《顧小培正在散播偽科學》
一直以來都有唔少讀者inbox文科生問我到底以「免疫學博士」自居嘅顧小培到底可唔可信。
在疫症爆發前，其實顧小培就已經靠玩弄偽科學起家，定期舉行一些所謂的「健康講座」，係講座不斷hard sell保健品，將傳統有醫學寶證的療法妖魔化，講到化療會害死病人，食佢賣的「四寶」就可以強身健體擊退癌症。
最近佢拍了一條Youtube去講疫苗同肺炎，當中唔少非常具誤導性的論述，昨日就被學者打臉。
面對坊間咁多似是而非的偽科學或以「博士」之名去賣產品的人，一般民眾該如何是好？
首先 《#聽到講座你就要小心》
第一樣嘢，當有人（無醫學背景或執照）試圖妖魔化一種傳統具認受性和科學研究支持的療法，同時好熱情咁去賣一些其實你係萬寧同屈臣氏都買到的產品時，你就要提高警覺。
好多時呢d騙局你唔難發現有個有趣的現象，就係如果佢地咁勁用萬寧屈臣氏都買到嘅保健品去醫癌症醫惡疾時，城中富豪實搶住去睇佢，係中環開診所診症收你$3000見五分鐘都仲得，點解要到日日開講座瘋狂sell街坊保健品？
而這些講座你永遠無辦法去Verify「個案1/2/3」「陳小姐」「林太」「王先生」食完保健品後癌症康復的真確性。講座用的圖片更可能是google/stock photo，「林太」可能係唔同講座「患上」唔同嘅「疾病」再靠「保健品」痊癒。
同時，你會發現呢班「博士」或其旗下sales大多賣來賣去都係「保健品」。點解？因為他們無牌唔可以開診所、唔可以開藥、唔可以診症。
又去返佢地當初的claims — 治癌，如果保健品可以有效治癌的話，你覺得仲會唔會叫保健品？無錯，當一種chemical可以有效治病時，佢會變成註冊藥物，but again「博士」同旗下sales係無處方嘅權利和資格。
第二 《#玩弄科學文獻數據》
偽科學玩家最厲害的地方在於玩弄文獻、用似是而非的方法去錯誤解讀文獻，在文中或Youtube隨便quote兩三篇文獻，誤導讀者和市民。
最常見的是引用一些preclinical的臨床研究，特別是在實驗室環境下的報告。例如會講洋蔥素在實驗環境下可以壓抑癌細胞生長，再去無限延伸講洋蔥素可以治癌。
呢種無限滑坡的論述係偽科學界好常見，的確唔少化學物或保健品係實驗環境下有效殺菌殺癌細胞等等。但係，好多嘢都可以係實驗環境下，我放檸檬汁落個Petri dish、去隻老鼠到等等都可能可以殺菌殺癌細胞，但當去到人體裡就係另一個世界。
點解藥物研發要咁多年？因為藥物要經過唔同階段的人體試驗去分析副作用、安全性和功效。更重要的是對比現有療法有無更優質的安全性或功效。這些階段令千千萬萬隻藥物係臨床試驗中胎死腹中。
這一切一切，偽科學斂財商人係唔會話你聽
第三《#利用Title增強可信性》
偽科學玩家很喜歡配上一些「博士」「自然療法博士」「順勢療法博士」「教授」title以提升其可信性。
他們聰明的點在於永遠不會用「醫生」的名義，因為醫生受醫委會和code of conduct約束，需要堅守市民健康。但掛名「博士」「教授」「自然療法」「順勢療法」其實並無法例或條約約束，即使佢地開幾多「健康講座」、大肆賣幾多偽科學產品、甚至俾錯誤醫療意見令病人病情惡化甚至死亡，佢地都係無法律責任。
點解淨賣保健品？因為保健品不屬於藥物、不屬於治療的一種，沒有法例規管。
最後，香港對這些斂財商人的監管係接近零，一直以來民眾都只能以血汗錢去買教訓，更令人無奈的是，錢財被騙走之餘還賠了健康，這是令人無比心痛的事。
之前有一條好有心打擊偽科學的傳媒team其實跟進緊顧小培，不過個story未出就已俾人成條team斬咗
興幸的是，有心人Siddharth Sridhar幫我地分析了顧小培條youtube偽科學之處。
*我試圖調查過顧小培的博士學位，但未能成功verify，但係如果真係PhD holder的話，佢嘅論述係significantly below standard
***Edit: 補充少少資料***
1. 有讀者之前曾經向顧小培修讀博士學位的大學查詢，證實顧小培有關的學歷。謝謝讀者的Verification
2. 上篇文章並非指Preclinical studies無用，事實上preclinical studies是非常重要的，這些研究為我們提供寶貝的資訊，對認識疾病和治療來講是不可或缺的。Preclinical studies不是偽科學，偽科學的是利用有限的preclinical studies進行無限滑坡引伸unreasonable and disproportionate的治療效果。如果上篇用字不夠準確或令人誤解的話，我衷心地向大家道歉
3. 有醫藥界讀者指出保健品其實受食品法例監管，而如果聲稱可以治病的話就是犯了不良醫藥條例。在此感謝讀者rectify我上篇文章不準確的地方。
—————————
**我承認自從被恐嚇過後我係少咗打擊偽科學 and for that I am sorry
