我嘅職業係：新娘（下）
上集：https://bit.ly/3w2nAjR
妹妹尖叫一聲，馬上叫大牛入嚟。
大牛望住我個肚，呆咗。
「我讀大學嗰陣，有個男朋友，之後……我都唔知我有咗，就俾人拐咗。」我聲淚俱下咁講，希望搏取大牛嘅同情，等佢將我完好無缺咁「退貨」畀阿鋒。
點知大牛行埋嚟，細細力摸住我個肚：「你生落嚟，我會當自己嘅仔女咁養大。」
「你講真㗎？」我難以置信。
「我鍾意你，我唔識講咩好說話，但我會對你好。」大牛用力點頭：「我係一個粗人，你係城市嘅大學生、好女仔……」
剎那間，我淚如雨下。
一直以嚟，我俾阿鋒當貨物咁賣嚟賣去，從來冇一個買家會咁樣哄我。
婚禮當晚，大牛出咗去陪賓客飲酒，阿鋒偷偷入嚟搵我，諗住帶我走。
以前每一次，我哋都係咁樣做。
但呢一次，我同阿鋒講：「我唔走啦，我想留喺度。」
我知道阿鋒根本唔會收山，我生咗BB之後，佢都係會拎我去賣。
我唔想再過顛沛流離嘅生活，倒不如……真係嫁畀大牛。
阿鋒唔敢相信佢嘅耳朵，但出面人頭湧湧，佢根本冇辦法，喺我唔同意嘅情況下，夾硬帶走我。
婚禮後，阿鋒喺呢條村住咗一輪，但我冇去見佢，佢冇幾耐就走咗。
我專心做大牛嘅老婆，後來，我個女出世，大牛真係依照佢嘅承諾，當佢親生女一樣。
我就成為咗一個村姑，大牛儘量錫住我，粗重嘢都唔駛我做。
我以為，呢種平淡嘅生活，會一直繼續落去。
點知婚後五年，我都冇再懷孕。
而大牛同齡嘅朋友，都已經生咗仔。
大牛愈嚟愈心急，仲搵埋啲鄉村巫醫燒符水畀我飲。
作為一個有知識嘅城市人，我梗係拒絕啦。
估唔到，大牛大發雷霆：「我娶你返嚟，養埋你個便宜女，就係為咗生仔傳宗接代。你連呢樣嘢都做唔到，你有咩用啊？」
「你又話鍾意我？一定會對我好？」我質問大牛。
大牛冇答我。
一個月後，幾個古怪嘅人帶住一班女仔，嚟咗呢條村，好受單身男性歡迎。
我打聽之下，先知佢哋係人販子，我好反感，儘量避開佢哋。
但有一晚，大牛畀咗一杯牛奶我飲，我就暈咗。
醒番之後，我手腳被綁，見到嗰班人販子。
佢哋話我知，大牛將我同個囡賣咗畀佢哋。
我不斷問：「為咗錢？我哋係窮啲，但都生活到，點解要賣老婆？」
「因為你係一隻唔識生仔嘅母雞。」人販子撇撇嘴：「佢求咗好耐，我哋先畀佢二換一，換咗另一個女仔返去做老婆……」
我被逼離開呢條村嗰陣，見到大牛屋外掛晒紅布，明顯諗住辦喜事。
我唔知我會去邊度，唔知我會被賣畀咩人，唔知新嘅買家會唔會將我轉手。
我不斷諗，點解我會俾人當貨物咁賣嚟賣去？
因為我冇跟阿鋒走？因為我生唔到仔？
不不不，因為由始至終，我都當自己係一件貨物。
做完阿鋒嘅道具，就靠阿牛去生活，從頭到尾，我冇諗住靠自己，我只想搵到更好嘅買家，出更高嘅價錢。
當你當自己係貨物，為自己標價，你以為價錢夠高就沾沾自喜，殊不知，人哋都當你係貨物。
冇人會愛上貨物。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #我嘅職業係新娘 #我嘅職業係
