今朝一早就有朋友同我講辭咗職，佢問我係咪好驚訝？因為而家市道咁差。我話效力巴塞隆拿19年嘅球王美斯都遞信啦，仲有咩值得驚訝？不過循例都想問問我朋友辭職嘅引爆點係咩？
「大家都係幫公司做嘢，同事間嘅關係應該互相合作，唔明點解每一次喺工作上溝通，都搞到好似求人一樣。」
我：「咁似我以前做garment嗰間公司啲人嘅。」
「咁都未算，同事唔做嘢唔緊要，呢啲係人哋嘅事，但係當我一直忙緊嘅時候，又或者工作上有問題要搵佢哋傾嘅時候，班同事會覺得我阻住佢哋偷懶，仲要睇人面色。」
我：「......」
「仲要受埋本來唔屬於我工作範圍嘅壓力同責任，雖然唔介意行多一步，但係愈嚟愈覺得唔做唔錯，多做多錯，偏偏公司裡面啲人無論你做啱定做錯都嚟搵你。」
只可以講句似曾相識，我們都是這樣長大的。
既然朋友去意已決，就直接問佢有咩幫手？係咪純粹想搵個樹窿呻下？
佢問我Goodbye email應該點寫？因為除咗內部同事之外，佢都想同一啲關係友好嘅客戶或者工作夥伴keep contact，呢啲email又應唔應該留返私人電話或者電郵？
我答佢：「當然冇問題啦！初衷都係同返啲客或者工作夥伴交帶一聲啫，畀佢哋知你幾時會離開呢間公司？之後又應該搵邊個？至於邊啲人可以留埋私人email同電話，邊啲人係咁易send份官腔嘅Goodbye email就足夠，你做咁耐心中有數㗎嘛，自己控制同拿捏啦！唔通西客又留埋私人電話等佢搞你咩！」
分享兩單關於Goodbye email嘅真人真事，當日有個做headhunt嘅舊同事辭職，佢send咗封Goodbye email畀幾個熟客交代，當中留咗私人contact，點知幾日之後，其中一個客私人WhatsApp佢，請咗我舊同事去佢公司做In House，負責recruitment同埋training，嗰次算係雙贏，舊同事因為人事問題而辭職，佢個客就諗住將來可以慳agency fee，所以直接請個有headhunter經驗嘅人做HR。
另一單就甜蜜啲❤️，總之有個男仔喺last day就send咗封Goodbye letter畀個女仔客，當中有私人contact，佢哋之前一直用公司電話同email溝通同埋合作，雖然互有好感，不過連樣都未見過。女仔客想問個男仔下一站去邊間公司，怕喺公司電郵度傾會唔方便，所以就私下WhatsApp，順便祝個男仔新工作順利，點知兩條友傾下傾下變咗每日WhatsApp講無聊嘢，過咗一段日子，個男仔仲鼓起勇氣約個女仔出嚟食飯，後來拍埋拖，雖然呢段感情最終冇開花結果，但係據我所知，都係一段美好回憶嚟嘅。
Sorry，扯得太遠，一講愛情故事就分心，Goodbye email唔係溝女用㗎！下次唔好喇！如果你哋有一日需要搵Farewell / Goodbye email、簡簡單單穩陣辭職信、Short notice要提早走嘅辭職信、Part time / Intern辭職信，或者係辭職後一直未收到reference letter，要send封email去催，都可以喺辦公室日報個網度搵呢堆辭職大百科作為參考，入面仲有離職常用原因，見工填form時希望你啱用。
https://hkofficedaily.com/farewell-goodbye-email/
