【請關掉手掉電話、傳呼機及響鬧裝置】
八神好鐘意睇電影，所以特地申請左百老匯的insight pass，一年俾$2000幾蚊可以任睇，再加上百老匯會籍，可以在kubrick買書飲咖啡都有折。八神的妻子比較鐘意睇話劇，所以都有被妻子感染，一齊去睇話劇。
今日呢個主題，唔係想講電影與話劇的分別及甚麼研究，而係想講，在電影院及劇院內的一些體會。
我試過因為生病，那幾天都不斷咳嗽，對身邊人做成騷擾，其實我是很不好意思的。碰巧在生病的日子，妻子很早買了話劇入場飛，我就陪妻子去看，結果，成場不斷咳嗽，搞到大家都無法專心去看一場好戲。事後諗返，生病當然不是罪過，但明知有病而入場就是罪過。
其實每個鐘意入場睇戲睇話劇的朋友，都會很尊重成件事，例如盡量唔遲到、盡量禮貌地細聲說話、盡量在入場前去晒所有要去的大小異便、要熄晒所有手機或其他有可能會響的器材。以上呢D野，如果大家真係尊重件事、希望可以專心睇戲睇話劇的話，作為觀眾，自己定會有所執著，自動自覺會去做的事，不用任何人提醒。
但係，我每次跟妻子睇話劇又好、我帶妻子去戲院睇電影都好，每一次，我好肯定每一次，都會有人唔記得熄手機———至少，應該要調較為震機模式。我會很討厭呢D人，咁大個仔唔係第一次入場睇戲，點解連熄左部手機都唔會記得？在此講明，類似情況，甚少發生在油麻地的百老匯電影中心，我相信真正喜歡電影的人，都情願專登過黎睇戲。
試過很多年前，當華懋戲院仲未執笠時，我在凌晨時分和友人睇深夜場。電影播放中，「如常地」，有手機響。如果我是手機的主人，我會很不好意思，馬上找回手機關掉，絕不會接聽（其實很多人在戲院都會照聽電話的，仲講到勁大聲，完全冇理過其他觀眾感受），而且想辦法盡快熄機。但係，當晚的手機，響了很多次都冇人理會！電影不斷播放，手機又不停的響，由於冇人「認頭」，根本唔知係邊條友唔記得熄機。手機鈴聲總共響了五次，每次係有約一分鐘的長度，真係好討厭！後來，我眼見前面有位仁兄，在第五次響鈴時，懶係型咁，將個響緊鈴既手機拎出黎，然後向銀幕下的「出路」位置拋擲出去！
我想講的是，可能你部手機壞左熄唔到機，你掟自己部手機係好型，但係問題係，部手機被你掟左出去之後，仍然繼續響！根本解決唔到問題！如果，你部機真係有問題熄唔到的話，可以連人帶機離開電影院一會兒，然後靜靜地自己找個地方拔出電池嗎？
講左咁多年，入到場都仲梗係有鈴聲響，咁樣樣，真係嘥晒大家的心機。人地咁有心機整條片出黎提你，你地有冇睇架？
撰文：八神 Louis Ng
https://www.youtube.com/watch…
#請關掉手掉電話 #百老匯電影中心 #百老匯 #手機 #熄機 #林二汶 #A仔聯盟 #電影 #話劇 #舞台劇 #電影院 #戲院
