關於 明日大嶼又嚟喇 ，我們在網路上蒐集到這些相關的討論、資訊與評價

【明日大話】研究完唔開工既機會係近乎零!

近日立法會復會，重推明日大嶼嘅輿論又出番嚟，早前已擱置嘅「中部水域人工島前期研究」撥款極有可能短期內再被強行通過（已通過）。有建制派議員話應該等專家評估完先決定起唔起萬億人工島【註一】，「點解做下研究都唔俾」【註二】，話反對嘅市民同議員霸道。

- 冇一個工程研究做左唔開工

但市民憂慮不無道理，翻查記錄，政府過去近10年，每逢做工程工務嘅可行性研究，無一個係唔可行嘅【註三】；一係講到項目非常可行，再唔係即使項目有困難，但政府都會「迎難而上」推展項目。而且睇番再早啲具爭議性嘅大型基建/規劃嘅可行性研究：

中交公路規劃設計院就港珠澳大橋的工程可行性研究(2004)
廣深港高速鐵路香港段的可行性報告(2005)
蓮塘口岸在香港境內的土地、規劃、交通和工程的可行性研究(2007)
《新界東北新發展區規劃及工程研究》(2008)
《落馬洲河套地區發展規劃及工程研究》 (2009)

高鐵、港珠澳大橋、落馬洲河套地區等極有爭議嘅項目就係咁樣被確立其需要同可行性。現實上，大家都知道高鐵同港珠澳大橋已經搞到「一鑊粥」，超支、延期、用量極低，日日蝕錢，變成「吸水大笨象」。所以市民有理由憂慮，即使有多個專家學者批評明日大嶼有前設、造價估算及成本效益等多方面問題，是次明日大嶼可行性研究嘅結果必然係「可行」，市民將焗住硬食。

－港珠澳大橋的教訓－

呢啲大型基建「研究完必定可行」嘅劇本，其實一早埋下伏筆。以港珠澳大橋為例，2003年，國家發展和改革委員會同香港政府委託綜合運輸研究所進行嘅《香港與珠江西岸交通聯繫的研究》已經確立興建港珠澳大橋嘅需要【註四】，然後係2004年，先進行「工程可行性」研究，處理點樣(how)起呢座大橋，由此可見呢類大型基建嘅可行性研究，唔會處理應唔應該起(why and what)嘅問題，而只係處理技術上如何起嘅問題，所以當一個基建項目走到呢步，其實就係勢在必行。

－明日大嶼 照辦煮碗－

明日大嶼現在就係呢一步。2017年，政府已經低調將「東大嶼都會」納入《可持續大嶼藍圖》，整個《藍圖》嘅宣傳，集中係大嶼山本島嘅「南保育、北發展」【註五】，同時將大嶼山嘅發展定位為大灣區「雙門戶」嘅重要節點；2018年「土地大辯論」，先將已經決定咗要起嘅「東大嶼都會」包裝成「明日大嶼」計劃，公眾先普遍認知政府要花巨額公帑填海。2019年，再被踢爆將有第二條高鐵由深圳直插「東大嶼新中心」【註六】。

－研究撥款已是終極一戰－

參考往績，現在嘅「前期研究」撥款，只係將整個大白象「拆件上市」嘅其中一部，唔存在話仲有得考慮「起唔起」呢個問題。政府巧立明目以「可行性」去咁拎撥款，背後往往意味住政府已經預咗要開工，大興土木。再加上依家話研究用繞過立法會監察既融資方式，呢個研究撥款好可能就係市民表達意向最後一次機會，唔係過左海就係神仙了。

#明日大嶼又嚟喇

參考資料
【註一】香港港台：有議員贊成明日大嶼先作前期研究　亦有人質疑倒錢落海
https://news.rthk.hk/rthk/ch/component/k2/1550496-20200919.htm
【註二】明報：陳健波嘆明日大嶼撥款未通過　重提示威者破壞收成期稱「年輕人無權毁上一代成果」 https://bit.ly/30z3jnM
【註三】2019年5月25日立法會工務小組委員會會議的跟進事項 [PWSC (2019-20)5]
https://www.legco.gov.hk/yr18-19/chinese/fc/pwsc/papers/pwsc20190525pwsc-284-1-c.pdf
【註四】運輸及房屋局網頁 跨境交通運輸港珠澳橋歷史 https://www.thb.gov.hk/tc/policy/transport/issues/cbt_3.htm
【註五】文匯報：大嶼山藍圖出台 加快推動勿再蹉跎http://paper.wenweipo.com/2017/06/05/WW1706050001.htm
【註六】明報：穗高鐵網駁「明日大嶼」 南沙抵港僅半小時 https://bit.ly/34GhsRC

🏋️ 支持土地研究工作
https://liber-research.com/support-us/
－－－
Facebook: https://www.facebook.com/localresearch/
IG: https://www.instagram.com/liberresearch/
TG: t.me/liberinfo
Twitter : https://twitter.com/LiberResearch
Youtube: https://bit.ly/2WOIKTk
研究義工報名申請表
https://bit.ly/2SbbyT3

深水埗，一個跟「貧窮」長年掛勾的地區，是很多低下階層市民的「窩居」，所謂的「窩居」，指的是租金昂貴、質素極為惡劣的籠屋、板間房、天台屋及劏房等，據估計，這類人口約有20萬，20歲的鄧雯筠Connolly是其中之一。

由小公主變劏房少女

Connolly本來出生於小康之家，小時候住在三房一廳的公務員宿舍，可惜父母在她8歲那年離婚，她當時選擇了跟媽媽生活，從此由小公主變成一個住劏房的女孩：「你問我依家會唔會後悔，我又唔會後悔，始終係我細個果陣嘅決定，而且我媽媽係愛我嘅。」

貧窮無阻追求藝術夢

有着媽媽的愛，雖然生活環境差了，但Connolly仍舊快樂地成長，亦可以跟從自己的興趣修讀藝術，今年剛好畢業的她，透過實習的畫廊Eastpro，認識了攝影師張榮麟，他過去一年拍攝了一輯以籠屋、劏房、棺材房、天台屋為主題的相片，除了舉行「The Forgotten」攝影展之外，亦出版了一本相冊，相冊的第一頁，就Connolly的插畫。

「我用咗斜視嘅角度去畫，左上角表達有錢人住嘅地方，中間有條斜路係路障嚟嘅，路障係代表窮人好難、或者永遠都無機會到達另一邊嘅世界，呢個係佢哋之間嘅洪溝。」成長於深水埗的Connolly，感受非常深。

輪候公屋6年未果

香港貧富懸殊差距之大，令Connolly有很深的體會，過着基層市民生活的她，和媽媽正輪候公屋，至今已有6年，但仍然未有任何消息。截至今年3月底，公屋申請宗數超過25萬宗，平均輪候時間仍然維持5.5年歷史高位：「依家多咗咁多新移民嚟同我哋爭公屋，講真一定會唔鍾意、唔開心，政府對土生土長嘅香港人，其實又有幾多福利呢？」

目前申請公屋，二人每月最高入息限額為18,690元，即將投入社會工作的Connolly，很擔心跟媽媽二人的收入會超出這限額，面對兩難的她，惟有選擇先做兼職：「好無奈，都麻木喇，其實已經唔會盼望幾時有公屋。」

批評明日大嶼：不切實際

為了令公屋輪候人士快點「上樓」，政府力推「明日大嶼」計劃，填海1,000公頃，聲稱約可提供15至26萬單位，當中七成為公營房屋。雖然Connolly很想快點「上樓」，但卻不支持這填海計劃，認為政府是捨易取難：「以我所知香港其實有好多棕地可以發展，但政府偏偏唔攞嚟起公屋，你用咁多時間、精力、金錢去起一個人工島，我可以好肯定講一句，你唔係為咗基層人士去起嘅。」

置業是一個夢

雖然短時間內，Connolly仍然以申請公屋為目標，但正值大好年華的她，對將來的生活仍然充滿盼望，更視置業為追求目標：「租屋始終係寄人籬下，當然係有自己嘅物業會較安心，呢個係一個目標、一個夢想、一個希望。」

今集《港。故》用7分半鐘，帶大家走進深水埗的劏房，看看一個少女如何在陋室中成長、掙扎求存的故事。

-------------
《港。故》：東網每周專題習作，講故事、講香港人的故事。
Fb：http://bit.ly/oncckonggu_Fb　
IG：http://bit.ly/oncckonggu_IG　
Youtube：http://bit.ly/oncckonggu_Youtube