［Trust everyone, But always cut the cards］即係，Don’t trust anyone
＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝
1. 美團（3690）呢個配股（加發CB，唔明係乜嘅有得佢），都幾震憾，首先係規模。760億港紙—留意公司3年前IPO上市嗰時先集330億左右，即係今次配股，集資係3年前IPO嘅一個double．
2. 咁但，好事嚟嘅，首先證明股市發揮到功能。唔知股市係用嚟做乜嘅，可以讀多次金融101，或者訂Patreon．而從來公司都唔會只係為咗上市cap第一浸水（固然好多公司之後就集唔到資，但呢個係能力問題，不能也，唔係唔想）。
3. 另一樣嘢係，公司70蚊左右上市，計高位見過460蚊，升6倍幾。計而家都仲4倍。所以自然cap 水能力大咗好多（技術啲講：唔使印咁多公仔紙，唔使攤薄咁多，如果我上市後跌六七成嘅，就要印多好多股票先拎到上市時一樣規模嘅錢）。
4. 但當然另一個問題係，媒體當然會挖返之前明明公司講過話唔係股東配股。好正常啲人會拉返出嚟講：因為只係上星期嘅事。
5. 講返上星期嘅故事，就係有人見到 （https://bityl.co/6Rtv），CCASS有異動，有人由實名搬貨入嚟，高盛持倉多咗。咁呢度嘅讀者或者Patreon嘅讀者都知，上次騰訊南非佬配股亦有呢個情況（因為南非佬將啲貨由外邊搬去大摩然後配股），咁所以大家就估，今次仲唔係到美團？咁有咩人會有5%貨丫？都係嗰幾個大股東，王興，騰訊，紅杉（Sequoia）
6. 當時美團就澄清，話傳聞不屬實。同埋亦都講，之前都有試過有呢啲異動，都冇事發生呀（係事實丫）。
7. 但然後就有今次嘅事件啦！係咪十分之食神呢！咁易畀你估到咩。
8. 唔知有冇啲網友又話人虛假聲明之類啦下。不過，留意下一樣嘢。理論上呢，好似騰訊呢啲咁嘅股東減持，公司係可以唔知情嘅（雖然實際上好少，但的確係可以唔知情的）。所謂「公司」，係堆CEO同高管，頂多加埋董事之嘛，股東沽貨可能真係唔會話你知，至少理論上講得通的。
9. 所以其實根本不存在公司澄唔澄清，公司not in position去代股東講嘢，股東亦冇必要答你，亦可以昆你。當然你可以話公司打去問股東「點呀你，係咪想沽貨呀？哦，呢刻冇打算下話，收到。」，都冇話唔得
10. 於是就帶去第二個問題，十分玄妙嘅「呢刻冇打算」。
11. 講返，股東沽舊股，公司當然可以唔知情啦，同公司近乎全無關，亦唔使經過公司。不過，今次美團係發新股（technically 先舊後新，有機會再解）集資喎，再加埋CB，公司就不可能「不知情」啦。發新股同發CB呢啲嘢，係公司去做嘛，唔係股東
12. 咁所以，一來你可以話係玩捉字蝨。「係呀冇股東減持呀」「不過我發新股之嘛」（而到底「先舊後新」當唔當減持呢？就真係有啲深嘅問題，你可以當被動減持咯）。
13. 但，講到尾，等於以前啲業績會，好多記者都鍾意問啲公司，點呀，有冇諗住短期集資呀。咁啲poker face 管理層（主要大陸佬）當然就係嗰套官方對白：呢刻冇打算。但有時有啲比較有人味嘅管理層（香港人），就會半講笑咁同你講：「有都唔會呢度同你講啦」
14. 事實正係如此，你咁問，想人點答呢？即係上床前問人愛唔愛你咁。呢刻梗愛啦。劉華話齋，啲老酮師傅到，有乜講唔出有乜做唔出？
15. 同樣地，管理層梗係話你知，「呢刻冇咁嘅計劃」。「呢刻冇打算減持」「呢刻冇打算私有化」。咁到你聽到嗰時，就已經係下一刻啦，知冇？直到減持／增持／私有化／配股之前，都係冇咁嘅計劃嘅（＊）。問少啲無意思嘅問題，做人就開心啲
16. 真係答？都公開唔係答畀記者知啦，聽日就上頭條喎。反而分析員私下挫管理層，佢地就有時會畀啲曖眛答案你嘅。
17. 最後，你最關心嘅股價：鬼知咩，唔係升就跌，係好廢，但啲人鍾意問嘛。但我估，同騰訊差不多，跌就梗，但低位升返上嚟。
18. 其中一個重點係，公司話拎啲錢去做無人車無人機，似乎市場暫時都BUY，始終係一個燒錢嘅行業。但至少美團之前可以賺到錢。咁你見外國啲外賣仔不停咁蝕都有人肯注資啦。
（＊）不過再Technical啲講，你見有時公司都會出通告講「接獲乜乜乜」，大約話傾私有化或賣盤之類。呢啲情況就真係要。因為分分鐘會畀人告。配股呢啲自己閂埋門圍威喂好快搞掂。但，賣盤嘅，例如今日4月20日，你話完全冇傾賣盤。咁然後4月22日話賣盤。但然後畀人查到之前一早3月已經有人同你傾呀搵晒投行呀嗰類呢，就會有啲麻煩了。
＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝
