【偽術評論】究竟TVB電視劇係由邊年開始墮落？
《香港電視劇的萬曆十五年》
Okay，我知大家唔知乜鬼嘢係《萬曆十五年》，《萬曆十五年》係歷史學家黃仁宇先生嘅著作，講述中國係喺萬曆十五年開始比西方比下去。本文當然冇黃仁宇先生分析得咁精密，不過旨在同大家分享吓感受，同埋一啲幾得意嘅睇法啫。
首先，我認為TVB嘅電視劇係由2001年開始衰落嘅！點銀解？
正所謂躍起之後，勢須下落，一個人去到頂峰，自然就要落山走下坡，劇呢味嘢，都係一樣。話說 2000年TVB確實係有幾套唔錯嘅作品播出，分別係《男親女愛》、《創世紀》、《十月初五的月光》、《廟街媽兄弟》、《新鮮人》，可能大家唔認同呢啲劇真係有乜出色，但係至少以上任何一套，都各有特色，亦可以話好過而家任何一套膠劇吖！
問題係2001年真係一個低谷。
《陀槍師姐》喺2000年先上完第二集，一年後再上第三集，拍到冇嘢好拍，開始要玩師姐被強姦喇(我當時已經諗：痴9線架咩？)加埋古裝版《皆大歡喜》大搞爛Gag同低檔次合家歡，都知呢一年出事架喇！雖然同年有一套唔錯嘅《尋秦記》頂一頂，But最重要嘅係，有一套令我同金庸都難以接受嘅《倚天屠龍記》呀嘛！
冇錯，呢套嘢足以化神奇為腐朽一千次，大佬呀，你搵吳啟華做張無忌？究竟你有冇睇過《倚天屠龍記》呀？不如溝埋一齊搵吳啟華做《哈利波特》吖笨，咁唔係吳生嘅錯，佢做醫生同埋做方唐鏡彈出彈入，係一啲問題都冇。但係你搵佢做古裝仲要飾演一個俠士，仲要係大耍武功，咁就相當大鑊！仲要搵當年23歲嘅鄧一君飾演張無忌少年時代？吳啟華唔似張無忌，鄧一君既唔似少年又唔似吳啟華，X你，你有冇咁過份呀？須知道，2000年上緊《創世紀》時，我都仲係無記粉絲，但係呢套《倚天》一出，我已經斷言無記劇集正式玩完。
當製作單位唔再理觀眾感受，一味鳩去，咁就算當時過到骨，都已經成為一連串衰落+傾頹+滅亡嘅開始，相信已故黃仁宇先生有睇無記嘅話，都或者會認同嘅。近期掀起嘅重播熱潮，確實有啲似走緊亞視衰亡舊路。
