最近畀人inbox問得最多嘅問題，有三條：
1. 「想問好耐，你啲跑步相邊個幫你揸機㗎？」
2. 「諗緊買跑鞋，邊對好？」
3. 「點先可以好似你咁靚仔？」
關於3，我只能答係天生，係我衰、我冇用、我幫唔到手🙇🏻；關於1，其實之前講過，不過可能有啲朋友miss咗，等我遲啲整個詳詳細細嘅解說圖出嚟，保證大家三分鐘學識；而家，等我答咗2先。
有睇開我嘅朋友應該都知道，我不時會po下波鞋，但惟獨實戰鞋同跑鞋我唔敢立亂推薦，因為人哋真係會著嚟跑步，盲目地讚好嘅話，搞到人著壞腳甚至受傷我就真係擔當唔起。今次呢兩對，我都係實測超過一百公里之後先夠膽寫；戴番頭盔先，以下嘅純粹係個人感覺，並非專業鞋評，旨在等大家喺買鞋嗰陣有多一個參考。
如果係資深跑友，相信對跑鞋都會有一定認識，亦都有自己嘅喜好，所以inbox我嘅朋友，好多都係「想揀對鞋開始試下跑步」，又或者係喺跑咗一段時間之後有意入手更適合自己裝備嘅類型。我比較姿整，總係認為好難一鞋走天涯，因為唔同情況有唔同需要；長課、tempo、interval、比賽，各自有適合嘅跑鞋。但如果係暫時希望只買一對鞋嚟感受下跑步樂趣嘅話，我覺得React Infinity Run FK2係唔錯嘅選擇。
對上一次著React技術跑鞋，軟彈腳感記憶猶新，但今次試呢對就有極大反差，第一個感覺係：嘩，又話落咗React？咁硬嘅？
坦白講，著住佢跑完第一轉之後，就幾乎想立即擺埋一邊；但睇埋啲外國鞋評，再聽多幾個跑友嘅意見，決定畀多次機會佢。原來有啲嘢，真係值得多一次機會；就好似阿太當年第一次向我追求不遂，我到第二次先接受佢，咪到而家都一樣好地地囉。呢對鞋喺跑多幾次、俗稱「開鞋」之後，係另一個世界。
React比之前硬身，其實係為咗平衡腳感同反應。鞋底軟，實舒服，但由於緩震吸收力量，你出嘅力就未必可以完全回饋喺速度之上，簡單啲講，會嘥咗力；頂級嘅旗艦跑鞋會將力量回饋最大化，但對初學者嚟講，係有機會畀對鞋推快咗，可能會導致早發力早冇力。React Infinity Run FK2就喺兩者之間取得一個相當好嘅平衡，跑多幾次，回彈感開始出，但又唔會過軟，亦都唔會有推爆你嘅獸性，總括而言，非常啱初學者。
人無事先做到世界冠軍，呢對鞋嘅設計理念，就係幫跑者減低受傷機會。初學者通常跑街，甚少跑track，而街嘅路面就多多少少有啲凹凸陷阱；呢對鞋嘅闊底設計令你喺跑街嘅時候保持步履平穩，冇咁易拗柴；flyknit鞋面夠透氣，而且真心襟著(睇下幅圖嘅鞋底，已經跑咗過百k)，想暫時一鞋走天涯的話，買呢對啦。到第時疫情過去可以去旅行，而去到外地又突然想跑下步嘅話，真係一對搞掂晒。
又，如果你有番咁上下功力，想開始追求下速度嘅話，我就會推薦你著ZoomX Invincible Run FK(個底厚啲嗰對)。佢嘅基本配置同對Infinity差唔多，都係flyknit面加闊鞋底，但就用咗ZoomX取代React。ZoomX，即係而家頂級鞋用緊嘅物料，更軟更彈，係會令你快咗，但由於對鞋嘅其他配置，一樣將你整親嘅機會降到最低，放心入手啦；順帶一提，兩對鞋我著嚟跑最長嗰課都唔超過20k，再跑長啲會點，等我試咗之後再update大家。
#亂世之中保持強健體魄
#ReactInfinityRunFK2
#ZoomXInvincibleRunFK
#NikeRunning
#NikeHKG
