OT後，我變咗狼人（上）
「阿斌，你有無睇新聞？尋日有個會計師喺公司猝死咗？」
「有。」我只係淡淡咁答咗一句。
極長時間嘅工作，已經令我無心機應付工作以外嘅任何嘢，我只想快啲搞掂手頭上嘅嘢，有得收工。
OT咗一晚，到我離開公司時，已經係半夜十二點。
我一路行，一路感受到身體深深嘅疲憊，我腦裡閃過一個念頭，再咁落去，或者我都會猝死。
胡思亂想咗一陣，突然間，我覺得自己唔攰啦，行番屋企嘅速度好似愈嚟愈快，
只係地面嘅觸感有啲粗糙......咪住先，點解我會摸到地面？
我低頭一睇，我見到自己身上長滿灰白嘅毛，仲手腳並用咁行緊路，剩番十隻手指係人類嘅手指。
我嚇到尖叫：「嗷嗚！」咦，呢個分明係狼嚎。
我變咗狼，唔通今晚係月圓之夜？但我又唔係狼人，月圓都唔關我事㗎。
我慌張之際，突然見到一隻大猩猩迎面行過嚟。
點解城市會有猩猩？狼遇到猩猩，邊隻大啲？鬥獸棋無教喎。
我更加緊張，但猩猩好似完全唔在意我咁，就咁係我身邊行過。
夜長夢多，為免再遇到其他動物，我飛也似的跑番屋企。
返到屋企後，我變番人，又覺得好攰，好快就瞓咗。
第二朝起身，我照常趕番公司，開始忙碌嘅工作。
我幾乎以為，尋晚變成狼同見到猩猩，只係我工作壓力太大，產生幻覺。
忙到下午五點幾，我膊頭已經好酸痛，但有排都未收得工。
我忍唔住諗，如果我唔攰就好啦。
突然間，我嘅疲憊一掃而空，身體再次變成狼，只有十隻人類手指喺鍵盤上打緊字。
我倒抽一口涼氣，辦公室咁多人，大家見到我變成狼，實會打畀漁農署將我送去實驗室、動物園，我死梗啦，嗷嗚......
我想逃跑，望一望周圍，點知見到成個辦公室中，至少有三份一嘅同事都係狼。
而且呢班狼好認真咁做緊嘢，有隻狼仲離開座位，行去斟水。
最重要嘅係，人形嘅同事都好自然咁做緊嘢，似乎唔覺得有同事係狼，係一件奇怪嘅事。
我仔細諗一諗，啱啱我未變狼之前，都唔覺得有同事係狼。
唔通，只有變成動物後，先會睇到其他人變成動物嘅樣？
咁講法，我尋晚見到嘅猩猩，可能都係人類變嘅。
點解我同其他同事都會變成狼，偏偏保留咗人類嘅手指？
我正想深思呢個問題，但見到電腦裡面仲有大把嘢做，我都無時間諗咁多，快手做埋啲嘢先。
原來，無論人定狼人，都係要開OT㗎。
不過，變成狼人後，我嘅身體似乎無咁易攰，OT到夜晚十一、二點，都仲精神奕奕。
我離開公司，路上都見到少量動物，包括猩猩、馬騮、獵豹......睇佢哋行色匆匆，有啲仲揹住背囊，睇嚟都係人變嘅。
問題嚟啦，點解我嘅同事都變狼，街上就有其他動物？唔通變咩動物，係分唔同公司嘅？
呢個時候，一隻馬騮跑過嚟，遞咗張傳單畀我，上面寫住：「動物大聯盟召開會議！」時間係聽晚凌晨兩點。
我忍唔住問：「動物大聯盟，即係人變動物嘅聯盟？」
「梗係啦，唔通你派傳單畀隻真嘅狗啊？」馬騮翻白眼。
我又問：「咁點解係半夜兩點？」
「日頭人人都要返工，好難約。」馬騮講完就走咗。
我返到屋企，都無變番人，第二日照常以狼嘅形態返工。
為咗儘快變番人，半夜我按時去開會。
一眼望去，會場中有林林種種嘅動物，連獅子都有。
下集：https://bit.ly/2WMyOKb
將專頁設定為「搶先看」/ "See first"，最新故仔馬上睇！
愛上一個神偷：https://goo.gl/qYbths
我係拇指姑娘：http://bit.do/fhWja
#短故 #短篇 #小說 #陳美濤 #廣東話 #粵語 #tomatochan #OT後我變咗狼人
