一連五日嘅復活節假期，天氣算唔錯，只有清明當日有小陣雨，其餘時間都有太陽🌞微風，適合戶外行山郊遊。
上星期六，我哋去咗 #流水響 + #鶴藪，呢個路線話難唔難，話易唔易，睇下你點行，想行幾遠🤔。今次，我哋行嘅路線，較為適合大年紀嘅小朋友家庭。影相 + hea + 行 用咗 3小時，共 9公里。
粉嶺港鐵站外搭 52B 專線小巴，行鶴藪道，到達流水響。流水響水塘本來係攝影勝地，年頭時大家都紛紛黎影📸「天空之鏡」，不過今次黎到，整個塘已經乾涸，靚相就冇喇，但行落塘底橫過對面岸，都幾特別嘅😅。
沿郊遊徑行走，路面係舖過嘅路，算易行，大約唔夠半小時到達分岔位，一邊往「大埔公路」，一邊往「九龍坑山」，我哋向九龍坑山方向進發，會開始變成石屎路及上斜，吃力的💪🏻。
再約大半小時，到達涼亭，會有指示牌指引返回「流水響」，接行衞奕信徑，向鶴藪水塘走。差唔多進入鶴藪時，有頗多山路樓梯需要下走，需小心翼翼，有 d 位置土地較乾，容易跣腳。
落完一大堆樓梯，見到鶴藪水塘，影幾張相，就可以沿鶴藪道離開。到達村口有農田，村民售賣各種有機即摘蔬菜🥬。有一家叫「瑰蘭」，主要賣花，有位婆婆以前曾經比我哋落田揀生菜、自己拔紅菜頭、摘木瓜等。但可惜，今次過去，未有收成，我哋唯有空手而回。所以都要看彩數😬。
⭐小提示: 流水響及鶴藪郊遊徑，路線多變，可長可短，自行選擇適合自己的。長嘅可延伸上九龍坑山頂、沙羅洞、屏風山過八仙嶺 (呢幾個路線我哋都行過，屬長途 + 體力)。如果同細小朋友/BB 就可以留喺水塘邊兜下圈、野餐🥰。
#行山 #郊遊 #kidshiking #hiking #戶外
