『有人去踩，我偏要讚』
認真，個廣告如果真係要屌，第一句應該問：Ｎ ＥＳＣＡＦＥ係黃定藍，有無邊爐打同肥牛淥？可惜，呢篇文唔係俾你驗有無色盲。如果真係要玩對號入座，我就會反而想咁睇——
首先，做得日本動畫化要搞到好似新海誠咁，對象一定要係年青人。而且，對象唔係日本既年青人，強國既年青人，係香港既年青人。咁個廣告入面應該放咩內容，唔會踩界得黎，但其實又可以暗暗ＴＡＳＴＥ到一絲絲既咖啡香——同埋本土味？
隱喻，係偉大既藝術表達手法。亦都係為對號入座提供左最佳既素材。
廣告開首，千祈唔好理點解女主角踩車去見工，一開始係美都餐室但一下子去左西環正街類物，甚至車個遇上塞車男主角去電車站咁離奇。關鍵在於舊式餐室，電車，第一眼就係老香港情懷。如果你都覺得唔係只係撞手神，都唔會再另一個分鏡，俾個咁大個『押』既招牌係右手邊。呢個係刻意剪碎出黎呈現既圈套，並唔係話咩『連香港啲地點係邊』都搞唔好。大佬呀，我自己都識ＧＯＯＧＬＥ ＭＡＰ，製作團隊會唔會好似你地班友咁豬呀？
呢Ｄ都係象徵左香港既美好呀哈姆太郎。
好，女仔去見工，呢個係年青人一定會面對既第一個人生大問題，所以我話廣告對象係年青人，即刻有投入感。而女仔另一個一大事業，就係戀愛；要戀愛，就要有對象，即係男主角。男主角一開始未出現，反而係先做咖啡仔既路人甲，佢地相撞，撞到一天都係罐裝咖啡，甚至有埋跌左落單車個籃到。但係個路人甲無怪過女仔，因為佢自己其實都返緊工，知道女主角趕住去見工，佢只係攬住隻貓（另一個陷阱幫萬千貓奴落坑），訓係地下，微笑住話：
『記住每個人都可以比本份做多一分架。』呢個係成個廣告既中心命題。但！係！
究竟香港既年青人，可以做多一分既本份係咩。。。？
唔通只係買咖啡飲？一定唔會啦。
好喇，跟住女主角先撞到眼鏡靚仔男主角，送左佢一程，中途仲幫手送埋咖啡添：
第一個係地產經紀，女主角經過之後，佢決定叫兩小口子買樓要諗多諗（注意：買樓又係香港既另一個年青人面對既困境黎）；
『咁大件事，應該諗清楚既。』
依家香港有咩事係大家心目中係大件事？
然後鏡頭轉左去一盞交通燈，無鐵絲網，紅黃綠燈似乎全部都ＷＯＲＫ。下一個係就快冚旗既的士司機。佢又受到女主角經過既感召，決定載多一個乘客先交更。再次強調『行多一步，其實都無壞』。咦，咩原來香港人仲有路好行咩？條路係邊？的士司機唔係只會周圍撞人架渣咩。
見工，買樓，坐的士拒載，呢啲就象徵左要搵食同低頭既殘酷現實。同香港既美好意象遙遙相對。
同女主角，同大家一樣，幫人明明係好事，但反而會跌入困境。佢既結果就搞到自己見工會遲到。但係佢渣住架死人單車，有無放棄呀？無呀。佢遇到整路既建築工人封路有晒ＢＬＯＣＫ，佢選擇係點呀，係突然發動異能踩左上樓盤既地盤木版然後同好多動物呀各種公仔呀一齊飛出天空呀。
日本動畫最鍾意ＳＥＬＬ既係：夢想與奇跡。
香港依家比任何一刻，更加需要呢兩樣野。
透過女主角把口，又再講多一次：
『如果每個人都可以做多少少，我地一定可以一齊行得更加遠！』記住，唔係自己一個，重點係一齊個齊字。咁都仲唔夠畫公仔畫出腸？
點解仲要出現兩秒既醫護人員，同埋訓緊覺類似立法會議員同官員咁既物體？
究竟香港既青年，要做多咩野少少，先可以得到呢個咁美化咁理想國度既香港？
但個故事去到呢度都未夠絕。岩岩車左佢男主角，竟然就係咁岩佢既面試官。但男主角掛住睇ＲＥＳＵＭＥ，本來見唔到女主角，所以語氣完全係上左位既老屎忽語氣：『連準時都做唔到，仲要無學歷，無經驗，唔好再徙——』佢本來一定想講『唔想再徙大家時間』，即係叫女主角收皮。但係佢目光從履歷移開，先發覺原來果個人就係馬尾女主角。
『原來我地一路都忘記左最重要既野（就係馬尾係萌點）。』於是男主角走向女主角，提議話：
『準備好，我地就開始啦。』女主角喜出望外，大落地玻璃窗外，係香港既維港全景，仲見到ＩＦＣ添，邊個見到唔感動。老實講，如果你將最後賣咖啡既ＬＩＮＥ改左，配晒其他畫面，我相信仲ＧＯＯＤ ＦＩＴ添呀。
廣告意象全部都只係ＣＯＮＶＥＲＧＥ去一樣野：就係叫香港年青人，有挫折，明知無可能，都一樣要每人做多少少，可能就會開創出好似新海誠咁靚大家都咁嚮往，繼續想係度住既香港。係呢度，遲到都有機會，充滿住人情味，邊個唔想係度住反而要諗唱美金隨時離鄉別井呀？唔再係老屎忽把持，反而係一個以青年人為中心去轉動，去改變既世界！
最後都要俾多次讚俾全粵文字幕同埋配音。雖然聲既質素有爭議，但我覺得成件事聽落去都係超有親切感。諗番起女主角既馬尾，又要引番仆教授一句：『世界真係可能向緊一個有趣方向進發緊』！最後最最後為左唔好俾人以為我收左錢寫鱔稿，留意番：
呢隻牌子咖啡真係好Ｌ難飲。完。
＃十分鐘寫文重現
一位呀唔該哈姆太郎 在 一位呀唔該- 0115 節目討論區| Facebook 的推薦與評價
一位呀唔該, profile picture. Join. or. Log In. 一位呀唔該, ... 痴女真係好好笑, 不過, 點解每次哈姆太郎到最後都係咬梁子? (PS. 正媽嘅笑聲可以攞嚟做電話 ... ... <看更多>