《我犯咗全天下女人都會犯嘅錯》
我真係自責，揼心口加刀仔吉大脾都彌補唔到我犯嘅錯...
※※※※※※
尋晚臨收工，兩個同事撩我shopping ，話出銅記行兩個圈，點知一行就行咗3個幾鐘，期間我哋去咗3，4個商場，五六間鞋鋪，總之，最後又買咗野。
途中去咗間鞋鋪，見到有個女人試緊對白色ball 鞋，我話「幾靚喎」，諗諗下，點解咁熟口熟面嘅，終於都醒起，因為我買咗同一款黑色，而我根本唔記得咗，好似只係著咗一兩次。
行下行下，見到一條灰色連身冷裙，我又拎起諗住試，我一拎起，我同事就話「呢條你咪有條類似架囉」。
最後行到啲鋪頭都開始收鋪，見到有間仲未收，有好多好多唔同色嘅冷衫，就好似你打開盒木顏色咁多色，我又拎起件「利工民」咁嘅色想話「照下鏡」(即係開始覺得我同件衫好有緣份好想買 啦又)。但其實我今個星期已經買咗3隻色嘅冷衫，包括白色，鴨屎綠色同卡其色，而每次買都有一個excuse，白色係長身我無嘅，鴨屎綠色係有格仔pattern好特別嘅，卡其色係喇叭袖今年興嘅。好彩我最後我把持住，放棄咗件「利工民」。
※※※※※※
今日終於有時間執下個櫃換季，我愈執愈想死，如果個世界有投胎呢個system，我下世真係有99.9%機會要投胎做孟加拉個啲血汗工人，我呀媽就話「其實以你嘅犯罪記錄，你應該最少要做兩世血汗工人」......
我發覺我個櫃根本有哂uniqlo 冷衫所有色，你可以想像uniqlo有幾多色，白色有好多隻白色，紅色有好多隻紅色，而我最鐘意嘅綠色，係有淺啦，深啦，鴨屎啦，青啦，墨啦，有pattern啦，無pattern啦，仲有好多正常人都好難carry 嘅色啦，例如著咗成條蕉嘅黃啦，油麻地站個隻灰啦，金鍾站個隻藍啦，市政局垃圾筒個隻橙啦。我真係好想摑自己兩巴，好彩尋晚放棄咗件「利工民」。
我其實根本就唔係無衫，而係我遺忘咗我買過成千上萬嘅衫。我真係好後悔上兩個星期，未執櫃就行街買「新一季」嘅衫。根本季季都差唔多，而且我執執下，先記返起，今年6月去outlet，見到冬天衫減價，個時心諗「抵喎，買定今年冬天著」，今日我見到嘅時候，真係覺得自己好智障，我呢啲記憶力咁薄弱嘅人，買咗又唔記得。我對新衫嘅喜愛根本係「付清帳單，平靜的對你熱度褪減」，買咁多做咩？
我決定「由這一分鐘，開始計起，都不必買衫」，我亦喺度語重心長咁勸各位，唔好犯「所有女人都會犯嘅錯」。
我明架，物質係提升唔到氣質架，我會改過自新架啦。
PS. 個日我睇到個slogan，buy less, buy better，買少啲大家都明，買好啲，意思係大家買啲靚啲嘅料，唔好買個啲著一季就'where'哂個啲。but anyway，我今季唔會再買衫褲鞋襪架啦 -_-
