關於 thecityisthecinema ，我們在網路上蒐集到這些相關的討論、資訊與評價

| ifva影像嘉年華． 互動藝術作品 Mood Piano 製作特輯| *sound on & HD
首次同 Kevin Cheung 張瑋晉 合作，為 ifva Carnival 製作兩件互動嘅藝術裝置
--- 腳踏投影機 & Mood Piano！
-
Mood Piano | 配樂
早期嘅電影，即係默片，係無聲效嘅。樂師會根據劇情，係現場演奏出唔同風格嘅音樂。同一段影像，配上唔同情感嘅音樂，可能已經表達緊完全唔同嘅故事。
《Mood Piano》 係一座大型手搖音樂盒，高音部份奏出愉快旋律，低音部份係恐怖懸疑嘅音樂，配合《腳踏投影機》播放嘅影像，係香港街道上踩單車，會係一個點樣嘅故事？
因為有單車呢個原素，Mood Piano 嘅大滾輪都用左單車碌去改裝~
大滾輪上嘅音符可以隨時更改，奏出其他樂曲，係一個可以轉歌嘅音樂盒！
腳踏投影機 | 影像
單車同人力車，比電車更加早出現係香港嘅街道~
Kevin Cheung 將呢架來自英國，可以話係單車始祖嘅大小輪單車，改裝成投影機，只要踩上腳踏，就可以重溫惜日係馬路上以單車代步嘅片段~
呢段短短3秒嘅影片，係來自陳果導演出品嘅《細路祥》~
車輪上面一格格嘅菲林，係以前上堂經常用到嘅幻燈片
(有無人無見過啊....？i feel old)
-
由概念到完成作品，經歷左整整一年嘅時間 (武肺都未出現)！
一開始接到ifva嘅邀請，同Kevin 好快就鎖定要用影像結合配樂為主題，主要係我地都對手動嘅機械結構好有興趣，而今時今日所有野都digital化，更加難見到呢啲平時收埋晒嘅mechanics!
今次呢個機會正好令我地可以用各自嘅喜好融入作品入面~
-
可以用到真正嘅鋼琴做作品，完成左我其中一個bucket list！製作一件咁大型嘅作品，更加係第一次！同大家分享下當中遇到嘅困難：
1/ 時間
雖然話有成年時間準備，但因為土地問題，鋼琴要到展出前2星期先可以上網搵同埋運到studio。因為賣得琴嘅人通常都想件野快啲消失，所以就算早早搵定，我都無位擺。大概用左3日時間搵到一部好舊又細嘅琴，部琴到左studio先可以量尺寸做成個結構嘅支架，2個星期內要完成真係人都癲！
(咁利申我個人都係last minute forever 嘅...)
2/ 機械結構
Mood Piano 可以彈奏音樂係靠大滾輪轉動，推動音槌敲打琴鍵而發聲。滾輪轉動嘅方向、音槌嘅比例同尺寸都係環環緊扣，加上呢個機械結構係轉動嘅時候唔可以太嘈，試左好幾個prototype 先叫初步成功。最令人擔心嘅係真真正正試到work 唔work 係要等到個鋼琴到左，完成晒成個木支架之後，即係set up 前！一！晚！ 之前只可以靠電子琴黎做測試，宜家諗返起都唔明自己點解可以咁老定。
3/ 穩固的支架兩邊嘅大滾輪比想象中重好多，由於件作品要不停地轉動，一開始整嘅木支架唔夠穩陣，所以都花左一啲功夫加入榫同埋支柱 (好彩之前學左一陣明式傢私！做木工唔太吃力！)，務求做到最穩固，唔會東歪西倒。(其實都好驚運輸嘅時候會撞散)
4/ 音符
真正可以安裝音符上大滾輪係set up前一晚...試碌時發覺段音樂好雜亂好似無左主旋律咁。原因係平時彈琴兩隻手會控制大細聲，伴奏嘅部份會較輕聲；但係滾輪上嘅音符就全部一樣力度，令到主旋律完全唔突出。即時將所有伴奏嘅音符磨短，先可以聽到首似樣嘅歌。

仲有好多已經唔記得左嘅困難！不過既然已經唔記得應該唔算困難了lol~
-
能夠完成呢件作品，要多謝好多人！
首先謝謝 ifva 嘅邀請，仲比左極大、係劇大嘅自由度比我地創作！Cry out loud！I will miss u all！
謝謝 樂在製造 社區設計及研習所 提供廢棄單車碌 :D
以及 fabcafe 提供場地
負責搬琴嘅師傅同調音師我都只係求奇上網搵，但啲師傅好nice！仲幾好傾 lol
-
ifva影像嘉年華去到11月30號，仲有時間可以參與架！
Mood Piano 所在地
日期：2020年11月1日至30日
時間：08:30 - 17:00 (Mon - Fri) , 09:00 - 18:00 (Sat & Sun)
地點：FabCafe Hong Kong, 上環新街10號地鋪 G/ F, 10 New Street, Sheung Wan
-
完成一個project，又係下一個的開始了~
-
#MoodPiano中文是咪情感的鋼琴
#呢條片剪死我 #唔好怪我咩都放入去
#2020年同鋼琴好有關係
#ifvaEverywhere #影像嘉年華 #ifvaCarnival #TheCityistheCinema
-
instagram.com/alizeham
-
Background music:
Fig Leaf Times Two Kevin MacLeod (incompetech.com)
Licensed under Creative Commons: By Attribution 3.0 License
http://creativecommons.org/licenses/by/3.0/

【厭世的我，看甩頭髮的他】

1997年4月1日我做了甚麼？大概是孤單一人，匿在新亞的錢穆圖書館一樓某個與世隔絕的自閉位衝畢業論文吧。說「大概」，畢竟我沒有專登為那平淡的一天，影相留念。
堅叔在那一天，有幸同他喜歡的女仔一齊，點解咁肯定？因為他跟她影了一張合照。合照裡的他，頭髮異常濃密，完全不似有甩頭髮跡象。
但頭髮，像歲月，一直溜走，失控地溜走，由不得堅叔控制。
時間好快好去到廿三年後，11月某天，我用正確方式戴住口罩，在搭巴士返工途中，玩了一個《人民影院：睇片？睇心情！》心理測驗——實不相瞞，我一向不相信心理測驗，不信人的心理可以單憑幾條問題便測得出（否則便不會有「人心難測」這句話），結果，估不到，那個心理測驗準確判斷出，我是「厭世哲學家」——我當然不是哲學家，但在「厭世」這方面，我自問，的確很出類拔萃。
而基於這個測驗結果，電腦系統安排了我看一齣名叫《一毛所有》的動畫短片。是的，就是那個由一張拍攝於1997年4月1日的合照所開展的故事。
那天，還未成為堅叔的少年阿堅，跟她去了荔園玩，阿堅既開心又擔心，開心在終於可以跟喜歡的人一齊，卻又擔心自己一把頭髮，擔心髮型變型，擔心頭髮被吹甩……無論點，阿堅與她的故事，在他離開荔園一刻後，便再沒有然後，戛然而止。
阿堅本人的故事卻一直發展下去——與他所居住的香港，故事同步上演。
時代在變人在變，由1997到2017，香港經歷了太多變化，香港人也（被迫）經歷著大大小小的變化，像阿堅，由少年成功變成中年大叔，由頭髮濃密的少年變成剩番一條頭毛的大叔；香港的變化，輪不到阿堅話事——他連自己頭殼頂上的濃密與稀疏都話不到事，而只能，任由事情自然發生，即使他不想也不甘。
2017年，日光滿地的某一天，頭上剩番條毛的堅叔坐在的士上食晏，突然遇見一張二十年沒見的臉——那張曾經跟自己被（封）印在1997年4月1日的臉，如今，臉已有點鬆弛的她，已有幸福家庭，閒聊幾句，是時候講Bye Bye，堅叔目送她離開的身影，突然釋懷——他將手放開，放開對方（給自己留下的悔疚），同時放開自己（的執著）。
最後一條頭毛，被堅叔連根拔起。
整條片，五分幾鐘，用上我喜歡的俗艷顏色，用上我喜歡的麻甩造型——的確，現實中又有幾多平凡人天生美型？而且，就算外表再美，若果內心不美，也只是得個殼。
這是一個很香港的故事，用了不足六分鐘，用了一個中年大叔，就讓我（這麼一個同樣步入中年的大叔）高速回看了一遍1997至2017，How many special people change？How many lives are living strange？諗番，得啖笑。
但我又會諗，如果拍續集，拍堅叔身處2017年至今的香港，他會怎麼樣？他又會怎樣想？還可以這樣撇脫嗎？
個人事或許可以撇脫，但香港事，未必。
得到短暫的釋懷後，戴住口罩的我，望住車窗外的香港，唉，還是繼續厭世好了。

網上放映連結︰www.ifva.com/film

#ifvaEverywhere #影像嘉年華 #ifvaCarnival ##TheCityistheCinema #全城光影相隨 #FilmTent #人民影院

全個十一月有 @ifva_hk 影像嘉年華既節目 多到真係夠睇足一個月!!
喜歡睇show睇展多媒體藝術創作既同伴🖤you know where to go #ifva #ifvaeverywhere #thecityisthecinema