《一生所愛》
♂：早晨
♀：早晨
♂：睇返大話西遊，每一次睇都好似睇多左野
♀：你對愛既答案又有冇唔同到？
♂：如果以前既我，會覺得同你唔算係愛，我覺得愛至少係要兩個人係埋一齊，但原來……兩個人唔係一齊都可以有愛既感覺
♀：愛從來都無答案，只有當事人先知有冇愛，點解愛，旁人睇可能會覺得好唔合理、好兒戲、好反智，拔到把劍就係天生一對，人唔笑狗都吠，但愛就係可以咁無稽
♂：記唔記得唐三藏講個句，你愛啊，你愛要講嘛，你唔講，我又點知你愛呢？雖然你咁有誠意咁望住我，但係你都要同我講愛嘛，以前我會覺得佢講得好無厘頭同好煩，但依家我覺得佢好似用最無厘頭既方式教訓我
♀：咁悟空，你愛唔愛啊？
♂：我愛你啊
♀：你知唔知好多女人都成日問，你愛唔愛我啊？
♂：係，男人聽到就會覺得好煩，乜愛講就係咩？
♀：我愛你呢三個字，當相愛既人講，係非常甜蜜，如果本身係愛既，就係錦上添花；但如果本身唔夠愛既，講出黎，都可以令大家覺得心安，感受唔到，聽到都收貨
♂：原來男人自認為好識邏輯，但其實只係睇到最表面，連鬆埋答案比佢地都要拗頸
♀：仲有，至尊寶講個一番大話，你估紫霞唔知咩？只係佢願意再信呢個男人，連自己都呃埋，或者佢只有咁做先可以有一線生機
♂：孫悟空最後一幕咪係個城門度見到紫霞既化身既，你有冇留意到個陣佢無頭痛，因為佢對呢個紫霞係無愛
♀：呢幕我又真係無留意……
♂：佢個心入面，留低左兩個人，一個係白晶晶，一個係紫霞，而有趣既係，入過佢心既，就只有呢兩個人，之後就再無人入過去，依家我覺得佢最愛既真係紫霞，之後都唔會再有其他人，即使係一模一樣既人都好，都唔可以
♀：良心係唔會講大話，白晶晶入去既時候，問至尊寶係唔係真係愛佢，良心答係，當時白晶晶都好開心，然後佢臨走再問左句，佢係唔係最愛自己，然後……
♂：然後佢就走左，因為良心講左真話佢聽，明顯編劇既價值觀係，人可以真心愛多過一個人，但亦會有高低之分
♀：係，一個78次，一個785次
♂：仲有，至尊寶話想睇下自己心入面留低左咩係度，叫人劏開個心口等佢睇下，但講真，佢點會唔知？當佢死左個陣，佢即使睇唔到心入面既野，佢都講得出個樣野係乜
♀：係，後悔既原因，人人都知，但人人都想其他人話佢知，等佢可以確認到
♂：而當一個人後悔，真正覺悟時，佢就會天下無敵
♀：可惜呢個無敵既人，係建立係無數痛苦之上
♂：我唔想後悔……呢句我愛你，我想依家就同你講，無論結局係點都好，呢一刻既感覺都係真
♀：你真係諗清楚
♂：每次我都覺得自己諗清楚……我唔敢答你我以後會唔會再諗多少少……
♀：唔需要諗太多，依家你咁諗就得
♂：我係你樓下
♀：下定決心之後，就要好好努力喇，知唔知一套好既作品就好似西遊記咁，會令人係不知不覺中改變，我相信你都可以寫到令人變得更好既野
♂：我會，我好掛住你
♀：夜喇，唔好掛咁多
♂：我會夢見你，晚安
♀：好啦，晚安
PS. Patreon 獨家短篇 四條仔去Staycation上篇《響21》已上載，這是一個講述出軌的短篇
#長傾不見 #蔣薇 #小說 #故事 #好久不見
未睇過既重頭睇：
https://www.patreon.com/maydreaming/posts?filters[tag]=長傾不見&sort=published_at
西遊記 晶 晶 在 我們都愛周星馳- 《齊天大聖西遊記》角色關係圖至尊寶真是 ... 的推薦與評價
《齊天大聖西遊記》角色關係圖至尊寶真是...交友廣闊XDDD 1995 齊天大聖西遊記/西遊記大結局之仙履奇緣A Chinese Odyssey Part Two: ... 請問紫霞跟晶晶有關係嗎？ ... <看更多>