［山本五十六！］問一問你朋友同事，到底知唔知咩係聯合集團/聯合地產/李明治？如果港島返工嘅可能仲知嘅。拿，你睇完呢個post，又比別人知得多啦！
1. 個題，「李明治都出手私有化，正！」。就係師傅老馮見到呢單消息嘅反應。佢繼承咗師公，即係佢師傅，嘅良好習慣，就係晚晚睇啲announcement 。呢啲匠人精神，正如四點起身蒸點心呀之類，去到我呢代就失傳了。
2. 李明治甚麼嘛，真係大鑊過許冠傑，四十歲以下嘅應冇乜人識。可以Google 下。聯合集團/聯合地產，可能會有啲人識
3. 個故事應唔太複雜（https://bit.ly/3apFIZ4）：就係聯合集團（373），私有化聯合地產（56）。雖然兩間公司你都未必聽過。但56呢啲咁細冧把嘅公司，總有啲歷史（當然有例外，例如7號仔之類，遲下開篇新文講）
4. 你去望下隻56，成100億市值的！唔好以為仙股。另外，至少，睇起上嚟，係幾平。公司兩星期出咗業績，舊年純利，你估幾錢？成30億！即係3.3倍PE。仲有派息添！勁過匯豐！
5. 你睇個Book value嘅，400億咁滯！咩事？如果我冇記錯，隻國泰都係600億左右咋下，今年蝕到趴街後分分鐘得返500億。TVB都係咁上下。
6. 係喎，400億book，100億市值，大幅折讓的。當然其他香港好多呢啲股票，原因有很多。啲古怪小型地產股特別多。
7. 咁呢間56號，100億市值，年賺30億，400億book嘅公司，到底係做乜嘅呢？原來都有幾多業務，仲要其實你應該知的
8. 業務很多，只能略講。首先，叫得係聯合地產，梗係有地產。香港地，有乜好過收租？之前咪話永安（289）（係呀，楊愛瑾嗰間永安，未執的），都60億市值，兩間紐卡素（球會）咁大。「但係永安老細威啲定紐卡素班主威啲？」。就係主要收租。
9. 講返，聯合地產，最出名，聯合鹿島大廈，但只係佔一半（另一半？好似係「鹿島」的）。仲有，灣仔間Novotel，北角間Ibis，都係佢地。童年（？）崩壞未？
10. 香港以外嘅，大陸有間天安（28），散收收各種物業都有。仲有菲律賓都有酒店，真正跨國集團。
11. 但仲有重頭戲。香港地，除咗做地產，仲要做乜呀？梗係做金融。
12. 公司旗下，仲有新鴻基。86嗰間新鴻基公司，唔係16嗰間新鴻基地產，雖然唔少人知道兩間公司同源，但已無關係（＊）。
13. 新鴻基而家仲有乜？其實部份已經賣咗畀光大，變成「光大新鴻基」。剩返嘅，主要係財仔咁咯。仲有，就亞洲聯合財務！Yes UA！（可見呢個slogan好成功）
14. 講左一大輪公司有乜業務。私有化為乜？梗係益大股東。梗係價殘，抵到爛，大股東有錢，收返自己用咯。全世界都係咁
15. 373渣住56 七成半。咁買起埋其他，都係25億（未計溢價）。
16. 幾錢私有化？話1.92。但特別啲，0.42現水，1.5係56派息出嚟。拿，到時除咗息又撻Q咩之類，就食花生啦
17. 隻56停牌前，1.43。而家畀1.92你，52週未見過，算唔算有良心，睇你點睇。實情金融海嘯之後，都冇乜幾多日見過1.92。
18. 不過啦喎，都話大折讓咯。公司每股帳面值，就5.7。而家1.92收返，咪折讓66.3%—原本係75%折讓呀！
19. Bonus （https://bit.ly/3apFIZ4）: 要約人之財務顧問：禹銘投資管理有限公司。明既就明啦
（＊）Once upon a time 仲有新鴻基銀行，然後擠提香咗，變咗阿拉伯（！）銀行嘅仔。然後改名做港基國際，四十歲以上嘅應該識，再之後就賣咗畀台灣佬，就係你今日見到嘅富邦（香港）。而其實富邦（香港）想賣盤，人人都知，聽聞舊年幾乎搞掂，但反送中後撻Q。仲有，港基原本係636，後來富邦香港就都係636，之後私有化咗。而家個冧把變咗嘉里物流，但當然係無關的。
——————————————-
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
