對女下屬就較不客氣。上司對下屬有偏好喜惡雖然可能是人之常情，但「大細超」到出曬面，唔止惹來女同事討厭，男同事亦不想被「厚待」！試想想，被女上司偏愛的男同事仍然要繼續與同事共事，同事或多或少對他充滿敵意，根本是陷他於兩難啊！
5. 忌化身職場訓導主任
有個朋友最近轉新工，但已經又想再搵工。事關佢久不久就被阿姐捉入房：
「裙太短...」
「個踭太高啦！」
「做咩整到啲Gel甲咁樣？點見人？」
「仲細啊？你著得咁唔Pro！」
可能你會覺得阿姐此行為跟工作專業有關，其實內心點都有啲妒忌成份，畢竟下屬年輕貌美，阿姐卻怕被搶風頭，失去上司風範。朋友話每次被阿姐評頭品足，中學的回憶都返曬嚟，對呢位「訓導主任」感到怕怕，亦覺得被針對！
原文：Cosmopolitan
#職塲
