送出去的禮物，不只象徵誠意，更代表你的人格和價值觀。
唔好以為買嘢買得貴就說明你好 generous，很多時候要看對象和場合，越貴可以代表你越 cheap。
「頭盤都未到，」拿著一杯 gin tonic 的師弟雙眼通紅，「佢就企起身走咗喇。」
「你意思係攞埋份禮物走？」Benson 覺得那位女生沒可能會放棄那份禮物。
「就係唔係呀，」師弟開始有點激動，「佢將成份禮物『嘭』一聲擺咗喺枱面，然後即刻起身走咗呀。」
「竟然嘭一聲咁響？」我難以想像，「你買咩畀佢呀？」
「手袋囉，」師弟抬眼看著我說，「你教嘅！」
Benson 聽到師弟這樣說，立刻用手裏的蝦條指著我說：「你教佢買手袋？」
「等等，」雖然含冤，但我仍然冷靜，「我幾時有叫你買手袋？」
「又係你話，」狀甚無辜的師弟看著狀甚無辜的我，「激嬲咗條女，買個手袋就掂嘅？」
搞清楚條 timeline，唔該。
嗰日我食緊早餐，你打嚟畀我，話激嬲咗女朋友，點算好；我話，買樣佢鍾意嘅嘢畀佢咪得囉。跟住，到我差唔多放工，你再打嚟，問我，女仔通常最鍾意啲咩，我話手袋。
「呀師弟，你將我嗰兩個答案串連成一個你自己認為合理嘅答案，咁我幫你唔到喎。」
現今嘅女孩子，情操高尚到你想像唔到，你買個手袋畀佢，簡直係侮辱咗佢人格。
不過話時話，如果真係要買個手袋氹人，點都要識得買。
愛馬仕一定冇死錯人，買唔到 BKC，都起碼買個 Lindy，再唔係粗粗哋整個 Picotin 都要。
嫌愛馬仕太離地，Chanel 都絕對出得廳堂，但買得 Chanel 點都要買個皮嘅，千祈唔好買啲死人布袋款。
再退而求其三，LV 都好，不過有心買 LV 就唔好買 Neverfull 嗰隻款。唔係話呢個款有問題，但作為一份禮物，Neverfull 有點兒寒酸。
如果真的 budget 有限而又想買個見得下人嘅牌子，不妨考慮 Goyard。呢個牌子嘅手袋普遍價錢相宜，但唔好處就係一啲比較靚嘅款，例如佢哋嘅 bucket bag，唔係話行入舖頭就買到。
「橫掂個袋擺喺度都冇人用，無謂要你日日望住佢咁痛苦；大家一場師兄弟，見係你，不如我幫你七折回購咗個袋。」
師弟看著我，終於破涕為笑。
「你個冇人性，人哋嘅血汗錢，你七折就要換返嚟？我出夠八折。」
師弟聽見 Benson 這樣說，完全明白什麼是兩脇插刀。
「係呢，」我決定單刀直入，「講咗咁耐，都未知你買咗咩袋。」
師弟充滿驕傲地宣佈：Coach。
我和 Benson 難以置信地相視一會。
然後幾乎同時舉起手。
叫伙計埋單。
如果那位收到這個手袋的女士有看這篇文章，我想講，你 EQ 真係算高。
畀著我，肯定反枱。
benson意思 在 [討論] 黃國昌是不是臉被打腫了? - 看板HatePolitics 的推薦與評價