關於 里奧叔叔的台灣創業路 ，我們在網路上蒐集到這些相關的討論、資訊與評價

里奧叔叔的台灣創業路《11》

經過一翻努力之後終於係高雄設立第一間實體店，或者有好多朋友會問，里奧既產品係網絡上都已經賣得不錯點解仲要開實體店呢？

哈哈哈，講真我都唔知點解，只係因為網店經營期間不停有客人問有無實體店，如果租金太貴但業績不變又擔心會拖累盈利，就正正係因為考慮緊唔知應唔應該開實體店之際，所以決定去買office 先為自用，一間就留做office ，而另一間就用作陳列室兼店鋪，試下做樓上實體店試下水溫試下work 唔 work，就算失敗最多就當投資辦公室出租比人。

實體店新張網紅一個接一個

建立品牌除左要品質好定位準之外，宣傳都係好緊要既一個環節，係台灣FB ,IG, youtube 等等既平台成為消費者生活既一部份，近年有好多KOL都利用平台以推廣產品為生，里奧個品牌推出後就慢慢開始有KOL主動要求免費幫手推廣，點解咁好？其實都係互惠合作，因為里奧既產品推出時討論度高，有好多客人主動分享到社交平台開心share ，網紅見到咁多人討論就自然免費都幫手宣傳，就係咁，里奧好好彩咁慳左唔少KOL既費用，里奧做生意咁勵害？非也，里奧只係好好彩有一位年輕有為的同事，對市場推廣盡心盡力又knowhow，今日呢位同事已經係公司既operation manager ，一位難得既人才。

客人問：為什麼台北沒有店？

台北人經常會覺得開店一定是台北先，在台北打響名氣後再考慮慢慢南下，甚至有好多名店只有台北有店，中南部都只能靠網上訂貨，沒辦法去實體店享受購買樂趣。

咁點解里奧唔去台北開店呢？點解要先係高雄開呢？
呢個原因其實好簡單，因為 里奧...住...高雄🤣😂，頭半年經營下已經不斷有客人問點解台北會沒有店，台北既朋友對里奧既公司營運策略似乎產生好奇。

台北消費力比中部和南部都強？

係真既，呢個問題完全無需要懷疑，咁當然租金及人工既成本相對又會增加。
既然高雄係自有物業做零售，不如台北又買翻間。
原來里奧叔叔真係不知天高地厚，台北乃是人稱天龍國🙄，地價物價又點可能同高雄做比較，唔通真係以為高雄發大財咩，係台北市區就算一間30年既辦公大樓價錢都係高雄既6-10倍，即係係台北買一間就等於可以係高雄買6-10間😩，不過租金又係6-10倍嗎？

租金大約只有2-3倍，所以成件事了解過後好容易得出結論，台北既分店都係用租啦。

歌都有得你唱啦【東區 東區】，要方便又想消費人流集中，當然就要考慮去東區。 咁西門町唔會好D咩？如果以里奧既觀察，西門町有好多外國遊客，而里奧分司主要係本地客戶，而西門町既租金亦比較高，就算外圍都唔見到會平，所以最後就落實係東區搵鋪啦。

要搵一間合適既鋪位一定要親身行，當然如果搵到區內既地產仲介幫手都可以，係台灣業主放租好少會獨家交比一個AA，甚至業主可能會一邊放比AA ，而另一邊又自己放租，對地產仲介又真係唔係好公平，不過里奧都係以適用為主，一個禮拜去台北2次(即日來回) ，終於係一個月內就租到個唔錯既鋪位，仲有半年又要約續了，係疫情影響下唔知有無減租呢？😂，都係唔好發夢啦，東區今年吉鋪唔多，除非過幾個月因疫情有影響啦，如果唔係的話，唔洗加租就算好好。

今日分享住咁多先，下次講下台北既消費力。

請分享文章

#里奧叔叔
#移民台灣
#投資移民
#創業移民
#日希移民

里奧叔叔的台灣創業路《10》

貸款過程雖然有少少唔完美不過總算手續簡單，而簡單既原因主要來自兩大原因。

1, 已取得台灣身份證

里奧叔叔前幾年有個老友又移民咗過嚟，佢地一家到步冇幾耐已經買左層樓自住，銀彈充足買樓只借5成就當然冇問題，但如果只持有居留證想買樓貸款要借7-8成就有點難度，我問過我嗰銀行經理都話要有身份證先比較好處理，加上政府對20-45歲的國民提供『青年首次購屋優惠貸款』，呢D福利都係要入籍後先有，所以只花一年就入籍既里奧叔叔提供不少便利。

2, 公司資本作財務審查又可用作擔保

600萬注資既公司，雖然首年生意根本唔多，但勝在公司d錢都有流動，審查購買第一個自住物業時手續就比較簡單，到第二年營運上收益有進步，購買辦公室時用嚟做擔保貸款亦唔係問題。

台灣朋友大部份好熱心，但……

雖然資訊發達好多資訊都可以網上搵到答案，但係每一個環節都唔算好容易溝通，就先講一下裝修，雖然之前買自住樓時已搵過裝修公司，但今次個經歷又好唔同。

里奧叔叔嚟到台灣認識咗好多本地朋友，而大部份台灣朋友既真誠熱心程度會超出想像，其中一位做室內設計既朋友知道我要開直營店就二話不說話要幫手畫圖，仲話會幫我睇埋裝修報價，不過朋友係台北人，高雄既裝修公司就由我自己去搵啦。

朋友大部份都對里奧一家好熱心，但係生意上自己都係要多加留心，同一幅設計圖里奧拿去貨比三家，但三間裝修公司既報價可以相差一倍以上，最好笑既係交埋圖紙比佢，裝修公司係出報價前都會問里奧叔叔有幾多預算「budget」🤔，里奧心諗有幾多預算關你鬼事咩，問翻佢做咩要知預算，佢地就話台灣裝修公司係咁，而且個報價通常都會先mark高才等你去還價，都係嗰句，咩都要講價呢下真係好老套。

雖然里奧唔係做裝修公司，但好多基本野既價又點會唔知呢？好簡單一個木地板可以報個天價，又話D木地板點靚點靚，又話咩進口射燈，問佢係邊到進口，佢地就答里奧「東南亞」？What 東南亞？……即係
Made in China囉。

比較再比較，了解再了解，終於搵到一間里奧認為合適既裝修公司，亦明白到點解係台灣好多時候都只會搵相熟既合作，因為要去搵一間新公司合作，由報價、講價、合作到完成真係要花唔少時間，台灣生活雖然大部份時間都很舒適 , 但有時還是需要EQ去融入某些文化😁😁

台灣人的好奇心

裝修、設備、招牌等都終於完成，又到貨品上架試開業既時候，可能係因為樓上鋪既關係，由大堂保安至大樓管委會主席，對有一間經營零售既品牌店開設係商業大樓內都表現得好奇，紛紛走嚟參觀訪問，不過大家如果嚟到台灣千萬唔好介意台灣人既訪問方式，因為佢地會問得好直接，問到你都唔知仲想唔想理佢，以下就係一次好古怪既經歷。

管委會=業主立案法團
主席= 眾業主選出嚟為業主服務的人

主席：你好呀，我是這大樓的管委會主席，你們是在做什麼生意的？

里奧：你好呀，我們是品牌廠商，請問怎麼了？

主席：沒有什麼，只是想來了解一下而已，你的店很漂亮喔，但開在商業大樓內會有客人來買嗎？

里奧：客人應該有的，但還在試營業中，具體情況還沒有很了解。

主席：不是呢，你試營業都一直有客人上來，我看你們開業就會很忙喔。
（里奧心諗，你係咪嚟比難題我呀？）

里奧：「微笑但沒回應」

主席：這些產品都是你們自家設計的嗎？看起來很不錯，我們鄰居買有折扣嗎？

里奧：謝謝，好呀，有需要來找我們看看

主席：我跟你說喔，大樓很多人都想來看看，你給折扣他們就會來。

里奧：好的好的「心諗，你以為自己邊位？」

主席：對了，我姪子知道你們的品牌，他說你們品牌在網絡上蠻出名的，他也想做做看，你可以教他嗎？

里奧：………… 「唔識比反應」

主席：你們的產品都是在台灣做的吧，我也認識一些這方面的工廠，你們成本落在多少？

里奧：………「想踢佢出門口」

最後，里奧叔叔以忙做理由，請佢離開了。

聽落係咪覺得有D誇張呢？又或者嚟住左一些日子也有遇過呢？

里奧分享既都係自己經歷過既事，大家日後又未必會遇到既😁

#里奧叔叔
#移民台灣
#投資移民

里奧叔叔的台灣創業路《9》

經過一翻討價還價之後終於簽買賣約交訂金，之後就要安排銀行申請貸款。

緊記：有部份銀行不接受商業樓宇貸款申請

其實里奧叔叔係買呢兩間office 之前已經買左間自住樓，今次就一次過分享比大家知申請既過程啦。
里奧住緊橦樓係攞到身份證後買既，因為只台灣住左一年既關係，當時買樓做貸款都會有少少擔心，而最擔心就係怕萬一落左訂之後做唔到貸款會被𧞅訂，不過因為里奧叔叔橦樓係新樓盤，簽買賣合約時建商已經清楚注明如貸款不批便會退還全數，但買中古樓就要注意呢個條款，最好係簽定合約時加上退訂條款，一般台灣中古樓都唔會有人同你爭，所以賣方都會大多數都會接受呢個條件。

剛剛取得身份證便買樓，需要什麼文件？

里奧叔叔都係以600萬投資移民，之前都有介紹過里奧當時第一年都係Hea 做，有正常營運生意但係都好hea，公司銀行帳號條數亦沒有很好的業績「第一年記得都得2XX萬生意額」，600萬中有300萬仲做左一年定期，又用咗百幾萬買車，亦沒有其他收入證明。

除左自己和公司用緊既銀行之外，里奧叔叔再同時搵多一間外資銀行交文件做比較，其實所需要既都係財力證明，由於係以台灣人身份購買，所以只需提供台灣既財力證明，以當時里奧叔叔既情況來說，財力證明就只有公司+個人銀行存摺。

7-8成貸款只需要身份證加幾個簽名

從投資移民時公司設立的銀行開戶到個人銀行帳號都屬同一間銀行，建商有幫忙向另外的銀行貸款估價，但利率都比自己常往來的利率高少少「1.75%」，所以最後都決定用返自己銀行上會，而且手續非常簡單，整個過程記得就係經過建商安排後，我就比張身份證再簽幾個名就完成了.

好啦，講返間office 既情況先，台灣買樓唔流行夫妻聯名物業，因為不論是否個人資產，原則上結婚後都是共同持有的，所以今次兩間office 就里奧與里奧嫂一人一間既名。

銀行業務經理為左sell 客有D亂嚟

問題嚟啦，銀行業務經理話里奧叔叔名下買左樓都未夠一年又買多一間office ，利率做唔到之前既1.75 %比我地，而且申請手續費亦由$5000 加到一萬「當時里奧叔叔心諗，有古惑」，又話因為銀行貸款都有計分制，雖然里奧叔叔公司與銀行常有往來，但如果可以再做一些投資計劃或保險計劃會好好多，在貸款上一定會比較有優勢。

里奧叔叔當時聽到後覺得有一D唔妥就想直接了解多D，所以就打電話到台北總行問過究竟。

里奧：請問銀行是否對投資客戶或購買保險後，貸款會比較容易又會增加信貸評分？

銀行：請問閣下是我們現在客戶嗎？

里奧：是的，但我不是想投訴，只是想明白多一些資料。

銀行：明白的，麻煩你提供一下xxxx

整個過程里奧都沒有投訴任何人，重點是不太清楚台灣銀行既做法所以多打兩個電話了解清楚，最後銀行話會過兩日回覆。

兩日後，A銀行高雄分行貸款部經理打比里奧叔叔啦

銀行經理：里奧叔叔你好，我收到總行通知，對你提出的問題向你解釋一下。

里奧：好的，麻煩了

銀行經理：我們之前提出的投資建議都只是一些建議，而貸款的審批結果最終都依台北總行決定批核。

里奧：明白

銀行經理：總行對你的辦公大樓貸款已核準了，手續費和利率都跟之前的一樣，但因為商業樓宇關係，貸款年期最長就只可以15年，而且需要將公司作為擔保。

里奧：可以呀，但請問有限公司都沒有任何資產，這樣擔保有用嗎？

銀行經理：有用的，這是我們需要的，要麻煩你來對保「核對內容」時帶上公司章就可以。

里奧：自己的公司去擔保自己去申請貸款完全沒問題，明天來。

🤣🤣🤣🤣未完呀

代書…首先要說明一下「代書的工作主要的工作是代辦土地和不動產交易的法律文件申請及相關服務的人員」

約好代書到銀行對保啦，先處理好里奧嫂名下嗰間先，之後到里奧叔叔嗰間，利率…年期…blablabla........

咦…等一下！里奧叔叔睇到私人名義買入，但點解每個月供款會係里奧既公司自動轉帳既？

銀行經理：這是很正常的，因為是用公司作擔保，所以bla bla bla ....講左10分鐘，但里奧都係唔明🤣🤣

里奧：雖然係用公司做擔保，但業主是里奧私人名義，但還貸支出是由公司帳出，那公司支出了錢但資產並非公司，這聽來都怪怪的，雖然里奧做生意都略懂會計，但從來有問題都應該交給專業的來，等我打給我的會計師。

「向會計說明之後」

會計：這不對呀，雖然辦公樓是公司自用的，但公司還是會跟老闆「里奧」簽定租約及每月交租金，還房貸從公司出那租金又再支出，這個是非常不合理呀，為什麼不能從私人帳號扣？為什麼要用公司帳號？

銀行同事不停解釋，但不論點解釋我地都覺得唔合理，最終就請銀行將這件案再送回台北重審，過多大約一星期就送回來，任何問題亦同時修正了。😰😰😰

經過今次之後真的覺得在新環境生活，真係咩都會有機會發生🤣

🖐🖐留意返，所有都係里奧叔叔既真實經歷，所以有機會同最佳做法有些出入🖐🖐

好啦，終於搞掂曬兩間office , 準備一間裝修自用，另一間係咪真係租出去呢？收租又有咩要注意呢？下次同大家分享。

請大家記得要幫手分享出去呀🙏🏼🙏🏼

#里奧叔叔
#台灣移民
#投資移民