今朝搭車滾水淥腳，而家貼返全文出嚟先。 (Medium link: https://link.medium.com/EmMgzjpMkY)
//
星期一返工，茶餐廳、地鐵嘅電視播出新聞片段都係重溫緊星期日沙田遊行之後，示威者同警隊對峙嘅場面。經歷過六月幾次遊行、七月嘅九龍區遊行、「光復上水」，去到沙田遊行，衝突又提升到另一個層次。
如果係十年八載之前由民陣發起、「和理非非」嘅遊行，警方有意無意地唔開路，唔畀人離開維園出發，已經足夠令人嗌「警犬」同「我有交稅出糧畀你架」，咁嚟到 2019 年，納稅人作為公僕嘅「老闆」，其實一早應該炒咗差佬魷魚。
事情嘅進展又唔係一朝一日嘅。 2014 年同 2016 年，梁振英治下嘅 Umbrella Movement 同埋「魚蛋革命」期間，警方喺曾偉雄 (及盧偉聰) 帶領下，已經展現出厚此薄彼嘅作風。其時政府對於佔領行動採取「群眾鬥群眾」嘅手法，「黃絲」佔領金鐘、銅鑼灣及旺角街頭，自然莫名其妙地有「藍絲」出現挑釁甚至搗亂。警方嘅做法係點？明明「藍絲」有傷人、非禮或者刑事毀壞，但係一般都喺警員護送下安全離開，冇手尾。至於被捕嘅「黃絲」，拉上警車之後熄燈，可以發生啲乜嘢事？吓？
我都唔講曾健超被「暗角七警」圍毆、朱經緯驅散人群時亂揮警棍作為「手臂嘅延伸」。喺曾偉雄嘅「你哋冇做錯到」鐵腕思維之下，警隊同市民嘅二元對立，一早埋下種子。
2019 年，當「反送中」浪潮將沉睡幾年嘅民怨喚醒，「群眾鬥群眾 2.0」正式面世。昔日「藍絲」爛頭卒陳淨心、高達斌、傅振中呢啲僂儸已經唔再搶眼，甚至銷聲匿跡。取而代之嘅，就係各位市民供養嘅前線警務人員、速龍、防暴警察。
或曰「有賊便有警察在追賊」。但係市民遊行又好，佔領又好，邊一刻係做賊？要清場、驅散市民，以前「反高鐵」嘅年代一樣試過。當年又有冇用過催淚彈？橡膠子彈？落手砌？隻揪？冇。
由 612 金鐘到七月嘅各區抗爭，可以見到警察對於示威者採取敵視嘅態度。如果唔係如報道所講，中央唔容許立法會清場流血或死人，七月一日深夜佔領立法會嘅示威人士冇可能全身而退。
但唔係日日都係政權移交紀念日，警方殺紅了眼嘅姿態，由「自由閪」、「叫你個耶穌出嚟見我」、「記你老母」到屯門守護歌舞妓娜娜、到上水追趕不良於行嘅長短腳少年追到人差啲墮橋、到沙田圍堵式包抄，殺入新城市廣場「一網打盡」，初則侮辱，後則連活路都唔放一條出嚟，係變本加厲。
或者話前線警員喺一個半月以嚟長期受壓、遭受起底或羞辱，所以行事偶有魯莽衝動。喂，前線銀行職員、化妝品店 sales 同遊客區食肆嘅侍應日日都畀西客糟質架啦！係咪咁就攞正牌揼返個客轉頭先？
重點係，警員因為職責所在，獲賦予槍械、警棍同防衛裝備。佢哋唔係做義工，係受廣大納稅人嘅薪俸 (唔知娜娜有冇交稅？) 而要維持治安。情況一如求學時期大家見過嘅 “Prefect” ，中文名可以係領袖生、可以係糾察或更柒嘅風紀，但職責都係協助維持校園紀律，掛住個章 (或更柒嘅戴住條綵帶) 亦唔代表佢哋可以胡亂行使權力或者揭人裙底。
警察同 Prefect 大家都係獲授權、有牌人士。但做人做狗真係自己揀嘅。當政府選擇用警隊作為管治失效之後嘅管治工具，每個星期都同數以萬計嘅民眾「打成一片」，事後又瘋狂圍堵、抄車牌抄身份證，呢種做法根本就唔係疏導民意，而係迫上梁山。
民怨爆發多時而未有緩解，一幕又一幕警察濫權、使用不合比例嘅武力去攻擊手無寸鐵嘅示威者嘅場面，令警隊威信蕩然無存。連執行職務嘅委任證都唔敢佩戴，監警會嘅調查亦唔會有咩結果。係咁委屈嘅，咪畀保皇黨主導嘅立法會成立一個獨立調查委員會囉。到時警員同示威者兩邊都要受查，警隊高層決策過程亦可以水落石出。係公道嘅，自然還返畀你哋吖，香港警察。
prefect中文 在 MKP Secrets - 其實IT prefect 嘅中文係咩Admin: 我知... 的推薦與評價
其實IT prefect 嘅中文係咩. Admin: 我知科技小先鋒!(我聽到個下笑左xdd). August Chan, profile picture. August Chan. 中二病也要搞iT. 9 年 举报. ... <看更多>