未睇都建議大家唔好睇。
「伏」到咁，大家都係留番搭飛機先睇吧~
未睇《Batman V Superman》之前，我係咁咦喺自己fb度講咗句DC電影冇一套好睇，學唔到Marvel做得咁出色，即刻俾個DC死忠讀者加網友，狙擊咗我幾十個留言，第一個留言已經係講我好膚淺、個世界好細，如果唔係知道佢係邊個，個人其實冇乜惡意，我已經block咗佢。何況網絡世界，你屌我又唔痛，所以，雖然我睇唔明佢啲執著同論點，但基於禮貌與及尊重佢嘅喜好，都冇再討論落去。
然後，嗰晚我睇完《Batman V Superman》，覺得套戲有啲伏，於是同個勁中意DC嘅朋友講話搵笨（佢係睇中午11點場），點知佢一開口已經同我持相反意見，講講吓仲差少少同我反面……
－－－－－－－－－－－－－－－－－
「你冷靜啲先啦，storytelling堅差喎，頭嗰60分鐘除咗不斷撚畫面之外，劇情真係亂到暈，佢玩少兩個慢鏡，30分鐘劇情其實3分鐘可以講完。冇心理準備或者事前做過功課，堅係睇唔明架喎。」我以為自己算講得好中肯。
「邊度睇唔明呀？你冇腦架？唉，我成日都話DC同Marvel係完全唔同，DC係有深度好多，係劇情片，現實好多，你當咗佢係Marvel咁嘅卡通片睇，當然覺得悶啦！」唔明點解DC友好中意乜都拉埋Marvel講，拉埋《龍珠》講唔得架咩？
「吓？劇情片？超人做報紙，日日報導超人有幾勁，但成間報館可以冇人認到自己同事就係喺空中飛飛吓嗰條友喎，全部記者有面盲症架？」喂呀咁係唔合理呀嘛…
「乜嘢年代呀，你呢啲咁白痴嘅問題都問得出…唉……」題外話，我見人whatsapp一打「唉」就好想開佢波，「唉」即係點？？你打粒emoji仲有啲禮貌。
「唔係咩？戴咗眼鏡就另一個人，喂無線劇情嚟架喎！我咁都講錯呀？」
「唉，你放過我啦！人哋漫畫係咁設定，你又走去諗現實，呢套係科幻片ok？你唔問佢點解識飛？痴痴地」哦！而家又變咗唔現實啦！
「喂，咁Batman睇Lex啲神秘file嗰陣，又點解會即刻認得Wonder Woman同條女係同一個人呀？佢連眼鏡都冇戴喎大哥！講開又講，Lex知咁多嘢，幾條仆街仲可以喺佢地方自出自入，又係解唔通架喎。」唔止眼鏡，Gal Gadot好似連Bra都冇戴…
「唉同你講都嘥氣，你根本就係搵位鬧套戲，你未睇前已經鬧緊，有乜好講落去？Marvel又唔見你插，你根本係Marvel撚。」
「你都CLS，我睇開邱福龍，美漫關我鬼事！我識Marvel都係睇電影，覺得好睇先再慢慢睇返漫畫其實係點，完全冇追開，咁都叫Marvel撚？我而家就係講緊DC嘅戲冇咁嘅力量呀，我睇完只覺得套戲爛，唔會因為呢個Batman冇頭冇尾而想去睇佢有幾忠於原著囉好冇。」真心好燥，文字暴力迫我係Marvel撚。
「吓？其實會唔會有人唔知咩係Batman？唔知都唔會入場啦阿醒！」
「但呢個Batman唔係同之前黑夜之神嗰個唔同架咩？乜又有關架？」
「屌你真係弱智，呢個當然唔係之前嗰個啦，都話呢個係跟漫畫咯，你見唔見佢又殺人又用私刑呀？呢個Batman直情係變態，唔好當佢絕對正義，佢係會殺人！」咪係囉！既然呢個Batman唔係之前嗰個，套戲淨係影住件爛鬼衫俾hints啲死忠打飛機，咁就叫交待咗呀？
去到呢度，我已經明白唔係自己問題，所以，我選擇咗朋友。我講咗句真心說話：「……………咁我覺得Ben Affleck係救到套戲嘅…」
「唉，好心你哋入場前睇吓漫畫先啦，自己睇唔明又話套戲差，唉…」
入場前，其實我已完全做好晒功課，知道DC Extended Universe會點玩，亦知道電影角色嘅原著到底係點。不過，真係冇關。
我話之你全套戲齊L晒DC所有英雄，話之你DC嘅層次同深度高過相對論（Theory of relativity），而家講緊套戲，講緊電影，唔係想批評、睇少神聖嘅美國漫畫，但fans就好喜歡混為一談，完全無視唔熟DC嘅朋友，忽視電影問題，等於間接叫非fans唔好睇DC電影。
如果拍到咁都叫佳作，不如下次叫班人影海報算啦，反正有Batman、Superman、Wonder Woman，fans就會自己腦補晒所有劇情。
其實你哋係睇套戲，定睇套戲名？
－－－－－－－－－－－－－－－－－－－－－
不過咁，套戲絕對唔可以話一無是處，有人話爛、垃圾，我又唔同意。拋開電影嘅不足，作為DC罕有電影大作，氣勢絕對有餘，「大戰」戲碼非常精彩（問題只係停戰原因……），Zack Snyder唔識講故事，不過好識玩鏡頭同用音樂，特別最後激戰，認真講，好睇過同類電影多多聲，《龍珠》式打鬥冇話咩唔好－－超人一嘢爆開Doomsday搞到佢飛入工場之後爆炸，呢個鏡頭，我呢幾日個腦都不斷狂loop，有可能為咗呢個鏡頭睇多次－－最少已經收儉過《Man of Steel》。
但，事實係，Rotten Tomatos得30分、Metacritic得44分、（最唔可信嘅）imdb都係7.6分，鬼佬一遍劣評，兩位主角開始要面對負皮壓力，Youtube更已出現惡搞片「Batman V Superman - Sad Affleck」（https://youtu.be/cwXfv25xJUw），好笑，又好陰功。
再講多句真心，Ben Affleck做得好好，佢呢次真係好無辜。唔係佢做，套戲會更大劑。
