Search
轉頭要返香港喇～雖然只係留得一星期，LA 成日塞車又因為地方大而難行，但呢個星期喺有加洲迪士尼嘅Anaheim、前後分別偷一日去嘅荷里活同埋聖地牙哥，都過得幾開心。返到去會寫番呢個最大型Youtube /Online Video Event 的見聞 (即又係書面語長文 ∑(￣口￣) !!!
P.S. 我响美國一星期只買過三杯咖啡係咪叻豬先！！呢個土炮品牌Latte 我都好中2 ar ( ´▽` )ﾉ
普教中的災難...
=====節錄.=====
原來豪仔所學嘅中文字並唔係由最基本嘅一橫一棟一點，先學部首寫出黎，而係直接由拼音拼出黎，即係佢完全唔知道中文字嘅部首為何物，更加唔知道每個字嘅結構係點。
而仲有一個更加嚴重嘅問題，就係豪仔完全唔識得 「依啲，果個人，做乜呀，咩事，搞乜嘢……」呢類字點寫同點讀。原來佢係完全唔識得去睇廣東話字， 即係佢只係識得講，唔識得去睇同埋從書面語上讀出廣東字甚至中文字，佢只係識得用普通話去讀出書面上嘅文字
【原來而家啲精英班是咁的】
當有一日你發覺自己讀緊小學嘅小朋友連用廣東話去讀出一段書面語都唔識嘅時候，你會點諗？ 個小朋友智商有問題？定還是學校有問題呢？ 但原來你個小朋友係讀緊學校嘅精英班……
話說有日我返阿媽度食飯，撞岩有個親戚上黎派帖。
呢個親戚住上水，佢帶埋個岩岩放咗學嘅囝囝上黎，上度黎就同我阿媽傾下偈，都係啲阿邊個生咗個女，阿邊個邊個就黎嫁嘅八掛野。 講下講下就講到佢個讀緊小學三年級嘅囝囝讀書好醒，而家讀緊學校嘅精英班。
我睇佢個樣都尚算精靈，就問佢考第幾呀，佢答我全級考第十五。
唔，都真係幾叻仔，於是我就讚下佢啦。又問下佢大個想做啲咩職業。
「我想做醫生。」
「點解豪仔你咁想做醫生嘅？」
「媽咪話做醫生可以幫到人，又可以賺到好多錢。」
「邊個話做醫生可以賺到好多錢架？」
「媽咪成日都話姨姨做醫生賺到好多錢。」（佢指我家姐）
「咁你係想幫人多啲，定還是想賺錢多啲呀？」
「唔……兩樣都想。」
「咁你就要努力讀書先做到醫生架」
「我一定會，不過之前我話想做醫生，唔夠陳小明高分呀。」
「點解呀？」
「之前老師叫我哋講我的志願，陳小明話想做個建設國家嘅人，佢高我十五分呀。」
「可能人地寫得好過你呢。」
「唔係寫，係講咋。」
其實我唔太明白豪仔所講嘅只係講係咩意思，不過算啦，小朋友講嘢有少少1999都唔係太大問題，所以就無再追問落去。
親戚坐多陣就話要去派埋其他囍帖，留低豪仔喺我屋企一陣，然後就出門派帖。
親戚出門無耐，就見豪仔喺個書包度拎啲功課出嚟做，睇黎佢都真係幾乖幾勤力。而我就入房Hea下。
Hea緊嘅期間，豪仔走去房門口問我：「哥哥我可唔可以問你功課呀？」
「你問啦。」
「電視嘅字母點拼呀？」
「television」
「television？好似唔岩……咁電器呢？」
我當時心諗點會唔岩呀？咁簡單嘅英文字母串法我又點可能會錯呀？不過算啦，答埋佢先啦。
「E…l…e…c…t….r」當我讀到R字，都仲未讀埋之後兩個英文字母嘅時候，豪仔就大叫。
「唔岩呀，差好遠呀，哥哥你究竟識唔識架？」
我俾佢搞到一頭霧水，放是乎就問佢拎份嘢嚟親，一睇原來佢係問緊拼音。唔怪得佢剛才問我點拼而唔係問我點串啦，不過拼音呢家野我真係無學過，所以都解答唔到佢。而豪仔亦好無癮咁樣走開咗。
親戚派完帖返嚟見豪仔仲做緊功課，就多口同佢講話如果唔識就問我，但豪仔話問過我都唔識，佢而家唔知道呢題嘅正確答案係咩…
「阿飛你竟然連小學三年級嘅中文都唔識呀？」
「佢唔係問我中文呀，佢問我普通話拼音呀，我無學過又點識喎。」
連時下嘅小學三年級功課我都唔識，其實都幾尷尬下，所以我都係唔再出聲為妙，但轉頭諗一諗，點解中文課要學普通話拼音嘅？而家小學唔係有普通話堂架咩？拼音呢啲野，應該留返普通話課本學先得架，點解會走咗去中文課本上面嘅？
我好奇怪，於是就再次走去睇下豪仔嘅課本，然後問個親戚點解中文課要學普通話拼音嘅？點知個親戚好自豪咁答我：
「豪仔讀緊精英班，佢地嘅中文堂係用全普通話教架，所以學拼音係好正常架。」
吓，我心諗小學中文堂用全普通話教，咁如果教唐詩三佰首嘅話，你叫讀出嚟咪好怪？
於是我就忍唔住問個親戚，點知佢答我話只有精英班果三十人先係咁樣，其他班上中文堂係用返廣東話教。愈問我就愈覺得奇怪，點解精英班要用全普通話上堂呢？於是我就繼續問落去，到最後，我發覺有一個好嚴重嘅問題……
原來豪仔所學嘅中文字並唔係由最基本嘅一橫一棟一點，先學部首寫出黎，而係直接由拼音拼出黎，即係佢完全唔知道中文字嘅部首為何物，更加唔知道每個字嘅結構係點。
而仲有一個更加嚴重嘅問題，就係豪仔完全唔識得 「依啲，果個人，做乜呀，咩事，搞乜嘢……」呢類字點寫同點讀。原來佢係完全唔識得去睇廣東話字， 即係佢只係識得講，唔識得去睇同埋從書面語上讀出廣東字甚至中文字，佢只係識得用普通話去讀出書面上嘅文字……
咁即係代表住佢每次讀中文，心裡面都係用緊普通話……而唔識得用廣東話，因為佢根本就唔明白點解……呢個情況，仲誇張過班外國長大嘅ABC， 人哋唔識得讀中文書面語係因為人地活於英文嘅社會。而豪仔喺香港出生同埋長大，竟然只識得用拼音去拼個字出嚟，更加唔識得用廣東話去讀出書面上嘅字。
呢啲仲算什麼精英班？呢啲擺到明就係將一班本來精於學習嘅小朋友率先進行洗腦，將佢地本應學懂中文字結構點寫，同埋點去用廣東話閱讀嘅權利剝奪，繼而將一切用拼音與及普通話取而代之。
時下好多家長，好多時都好似我呢個親戚咁樣，本身無乜點讀過書，以為將個仔交得俾學校，就算唔期望佢學到好叻，最少都唔會估計到自仔讀緊精英班嘅囝囝竟然只係識得拼音同埋用普通話去讀書面訂。
你哋學校搞到人哋個仔咁樣， 呢啲仲算唔算香港教肓，點解一間非國際學校，仲要係東華三院辦嘅普通學校要咁樣嚟教學？你們還有沒有良心？
我唔知而家香港仲有幾多間咁嘅學校用緊咁嘅模式去教啲所謂嘅精英班，但係最少就有上水東華X院港九電器商聯會小學。 你地不如將校舍搬過去深圳啦。唔好教到我地香港小朋友連用廣東話讀書面語都唔識先得架。
