【《#大逃殺4K修復版》：對於一個影迷，一套人生最愛All-time favorite第一位嘅意義，你明唔明喺邊？】
1. 真心睇咗接近五十次，乜版都睇齊就連小說都睇埋後，先至第一次喺戲院睇原裝足本版，當年始終唔夠秤入戲院睇，後來個3D版簡直係多此一舉，呢個正正係應有嘅戲院版呀！
2. 睇完3D版太失望後冇以前咁癲，都成十年冇睇過，但今時今日睇依然震撼力強烈，即使你睇過荷里活玩得更大型嘅《飢餓遊戲》，故事同當中嘅意義都冇《大逃殺》咁強，導技都肯定冇深作欣二咁犀利。當近呢十年睇得多戲後，你會發現套戲厲害在成四十個角色大部份都會性格鮮明，尤其如栗山千明得一場戲都可以勁到去荷里活
3. 唔止栗山千明，仲有更癲嘅柴咲幸，到今日都好難想像令佢爆紅嘅角色，係一個變態殺人魔女——如果你有睇小說，會知道佢相馬光子個角色癲得多，而佢邪氣十足演技真係經典之作
4. 藤原龍也二十年如一日演技當然最勁，呢樣嘢唔易😂
5. 好難想像呢套戲係今時今日上得到，大人怕咗學生要諗惡法鎮壓、學生仇恨大人到對抗到底，反政府反國家，大人細路有一道永不磨滅嘅鴻溝、唔係你死就係我亡，咁敏感嘅故事會唔會突然收皮？建議有得睇好快啲睇，起碼我相信第二集今日應該上唔到喇。最諷刺係，你21年前睇覺得好荒謬，今日竟然覺得，有咩冇可能發生？
6. 以前睇會覺得係一套講人性嘅戲，每次睇都有唔同得著、代入同反思，但原來大個咗睇，你會發現唔止係一套人性嘅戲，都係個講愛嘅故事。我搏咗老命要保護你到最後一刻、人性絕處都仲有最好友誼，不如活在當下、有一次又一次嘅生存機會，即使我同你從來冇講過嘢，喺人生最後一刻只為搵到你同你講聲我愛你，快啲走，佢殺到嚟喇、你搏咗老命保護我到底，同朋友調轉槍頭，無論為咩都好，多謝你... 喺人性最陰暗處都可以搵到光輝，一件事都有正反兩面。我諗一套戲可以成為經典之作，就係你喺唔同時候睇，都可以有唔同感受，好似睇返套新戲咁，先係最勁一環。
7. 今時今日睇返可能好cult好raw，甚至有觀眾會睇到笑。的確，當我哋睇得多血肉橫飛虐殺片，呢套死法其實極少兒科，都應該唔會有咩觀眾覺得暴力，但我相信最icon都係一班學生真係著住校服咁樣片法，果種殺戮唔係《飢餓遊戲》式殺法，而堅係最原始唔係你死就係我亡手法，每個笑容同眼神嘅不寒而慄，盡現人性最陰暗一面，唔係套套虐殺片、青少年反烏托邦片都拍到呢種效果
8. 一個好故事一套好電影，唔理你係3D定4K，都堅係要大銀幕感受先夠勁，尤其開場東映個海浪片頭配最經典一曲《Requiem Dies Irae》，大銀幕下從心嘩一聲
9. 當年用盡你零用錢逐間逐間戲院試，點知不斷俾人趕出嚟，然後好可能連咸片都未識睇嘅你，人生第一套三級片就係去租（租完再買）套《大逃殺》睇，唔知呢班人仲喺咪度？小弟當年都有喺百記舊Forum同大家討論過點樣衝戲院（第二集好似真係討論到俾人報警🥲）－－當然利申唔係鼓勵今日未夠18歲嘅你去衝，犯法架吓，拿今時今日香港地未夠18歲本身已經係犯法（好似係），唔好亂試呀，但冇諗過一轉眼已經21年，如像昨天
10. 作為一套人生最愛，2011年套3D版我覺得好多餘，夾硬加咗back story撐個加長版都冇乜謂，終於喺大銀幕睇到呢個原汁原味版本，圓咗我21年嘅夢。
講咗太多次，長文唔寫喇，呢排包場加埋自己有啲嘢搞，忙到我諗大家都發現我好多日冇出過文，遲幾日會出返。《大逃殺》其實我寫過兩篇，全文連結留言睇啦。
晞。觀影記事13週年包場《#黑寡婦》巨幕版已公開預售！請即購票：https://bit.ly/35EHdTf
【Patreon加強版】尊享優惠、更多深度獨家電影文章：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://bit.ly/3a9wOzy
或使用Payme link：https://payme.hsbc/jackyhei
或透過Paypal捐款：paypal.me/jackyhei
【IG請follow】www.instagram.com/travelerwithmovie
【MeWe請Follow】mewe.com/p/travelerwithmovie
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
